ເມື່ອບໍ່ດົນຜ່ານມານີ້ ທີ່ຫ້ອງປະຊຸມຫ້ອງວ່າການ ເມືອງວຽງທອງ ແຂວງບໍລິຄຳໄຊ ໄດ້ຈັດກອງປະຊຸມກ່ຽວກັບການປະເມີນຜົນການຈັດຕັ້ງປະຕິບັດວຽກງານ ສ້າງເມືອງເປັນຫົວໜ່ວຍເຂັ້ມແຂງຮອບ ດ້ານຕາມ 5 ດ້ານ, 47 ຕົວຊີ້ບອກ. ເປັນກຽດເຂົ້າຮ່ວມຂອງ ທ່ານ ພັອ ຄຳແພນ ວິລື້ທຳ ກໍາມະການພັກແຂວງ ເລຂາພັກເມືອງ ເຈົ້າເມືອງວຽງທອງ ມີຮອງເຈົ້າເມືອງ, ຄະນະປະຈໍາພັກ, ກໍາມະການພັກເມືອງ, ຫົວໜ້າຫ້ອງການ, ຮອງຫ້ອງການ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

ທ່ານ ຄຳກອງ ພົມມີໄຊ ກໍາມະການພັກເມືອງ ຫົວໜ້າຫ້ອງການພາຍໃນເມືອງ ໄດ້ຜ່ານບັນດາເອກະສານຕ່າງໆຂອງຂັ້ນເທິງ ແລະ ຊີ້ແຈງບາງເນື້ອໃນແບບຟອມປະເມີມເມືອງເຂັ້ມແຂງຮອບດ້ານຕາມ 5 ດ້ານ ແລະ 47 ຕົວຊີ້ບອກ. ຫຼັງຈາກນັ້ນກອງປະຊຸມຜູ້ເຂົ້າຮ່ວມກໍໄດ້ພ້ອມກັນປະກອບຄຳຄິດ, ຄຳເຫັນ ຕໍ່ແບບຟອມດັ່ງກ່າວທີ່ກ່ຽວພັນກັບພາກສ່ວນຫ້ອງການທີ່ກ່ຽວຂ້ອງ ພ້ອມເປັນເອກະພາບກັນ ຕາມ 5 ເນື້ອໃນແຕ່ລະດ້ານ ແລະ 47 ຕົວຊີ້ບອກຕ່າງໆ ເປັນຕົ້ນແມ່ນດ້ານ ເນື້ອໃນທີ 1 ດ້ານກໍ່ສ້າງພັກ-ພະນັກງານ ມີ 8 ຕົວຊີ້ບອກ ບັນລຸໄດ້ 100%, ດ້ານເນື້ອໃນທີ 2 ດ້ານການປົກຄອງ ແລະ ຄຸ້ມຄອງບໍລິຫານ ມີ 4 ຕົວຊີ້ບອກ ບັນລຸ ໄດ້ 3 ຕົວຊີ້ບອກ, ບໍ່ບັນລຸ 1 ຕົວຊີ້ບອກ, ດ້ານເນື້ອໃນທີ 3 ດ້ານເສດຖະກິດ - ການເງິນ, ຊັບພະຍາກອນທໍາມະຊາດ ແລະ ສິ່ງແວດລ້ອມ ມີ 18 ຕົວຊີ້ບອກ ບັນລຸໄດ້ 15 ຕົວຊີ້ບອກ, ບໍ່ບັນລຸ 3 ຕົວຊີ້ບອກ, ດ້ານເນື້ອໃນທີ 4 ດ້ານວັດທະນະທໍາ-ສັງຄົມ ມີ 11 ຕົວຊີ້ບອກ ບັນລຸໄດ້ 6 ຕົວຊີ້ບອກ, ບໍ່ບັນລຸ 5 ຕົວຊີ້ບອກ ແລະ ດ້ານເນື້ອໃນທີ 5 ດ້ານປ້ອງກັນຊາດ-ປ້ອງກັນຄວາມສະຫງົບ ມີ 6 ຕົວຊີ້ບອກ ສາມາດບັນລຸໄດ້ 4 ຕົວຊີ້ບອກ ແລະ ບໍ່ບັນລຸ 2 ຕົວຊີ້ບອກ.

ໃນຕອນທ້າຍຂອງກອງປະຊຸມ ທ່ານປະທານຍັງໄດ້ເນັ້ນໜັກໃຫ້ແຕ່ລະຫ້ອງການຄົ້ນຄວ້າຊອກຫາວິທີເພື່ອພ້ອມກັນປະຕິບັດຕົວຊີ້ບອກທີ່ບໍ່ທັນບັນລຸໃຫ້ເອົາໃຈໃສ່ເພີ່ມທະວີຄວາມຮັບຜິດຊອບຂໍທິດນຳຂັ້ນເທິງຫາວິທີແກ້ໄຂໃນຊຸມປີຕໍ່ໜ້າໃຫ້ບັນລຸຕາມຈຸດປະສົງ.

(ຂ່າວ: ທອງວັນດີ)