​ ເມືອງປາກຊ່ອງ ແຂວງຈຳປາສັກ ໄດ້ສຳ​ເລັດບັ້ນອົບຮົມຫັດແອບການເມືອງ-ການທະຫານໃຫ້ແກ່ກຳລັງກອງຫຼອນທົ່ວເມືອງ ໃນຫວ່າງ​ແລ້ວນີ້ ທີ່ບ້ານຈັນສະຫວ່າງກຸ່ມ 10 ໂດຍການເປັນປະທານກ່າວປິດຂອງສະຫາຍ ພີມພອນ ພັນດານຸວົງ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງປາກຊ່ອງ ປະທານປ້ອງກັນຊາດ-ປ້ອງກັນຄວາມສະຫງົບເມືອງ, ມີ​ສະຫາຍ ພັທ ວີໄລ ສັນທະວີ ຮອງເສນາທິການ ກອງບັນຊາການທະຫານແຂວງ ແລະ ພາກ​ສ່ວນ​ກ່ຽວ​ຂ້ອງ​ເຂົ້າ​ຮ່ວມ.

ການຝຶກອົບຮົມຄັ້ງນີ້ ແມ່ນໄດ້ເລີ່ມຝຶກອົບຮົມແຕ່ວັນທີ 23 ກໍລະກົດ - 1 ສິງຫາ 2021 ຊຶ່ງ​ໄດ້​ຮຽນ​ຮູ້ພາກການເມືອງ ແລະ ພາກການທະຫານ. ​ສຳ​ລັບພາກການເມືອງ ໄດ້​ຮຽນ​ຮູ້ເອກະສານທາດແທ້ມູນເຊື້ອຂອງກອງທັບ, ເອກະສານສີສົ້ມ, ເອກະສານກົນອຸບາຍຫັນປ່ຽນໂດຍສັນຕິຂອງສັດຕູ ແລະ ກຸ່ມຄົນບໍ່ດີ, ເອກະສານພາລະບົດບາດ, ສິດ ແລະ ໜ້າທີ່ຂອງກອງຫຼອນ. ສຳ​ລັບພາກການທະຫານປະກອບມີ: ພາກລະບຽບ, ພາກສິນລະປະຍຸດ ແລະ ພາກຍຸດທະວິທີ. ຜ່ານການຝຶກອົບຮົມຫັດແອບຕົວຈິງ ສາມາດຕີລາຄາໄດ້ ພາກການເມືອງໄດ້ 78 ສະຫາຍ ເທົ່າກັບ 85%, ພາກການທະຫານ: ພາກລະບຽບໄດ້ 78 ສະຫາຍ ເທົ່າກັບ 81%, ພາກສິນລະປະຍຸດໄດ້ 98 ສະຫາຍ ເທົ່າກັບ 85% ແລະ ພາກຍຸດທະວິທີ ໄດ້ 95 ສະຫາຍ ເທົ່າກັບ 80% ແລະ ສຳລັບພາກສະໜາມຍິງລູກປືນແທ້ ມີໜ້າຍິງຕົວຈິງ 93 ສະຫາຍ,  ຈັດປະເພດເກັ່ງ 9 ສະຫາຍ ເທົ່າກັບ 9,67%, ປະເພດດີ 32 ສະຫາຍ ເທົ່າກັບ 34,40%.

ໃນ​ໂອ​ກາດນີ້, ສະຫາຍ ພິມພອນ ພັນດານຸວົງ ໄດ້ສະແດງຄວາມຍ້ອງຍໍຊົມເຊີຍ ຕໍ່ບັນດາສະຫາຍກຳລັງກອງຫຼອນທີ່ໄດ້ຕັດສິນໃຈສູງເຂົ້າຮ່ວມຝຶກອົບຮົມຄັ້ງນີ້ ຈົນບັນລຸຕາມເປົ້າໝາຍທີ່ທາງຂັ້ນເທິງກຳນົດໄວ້, ພ້ອມທັງເພີ່ມທະວີຄວາມຮັບຜິດຊອບຂອງກຳລັງກອງຫຼອນລົງສູ່ຮາກຖານກຸ່ມບ້ານໃຫ້ທັນກັບສະພາບການຕື່ມອີກ.

(ຂ່າວ-ພາບ: ຈອມເພັດ ຈາກເມືອງປາກຊ່ອງ)