ກອງປະຊຸມສ່ອງແສງລາຍງານວຽກງານຮອບດ້ານ 6 ເດືອນ​ຕົ້ນ​ປີ  ຂອງຂົງເຂດວັດທະນະທຳ-ສັງຄົມ ແຂວງບໍ່ແກ້ວ ໄດ້​ເປີດຂຶ້ນໃນວັນທີ 3 ສິງຫາ ຜ່ານ​ມານີ້ ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວ​ທ) ແຂວງ ໂດຍການເຂົ້າຮ່ວມເປັນປະທານຂອງ ທ່ານ ຄຳຜະຫຍາ ພົມປັນຍາ ຮອງເຈົ້າແຂວງ ຜູ້ຊີ້ນຳຂົງເຂດວັດທະນະທຳ-ສັງຄົມແຂວງ, ມີຫົວໜ້າ, ຮອງຫົວໜ້າພະແນກການ, ຂົງເຂດວັດທະນະທຳ-ສັງຄົມເຂົ້າຮ່ວມ.

ໃນກອງປະຊຸມໄດ້ຜັດປ່ຽນກັນສ່ອງແສງລາຍງານ ສະພາບການຈັດຕັ້ງປະຕິບັດວຽກງານຮອບດ້ານໃນຂະແໜງຕົນຮັບຜິດຊອບ ໂດຍຍົກໃຫ້ເຫັນບັນດາວຽກງານທີ່ພົນເດັ່ນ, ຂໍ້ຄົງຄ້າງ, ບາງບົດຮຽນທີ່ຖອດຖອນໄດ້ ໂດຍສະເພາະແມ່ນວຽກງານ ໃນພະແນກ ຖວ​ທ, ສຶກສາທິການ ແລະ ກິລາ, ແຮງງານສະຫວັດດີການ ແລະ ສັງຄົມ, ຍຸຕິທຳ ແລະ ພະ​ແນກພາຍໃນແຂວງ, ພ້ອມທັງຍົກ​ໃຫ້ເຫັນວຽກງານຈຸດສຸມສະເພາະໜ້າ ແລະ ຍາວນານ ແນໃສ່ເຮັດໃຫ້ການເຄື່ອນໄຫວວຽກງານໃນຂົງເຂດວັດທະນະທຳ-ສັງຄົມຖືກຕ້ອງສອດຄອງກັບການປ່ຽນແປງໃໝ່ຂອງພັກ-ລັດ.

      ໃນ​ໂອ​ກາດນີ້, ທ່ານ ຮອງເຈົ້າແຂວງ ໄດ້ເນັ້ນໜັກໃຫ້ບັນດາພະແນກການສືບຕໍ່ເຄື່ອນໄຫວຕາມພາລະບົດບາດສິດ ແລະ ໜ້າທີ່ຂອງຕົນ, ສຳລັບພະແນກ ຖວ​ທ ແຂວງ ໃຫ້ສືບຕໍ່ພົວພັນຜູ້ປະກອບການ ເພື່ອລະດົມທຶນຂະຫຍາຍໂທລະໂຄ່ງ ຢູ່ບັນດາຕະຫຼາດ 4 ຕະຫຼາດຄື: ຕະຫຼາດວັງວິວ, ຕະຫຼາດສາຍມະນີ, ຕະຫຼາດສີດອນມີ ແລະ ຕະຫຼາດຈີນ ໃຫ້ຜູ້ປະກອບການໄດ້ມີສ່ວນຮ່ວມ. ປຸກລະດົມບັນດາພະແນກການມີສ່ວນຮ່ວມໃນການເຜີຍແຜ່ພາລະບົດບາດຂອງຕົນຜ່ານສື່ໃຫ້ກວ້າງຂວາງ ພ້ອມກັນລົງກວດກາບັນດາຮ້ານອາຫານ, ຮ້ານກິນດື່ມ, ຫົວໜ່ວຍທຸລະກິດ, ຜູ້ປະກອບການໃຫ້ປະຕິບັດຕາມຄຳສັ່ງຂອງຂັ້ນເທິງວາງອອກຢ່າງເຂັ້ມງວດ, ສືບຕໍ່ການສ້າງການທ່ອງທ່ຽວສູ່ເຂດຊົນນະບົດ ແລະ ວຽກ​ງານ​​ດ້ານອື່ນໆ ໃຫ້​ເອົາ​ໃຈ​ໃສ່​ໃຫ້​ດີ​ຂຶ້ນ​ເລື້ອຍໆ. (ຂ່າວ-ພາບ: ບຸນເພັດ)