ໜັງສືພິມ ປະຊາຊົນ

ກອງປະຊຸມໃຫຍ່ ຜູ້ແທນອົງຄະນະພັກ ເມືອງເລົ່າງາມ ຄັ້ງທີ XII

ເຜີຍແຜ່ໂດຍ: siththiphone rasphone ເວລາ: 30/01/2020 09:10:32 ຈຳນວນຢ້ຽມຊົມ 1892 ຄັ້ງ

ກອງປະຊຸມໃຫຍ່ຜູ້ແທນອົງຄະນະພັກເມືອງເລົ່າງາມແຂວງສາລະວັນ ຄັ້ງທີ XII ໄດ້ເປີດຂຶ້ນຢ່າງເປັນທາງການ ໃນວັນທີ 29 ມັງກອນ 2020 ນີ້ ທີ່ສະໂມສອນຂອງເມືອງ ໂດຍການເປັນປະທານຂອງສະຫາຍ ສົມສັກ ທົງຄຳຫານ ຮັກສາການເລຂາພັກເມືອງ ຮັກສາການເຈົ້າເມືອງໆເລົ່າງາມ, ເປັນກຽດເຂົ້າຮ່ວມຂອງສະຫາຍ ສີສຸວັນ ວົງຈອມສີ ກຳມະການສູນກາງພັກ ເລຂາພັກແຂວງ ເຈົ້າແຂວງສາລະວັນ ພ້ອມດ້ວຍແຂກຖືກເຊີນຈາກເມືອງອ້ອມຂ້າງເຂົ້າຮ່ວມ.
ສະຫາຍ ສົມສັກ ທົງຄຳຫານ ໄດ້ກ່າວວ່າ: ກອງປະຊຸມ ໃຫຍ່ຄັ້ງນີ້ແມ່ນໄດ້ເປີດຂຶ້ນທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວປວງຊົນຊາວລາວ ຢູ່ໃນຄວາມເບີກບານມ່ວນຊື່ນ ຕໍ່ຜົນສຳເລັດອັນສຳຄັນ ໃນພາ ລະກິດປົກປັກຮັກສາ ແລະ ພັດທະນາເສດຖະກິດ-ສັງຄົມ, ເມືອງ ໃນໄລຍະ 5 ປີຜ່ານມາ, ທົ່ວເມືອງແມ່ນມີສະຖຽນລະພາບ, ທາງດ້ານການເມືອງມີຄວາມໜັກແໜ້ນ, ສັງຄົມມີຄວາມສະຫງົບເປັນລະບຽບຮຽບຮ້ອຍ, ປະຊາຊົນບັນດາເຜົ່າມີຄວາມສາມັກຄີປອງດອງເປັນປືກແຜນແໜ້ນໜາ ແລະ
ເຊື່ອໝັ້ນຕໍ່ການນຳພາຂອງພັກ, ເສດຖະກິດ-ສັງຄົມມີການ ຂະຫຍາຍຕົວຢ່າງຕໍ່ເນື່ອງ, ຊີ ວິດການເປັນຢູ່ທາງດ້ານວັດຖຸ -ຈິດໃຈຂອງປະຊາຊົນໄດ້ຮັບ ການຍົກລະດັບດີຂຶ້ນເປັນກ້າວໆ, ພະນັກງານ-ສະມາຊິກພັກຈຳນວນຫຼວງຫຼາຍໄດ້ຮັບການບໍາລຸງກໍ່ສ້າງໃນຂະບວນການວຽກງານຕົວຈິງ ເຮັດໃຫ້ບົດບາດການນຳພາຂອງພັກໃນທົ່ວສັງຄົມໄດ້ຮັບການເຊີດຊູສູງຂຶ້ນ, ຈາກນັ້ນ ຜູ້ເຂົ້າຮ່ວມກອງປະຊຸມກໍໄດ້ຮັບຟັງການຜ່ານບົດລາຍງານການເມືອງ, ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນໄລຍະຜ່ານມາ ແລະທິດທາງ 5 ປີຕໍ່ໜ້າ ພ້ອມດ້ວຍບົດສຳຫຼວດການນຳພາລວມຂອງຄະນະບໍລິຫານງານພັກເມືອງ ໃນໄລຍະຜ່ານມາເມືອງເລົ່າງາມກໍໄດ້ເອົາໃຈໃສ່ໃນການຄົ້ນຄວ້າເຊື່ອມຊຶມ ແລະຜັນຂະຫຍາຍມະຕິ X ຂອງສູນ ກາງພັກ, ມະຕິ VIII ຂອງອົງຄະ ນະພັກແຂວງ ແລະ ມະຕິ XI ຂອງອົງຄະນະພັກເມືອງ ພ້ອມດ້ວຍບັນດາມະຕິຄຳສັ່ງ ແລະຂໍກຳນົດຕ່າງໆ ເພື່ອເຮັດໃຫ້ຊັ້ນຄົນໃນສັງຄົມໄດ້ຮັບຮູ້ເຂົ້າ ໃຈຢ່າງເລິກເຊິ່ງຖືກຕ້ອງຕໍ່ແນວທາງນະໂຍບາຍຂອງພັກ -ລັດວາງອອກໃນແຕ່ລະໄລຍະ ແລະ ເຮັດໃຫ້ພະນັກງານສະມາຊິກພັກ, ພະນັກງານຫຼັກແຫຼ່ງໄດ້ກາຍເປັນແບບຢ່າງໃນການຈັດຕັ້ງນຳພາຂະບວນການຕ່າງໆ ພ້ອມດຽວກັນນັ້ນກອງປະຊຸມຍັງໄດ້ຮຽກຮ້ອງໃຫ້ຜູ້ແທນທຸກສະຫາຍ ຈົ່ງໄດ້ເຊີດຊູຄວາມເປັນເຈົ້າການ ແລະຄວາມຮັບຜິດຊອບສູງ ໃນການປະກອບຄຳຄິດ, ຄຳເຫັນໃສ່ຮ່າງບົດລາຍງານຕ່າງໆ ເພື່ອເຮັດໃຫ້ວຽກງານໃນຕໍ່ໜ້າໄດ້ຮັບຜົນ ສຳເລັດຕາມລະດັບຄາດໝາຍທີ່ວາງໄວ້ ແລະ ຮັບປະກັນເຮັດ ໃຫ້ກອງປະຊຸມດຳເນີນໄປດ້ວຍບັນຍາກາດອັນຟົດຟື້ນ, ມີ ຄວາມສາມັກຄີເປັນເອກະພາບ ໜັກແໜ້ນ, ກອງປະຊຸມໃຫຍ່ ຜູ້ແທນອົງຄະນະພັກເມືອງເລົ່າ ງາມ ຄັ້ງທີ XII ນີ້ແມ່ນໄດ້ດຳ ເນີນເປັນເວລາ 2 ວັນ ຈຶ່ງສຳເລັດ.
(ພາບ-ຂ່າວ: ສິດຕາ ເພັດວົງສາ)

ຂ່າວທີ່ໄດ້ຮັບຄວາມນິຍົມ