ໜັງສືພິມ ປະຊາຊົນ

ຖວທ ເມືອງຮຸນ ມອບໃບຢັ້ງຢືນຄອບຄົວວັດທະນະທຳ ຄັ້ງທີ 2

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 09/08/2021 10:26:31 ຈຳນວນຢ້ຽມຊົມ 3425 ຄັ້ງ

ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ເມືອງຮຸນ ແຂວງອຸດົມໄຊ ໄດ້ຈັດພິທີມອບໃບຢັ້ງຢືນຄອບຄົວວັດທະນະທຳ ຄັ້ງທີ 2 ຂຶ້ນໃນວັນທີ 5 ສິງຫາຜ່ານມານີ້ ທີ່ສະໂມສອນຂອງບ້ານນາໂຄ້ງ ເມືອງຮຸນ ໂດຍການເຂົ້າຮ່ວມເປັນປະທານຂອງ ທ່ານ ບຸນຕຽມ ສຸພັນທອງ ຮອງເລຂາພັກເມືອງ ມີທ່ານ ຫຸມພັນ ອານຸວົງ ຫົວໜ້າຫ້ອງການ ຖວທ ເມືອງ ມີອົງການປົກຄອງບ້ານ 10 ບ້ານເທດສະບານ ແລະ ຄອບຄົວວັດທະນະທຳໃໝ່ເຂົ້າຮ່ວມ.

ທ່ານ ກົງຈັກ ພົມມະນີວັນ ໄດ້ຕາງໜ້າ 10 ບ້ານເທດສະບານເມືອງ ຜ່ານບົດລາຍງານການກໍ່ສ້າງຄອບຄົວວັດທະນະທໍາໃໝ່ ຄັ້ງທີ 2 ໂດຍອີງຕາມແຜນການກໍໍ່ສ້າງຄອບຄົວວັດທະນະທໍາໃໝ່ຂອງເມືອງ ປະຈຳປີ 2021 ຊຶ່ງມີ 10 ບ້ານໃຫຍ່ ມີພົນລະເມືອງທັງໝົດ 12.932 ຄົນ ຍິງ 6.458 ຄົນ ມີ 3.072 ຄອບຄົວ, 2.509 ຫຼັງຄາເຮືອນ. ປັດຈຸບັນມີຄອບຄົວວັດທະນະທຳທັງໝົດ 2.016 ຄອບຄົວ ແລະ ໄດ້ສ້າງເປັນຄອບຄົວວັດທະນະທຳໃໝ່ 424 ຄອບຄົວ ແລະ ຜ່ານທິດທາງແຜນການ ກໍ່ສ້າງຄອບຄົວວັດທະນະທໍາໃໝ່ໃນປີຕໍ່ໜ້າ, ໃນ 10 ບ້ານເທດສະບານໜຶ່ງ ໂດຍສະເພາະແມ່ນຈະສຸມໃສ່ຂົງເຂດການເມືອງ, ເສດຖະກິດ, ວັດທະນະທຳ-ສັງຄົມ ແລະ ຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ. ເພື່ອພ້ອມກັນປັບປຸງ, ຮັກສາມູນເຊື້ອ ຮີດຄອງປະເພນີອັນດີງາມຂອງບັນດາເຜົ່າໄວ້ໃຫ້ຍືນຍົງ. ຈາກນັ້ນ, ໃນພິທີໄດ້ມອບໃບຢັ້ງຢືນ ໃຫ້ຄອບຄົວວັດທະນະທຳໃໝ່ ຈຳນວນ 424 ຄອບຄົວ.

ໃນໂອກາດດັ່ງກ່າວ, ທ່ານ ບຸນຕຽມ ສຸພັນທອງ ໄດ້ຮຽກຮ້ອງໃຫ້ບັນດາບ້ານ, ຄອບຄົວວັດທະນະທໍາໃໝ່ ຈົ່ງພ້ອມກັນສືບຕໍ່ນຳເອົາເນື້ອໃນຈິດໃຈຂອງການກໍ່ສ້າງຄອບຄົວວັດທະນະທໍາໃໝ່ໄປຈັດຕັ້ງຜັນຂະຫຍາຍ ໂດຍສະເພາະສ້າງໃຫ້ມີອາຊີບທີ່ໝັ້ນຄົງ, ດຳລົງຊີວິດຖືກຕ້ອງຕາມລະບຽບກົດໝາຍ ມີຄວາມສາມັກຄີປອງດອງ, ມີຄວາມອົບອຸ່ນ, ມີການດຳລົງຊີວິດທີ່ປອດໃສຂາວສະອາດ, ເປັນຄອບຄົວທີ່ຊ່ວຍເຫຼືອຊຶ່ງກັນ ແລະ ກັນ.

(ຂ່າວ-ພາບ: ອຳຄາ ສຸລິນທອງ)

ຂ່າວທີ່ໄດ້ຮັບຄວາມນິຍົມ