ໃນວັນທີ 2 ສິງຫານີ້, ທ່ານ ບຸນທົງ ຖິ່ນດອນໂຂງ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວ​ທ) ແຂວງເຊກອງ ພ້ອມຄະນະ ໄດ້ລົງເຄື່ອນໄຫວຊຸກຍູ້ວຽກງານຖະແຫຼງຂ່າວ-ສື່ມວນຊົນຢູ່ເມືອງດາກຈຶງ ໂດຍມີ ທ່ານ ສີໃສ ພິມພິສອນ ຫົວໜ້າຫ້ອງການ ຖວທ ເມືອງ ແລະ ວິຊາການກ່ຽວຂ້ອງເຂົ້າຮ່ວມ.

      ທ່ານ ອິນແປງ ພົມມະນິດ ຮອງຫົວໜ້າຫ້ອງການ ຖວທ ເມືອງໄດ້ລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານຖະແຫຼງຂ່າວ-ສື່ມວນຊົນໃນໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2021 ໃຫ້ທ່ານຮອງຫົວໜ້າພະແນກຮັບຊາບ. ຫຼັງຈາກນັ້ນ, ກໍມີການປະກອບຄໍາເຫັນດ້ານວິຊາການໃນການປະຕິບັດໜ້າທີ່ວຽກງານຕົວຈິງ ເພື່ອຊອກໃຫ້ເຫັນດ້ານດີ, ດ້ານອ່ອນ ແລະ ຂໍ້ຄົງຄ້າງຕ່າງໆ ຊຶ່ງຈະຕ້ອງໄດ້ພ້ອມກັນແກ້ໄຂໃນຕໍ່ໜ້າ.

      ໂອກາດນີ້, ທ່ານ ບຸນທົງ ຖິ່ນດອນໂຂງ ກໍໄດ້ມີຄໍາເຫັນຊີ້ນໍາໂດຍເນັ້ນໃຫ້ຄະນະພັກ-ຄະນະນໍາ ແລະ ພະນັກງານຫ້ອງການ ຖວທ ເມືອງຕັ້ງໜ້າສືບຕໍ່ປະຕິບັດໜ້າທີ່ຂອງຕົນໃຫ້ມີຜົນສໍາເລັດສູງຂຶ້ນກວ່າເກົ່າ, ປະຕິບັດໜ້າທີ່ຕາມຫຼັກການລວມສູນປະຊາທິປະໄຕ, ກໍານົດແຜນດໍາເນີນງານ ກໍຄືແຜນການເຄື່ອນໄຫວວຽກງານ ຖວທ ແຕ່ນີ້ຮອດປີ 2025 ຮັບປະກັນໃຫ້ມີຄວາມເປັນເອກະພາບ, ສອດຄ່ອງກັບຄວາມເປັນຈິງຂອງທ້ອງຖິ່ນຕົນ, ພັດທະນາວຽກງານຖະແຫຼງຂ່າວ-ສື່ມວນຊົນໃຫ້ໄດ້ທັງປະລິມານ ແລະ ຄຸນນະພາບ ກາຍເປັນອາວຸດທີ່ແຫຼມຄົມໃນການເຜີຍແຜ່ແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມລັດ, ເກັບກໍາຂໍ້ມູນການນໍາໃຊ້ສື່ສັງຄົມອອນລາຍບັນດາຂະແໜງການຕ່າງໆຂອງລັດພາຍໃນເມືອງຕົນເພື່ອສະດວກໃນການຄຸ້ມຄອງ, ເກັບກໍາຂໍ້ມູນບ້ານທີ່ມີລະບົບໂທລະໂຄ່ງ ແລະ ບ້ານທີ່ບໍ່ມີລະບົບໂທລະໂຄ່ງໃຫ້ລະອຽດຊັດເຈນ ເພື່ອເປັນຂໍ້ມູນໃນການຂຶ້ນແຜນພັດທະນາໃນຊຸມປີຕໍ່ໜ້າ, ປະສານສົມທົບກັບຂະແໜງການກ່ຽວຂ້ອງພາຍໃນເມືອງແກ້ໄຂປະກົດການຫຍໍ້ທໍ້ທີ່ເກີດຂຶ້ນໃນຂົງເຂດວຽກງານ ຖວທ ໃຫ້ນັບມື້ຫຼຸດໜ້ອຍຖອຍລົງເປັນກ້າວໆ.

 (ຂ່າວ-ພາບ: ແກ້ວໄຊຍະວົງ)