ຫົວ​ຂໍ້ : ທົ່ວປະເທດມີແຫ່ຼງຜະລິດພະລັງງານ ໄຟຟ້າທັງໝົດ 78 ແຫ່ງ

ເຜີຍ​ແຜ່​ໂດຍ​: admin ເວ​ລາ: 05/02/2020 09:03:10 ຈຳ​ນວນ​ຜູ້​ເຂົ້າ​ຢ້ຽມ​ຊົມ 5358 ຄັ້ງ

   ທ່ານ ຄຳ​ມະນີ ອິນ​ທິ​ລາດ ລັດຖະມົນຕີ​ກະຊວງ​ພະລັງງານ​ແລະ​ບໍ່​ແຮ່ (ພບ) ໄດ້​ລາຍ​ງານ​ຕໍ່​ກອງ​ປະຊຸມ​ເປີດ​ກວ້າງ​ສະຫຼຸບ​ການຈັດຕັ້ງ ປະຕິບັດ​ແຜນ​ພັດທະນາ​ວຽກ​ງານ​ພະລັງງານ ແລະ ບໍ່​ແຮ່ 5 ປີ​ຄັ້ງ​ທີ VIII (2016-2020)ທີ່​ຈັດ​ຂຶ້ນ​ໃນ​ຕອນ​ເຊົ້າ​ທີ 4 ກຸມພາ​ທີ່​ຫໍ​ປະຊຸມ​ແຫ່ງ​ຊາດ​ນີ້​ວ່າ : ທົ່ວ​ປະເທດ​ມີ​ແຫຼ່ງ​ຜະລິດ​ພະລັງງານ​ໄຟຟ້າ​ແລ້ວ​ທັງ​ໝົດ 78 ແຫ່ງ, ມີ​ກຳລັງ​ຕິດ​ຕັ້ງ​ທັງ​ໝົດ 9.972 ເມ​ກາ​ວັດ, ສາມາດ​ຜະລິດ​ພະລັງງານ​ໄຟຟ້າ​ໄດ້​ເຖິງ 52.211 ລ້ານ​ກິໂລ​ວັດ​ໂມງ​ຕໍ່​ປີ, ນອກຈາກ​ນີ້​ພວກ​ເຮົາ​ຍັງ​ມີ​ໂຄງການ​ໄຟຟ້າ​ຖ່ານ​ຫີນ 1 ແຫ່ງ, ໂຄງການ​ພະລັງງານ​ໄຟຟ້າ​ຊີວະ​ມວນ 4 ແຫ່ງ ແລະ ໂຄງການ​ໄຟຟ້າ​ແສງຕາ​ເວັນ 5 ແຫ່ງ, ໂຄງການ​ພະລັງງານ​ລົມ 4 ໂຄງ​ການ.
   ຄຽງ​ຄູ່​ກັນ​ນີ້​ການ​ພັດທະ ນາ​ລະບົບ​ສາຍ​ສົ່ງ​ກໍ່​ໄດ້​ດຳເນີນ​ໄປ​ຢ່າງ​ແຂງແຮງ, ມາ​ຮອດ​ປັດຈຸບັນ​ທົ່ວ​ປະເທດ​ມີ​ລະບົບ​ສາຍ​ສົ່ງ​ແຮງ​ສູງ, ແຮງ​ກາງ ແລະ ແຮງ​ຕໍ່າ​ມີ​ຄວາມ​ຍາວ​ທັງ​ໝົດ 65.563 ກິໂລແມັດ, ມີ​ສະຖານີ​ໄຟຟ້າ 71 ແຫ່ງ, ສຳລັບ​ການ​ສົ່ງ​ອອກ​ໄປ​ຈຳໜ່າຍ​ຕ່າງປະເທດ​ສາມາດ​ບັນລຸ​ໄດ້ 6.457 ເມ​ກາ​ວັດ​ໃນ​ນີ້​ໄດ້​ສົ່ງ​ອອກ​ໄປ​ປະເທດ​ໄທ 5.620 ເມ​ກາ​ວັດ​ຄາດ​ວ່າ​ຮອດ​ປີ 2022 ຈະ​ສົ່ງ​ຕື່ມ​ອີກ 2 ໂຄງການ​ຄື : ໂຄງ​ການ​ນໍ້າ​ເທີນ 1 ສົ່ງ​ອອກ 520 ເມ​ກາ​ວັດ ແລະ ນໍ້າ​ງື່ມ 3 ສົ່ງ​ອອກ 480 ເມ​ກາ​ວັດ ແລະ ຈະ​ສືບຕໍ່​ເຈລະຈາ​ຊື້​-​ຂາຍ​ໄຟຟ້າ​ແບບ​ລັດຖະບານ​ຕໍ່​ລັດຖະບານ​ ຊຶ່ງ​ຮອດ​ປີ 2020-2030 ໃຫ້​ໄດ້​ຄົບ 9.000 ເມ​ກາ​ວັດ.
   ຂາຍ​ໄປ​ປະເທດ​ຫວຽດ ນາມ 570 ເມ​ກາ​ວັດ​ ຊຶ່ງ​ປະ ກອບ​ມີ​ໂຄງການ​ເຂື່ອນ​ໄຟຟ້າ​ເຊ​ຂະ​ໝານ 1 ແລະ ເຊ​ຂະ​ໝານ 3 ແລະ ໃນ​ວັນ​ທີ 4/1/2020 ທີ່​ຜ່ານ​ມາ​ໄດ້​ມີ​ການ​ເຊັນ​ສັນຍາ​ຊື້​-​ຂາຍ​ອີກ​ຕື່ມ 5 ໂຄງການ​ຄື ນໍ້າ​ກົງ 2, ກົງ 3, ນໍ້າ​ອີ​ມູນ, ນໍ້າ​ຊັນ 3A ແລະ 3B, ກໍາ​ລັງ​ຕິດ​ຕັ້ງ​ລວມ 363 ເມ​ກາ​ວັດ ຊຶ່ງ​ແຜນການ​ຊື້​-​ຂາຍ​ພະລັງງານ​ໄຟຟ້າ​ກັບ​ຫວຽດນາມ​ແມ່ນ​ຮອດ​ປີ 2020 ແມ່ນ​ໃຫ້​ໄດ້ 1.000 ເມ​ກາ​ວັດ, 2025 ໃຫ້​ໄດ້ 3.000 ເມ​ກາ​ວັດ ແລະ ຮອດ 2030 ໃຫ້​ໄດ້ 5.000 ເມ​ກາ​ວັດ. 
ການ​ຂາຍ​ໄຟຟ້າ​ໄປ​ຍັງ​ປະ ເທດ​ມຽນ​ມາ: ປັດຈຸ​ບັນ ໄດ້​ສົ່ງ​ອອກ​ແລ້ວ ຜ່ານ​ສາຍ​ສົ່ງ 22 kV ຈໍາ​ນວນ 10 ເມ​ກາ​ວັດ. ຄາດ​ວ່າ ຮອດ​ປີ 2020 ຈະ​ສົ່ງ​ເພີ່ມ​ອີກ 20 ເມ​ກາ​ວັດ. ຮອດ​ປີ 2023 ຈະ​ສົ່ງ​ໃຫ້​ໄດ້ 100 ເມ​ກາ​ວັດ ແລະ ຮອດ​ປີ 2025 ຈະ​ສົ່ງ​ໃຫ້​ໄດ້ 300 ເມ​ກາ​ວັດ.
   ການ​ເຊື່ອມ​ໂຍງ ແລະ ຈໍາ​ໜ່າຍ​ໄປ​ຍັງ​ຕະຫຼອດ​ອາ​ຊຽນ: ໃນ​ກຸ່ມ​ປະເທດ​ອາ​ຊຽນ ຊຶ່ງ ສປປ ລາວ ຂອງ​ພວກ​ເຮົາ ແມ່ນ​ປະເທດ ທຳອິດ​ທີ່​ໄດ້​ລິ​ເລີ່ມ ສົ່ງ​ຂາຍ​ໄຟຟ້າ​ແບບ​ເຊື່ອມ​ໂຍງ​ໃນ​ກຸ່ມ​ປະເທດ ອາ​ຊຽນ ຫຼື ການ​ເຊື່ອມ​ໂຍງ​ກັບ​ພາກ​ພື້ນ. ປັດຈຸ​ບັນ ໄດ້​ສົ່ງ​ອອກ​ແລ້ວ 100 ເມ​ກາ​ວັດ ໂດຍ​ຜ່ານ​ປະເທດ​ໄທ (ລາວ​-​ໄທ​-​ມາ​ເລ​ເຊຍ) ຊຶ່ງ ຮອດ​ປີ 2020 ຈະ​ສົ່ງ​ໃຫ້​ໄດ້ 300 ເມ​ກາ​ວັດ. ພ້ອມ​ດຽວ​ກັນ​ນີ້ ສືບຕໍ່​ເຈລະຈາ​ຊື້​-​ຂາຍ ແລະ​ເຊື່ອມ​ໂຍງ​ໄປ​ຮອດ​ປະເທດ ສິງ​ກະ​ໂປ.
   ພິເສດ​ໃນ​ວັນ​ທີ 12/9/ 2019 ທີ່​ຜ່ານ​ມາ​ນີ້, ພວກ​ເຮົາ​ໄດ້​ບັນລຸ​ການ​ເຊັນ​ບົດ​ບັນທຶກ​ຄວາມ​ເຂົ້າໃຈ ໃນ​ການ​ຮ່ວມ​ມື​ພັດທະນາ​ພະລັງງານ​ໄຟຟ້າ​ຮ່ວມ​ກັບ​ປະເທດ​ກຳປູເຈຍ​ແຕ່​ນີ້​ຮອດ​ປີ 2030  ຈຳນວນ 6.000 ເມ​ກາ​ວັດ ແລະ ໃນ​ວັນ​ທີ 7/1/2020 ທີ່​ຜ່ານ​ມາ​ ກໍໄດ້​ມີ​ການ​ສົ່ງ​ພະລັງງານ​ໄຟຟ້າ​ໃຫ້​ແກ່ ກໍາ​ປູ​ເຈຍ​ຈໍາ​ນວນ 195 ເມ​ກາ​ວັດ ​ຈາກ​ໂຄງການ​ດອນ​ສະ​ໂຮງ. ໃນ​ເດືອນ 3 ປີ 2020 ຈະ​ສົ່ງ​ອີກ 100 ເມ​ກາ​ວັດ. ແຕ່ 2020 ຫາ 2027 ຈະ​ສົ່ງ​ອອກ​ໃຫ້​ໄດ້​ອີກ 2.900 ເມ​ກາ​ວັດ ຄື​ຈາກ​ໂຄງການ​ເຂື່ອນ​ໄຟ​ຟ້າ​ນໍ້າ​ຕົກ 500 ເມ​ກາ​ວັດ ແລະ ຈາກ​ໂຄງການ​ໄຟຟ້າ​ຖ່ານ​ຫີນ 2.400 ເມ​ກາ​ວັດ ແລະ ຈະ​ໃຫ້​ຄົບ​ຕາມ​ຈໍາ​ນວນ 6.000 ເມັກ​ກາ​ວັດ ໃນ​ປີ 2030. ການ​ຂາຍ​ໄຟຟ້າ ແລະ ​ສົ່ງ​ອອກ​ໄປ​ຍັງ​ປະ​ເທດ​ກໍາ​ປູ​ເຈຍ​ເປັນ​ຜົນ​ສໍາ​ເລັດ ແລະ ຂີດ​ໝາຍ​ອັນ​ສໍາ​ຄັນ​ທີ່​ມີ​ລັກສະນະ​ຍຸດທະ​ສາດ​ເພາະ​ມັນ​ເປັນ​ການ​ເປີດ​ຕະຫຼາດ​ພະລັງງານ​ຂອງ​ປະເທດ​ເຮົາ​ໃຫ້​ກວ້າງ​ຂຶ້ນ  ແລະ ສາມາດ​ສ້າງ​ຍຸດທະ​ສາດ​ຕະຫຼາດ​ສົ່ງ​ອອກ​ຮອບດ້ານ​ໃຫ້​ແກ່​ປະເທດ​ຂອງ​ພວກ​ເຮົາ. 
   ຜົນສຳເລັດ​ທີ່​ສຳຄັນ​ອີກ​ອັນ​ໜຶ່ງ​ກໍ​ແມ່ນ​ພວກ​ເຮົາ​ໄດ້​ເອົາໃຈໃສ່​ວຽກ​ງານ​ພັດທະນາ​ໄຟຟ້າ​ໄປ​ສູ່​ຊົນ ນະ​ບົດ, ໄປ​ສູ່​ເຂດ​ພູ​ດອຍ, ຫ່າງ​ໄກ​ສອກຫຼີກ, ເຂດ​ທີ່​ເປັນ​ພື້ນຖານ​ຂອງ​ການ​ປະຕິວັດ​ໃນ​ໄລຍະ​ຕໍ່ຕ້ານ, ໂດຍ​ສະເພາະ​ແມ່ນ​ໄດ້​ຖື​ເອົາ​ວຽກ​ງານ​ດັ່ງກ່າວ​ຕິດ​ພັນ​ຢ່າງ​ສະໜິດ​ແໜ້ນ​ກັບ​ການ​ປະຕິບັດ​ຍຸດທະສາດ​ການ ພັດທະນາ​ຊົນນະບົດ ແລະ ວຽກ​ງານ 3 ສ້າງ​ຊຶ່ງ​ມາ​ຮອດ​ປັດຈຸບັນ​ນີ້, ສາມາດ​ສະໜອງ​ໄຟຟ້າ​ຮັບ​ໃຊ້​ໄດ້ 100% ຂອງ​ເທດສະບານ​ແຂວງ, ນະຄອນຫຼວງ, 100% ຂອງ​ເທດສະບານ​ເມືອງ, ນະຄອນ, ຈຳນວນ​ບ້ານ​ທີ່​ໄດ້​ຊົມໃຊ້​ໄຟຟ້າ​ແລ້ວ​ກວມ​ເຖິງ 90 % ຂອງ​ຈຳນວນ​ບ້ານ​ໃນ​ທົ່ວ​ປະເທດ ແລະ ຄອບຄົວ​ທີ່​ໄດ້​ຊົມໃຊ້​ໄຟຟ້າ​ແບບ​ຖາວອນ​ແລ້ວ​ກວມ​ເຖິງ 95 % ຂອງ​ຈຳນວນ​ຄອບຄົວ​ໃນ​ທົ່ວ​ປະ​ເທດ.
   ຄຽງ​ຄູ່​ກັບ​ຜົນສຳເລັດໃນ​ ການ​ພັດທະນາ​ດ້ານ​ພະລັງ ງານ, ວຽກ​ງານ​ບໍ່​ແຮ່​ກໍໄດ້ຮັບ​ ການ​ພັດທະນາ ຊຶ່ງ​ມີ​ຜົນສຳ ເລັດ​ທີ່​ດີ  ແລະ ສາມາດ​ບັນລຸ​ຄາດໝາຍ​ທີ່​ວາງ​ໄວ້​ຊຶ່ງ​ມາ​ຮອດປັດຈຸ​ບັນ​ໄດ້​ອະນຸຍາດ​ໃຫ້​ບໍລິສັດ​ລົງທຶນ​ໃນ​ກິດຈະການ​ທໍລະນີ​ສາດ​ແລະ​ບໍ່​ແຮ່ ແລ້ວ ທັງ​ໝົດ 193 ບໍລິສັດ. ໃນ​ນັ້ນ​ປະຕິບັດ​ວຽກ​ງານ ຊອກ​ຄົ້ນ ແລະ ສໍາ​ຫຼວດ​ແຮ່​ທາດ 69 ບໍລິສັດ, ສຶກສາ​ຄວາມ​ເປັນ​ໄປ​ໄດ້​ທາງ​ດ້ານ​ເສດ​ຖະ​ກິດ​-​ເຕັກນິກ 43 ບໍລິສັດ ແລະ ດໍາ​ເນີນ​ການ​ຂຸດ​ຄົ້ນ​ແຮ່​ທາດ 81 ບໍລິສັດ. 
ຜ່ານ​ການຈັດຕັ້ງ​ປະຕິບັດ​ແຜນ​ພັດທະນາ​ວຽກ​ງານ​ພະລັງງານ ແລະ ບໍ່​ແຮ່​ໄລຍະ 5 ປີ​ຄັ້ງ​ທີ VIII ໃນ​ຊຸມ​ປີ​ທີ່​ຜ່ານ​ມາ​ພວກ​ເຮົາ​ສາມາດ​ຕີ​ລາຄາ ແລະ ຢັ້ງຢືນ​ໄດ້​ວ່າ : ການ​ພັດທະນາ​ວຽກ​ງານ​ພະລັງງານ ແລະ ບໍ່​ແຮ່​ ແມ່ນ​ເຮັດ​ໄດ້​ຖືກຕ້ອງ​ຕາມ​ທິດ​ທາງ, ແຜນ​ນະໂຍບາຍ​ປ່ຽນແປງ​ໃໝ່​ຂອງ​ພັກ ແລະ ກົດໝາຍ ຂອງ​ລັດ​ຊຶ່ງ​ໃນ​ໄລຍະ 5 ປີຜ່ານມາ​ຂະ ແໜງ​ພະລັງງານ ແລະ ບໍ່​ແຮ່​ໄດ້​ປະກອບສ່ວນ​ພັນທະ​ຕໍ່​ງົບ ປະມານ​ຂອງ​ລັດຖະບານ​ເຖິງ 1.754 ລ້ານ ໂດ​ລາ, ໃນ​ນັ້ນ​ຈາກ​ຂະແໜງການ​ພະລັງງານ 1.020 ລ້ານ ໂດ​ລາ ແລະ ຈາກ​ຂະແໜງການ​ບໍ່​ແຮ່ 734 ລ້ານ ໂດ​ລາ, ເປັນ​ການ​ປະກອບສ່ວນ​ຕໍ່ GDP ປະມານ 16%, ເຫັນ​ໄດ້​ວ່າ​ຂະແໜງການ​ຂອງ​ພວກ​ເຮົາ​ເປັນ​ຜູ້​ເຮັດ​ພາລະ​ບົດບາດ​ທີ່​ສໍາ​ຄັນ​ທີ່​ສຸດ​ຂະແໜງການ​ໜຶ່ງ ໃນ​ການ​ພັດທະນາ​ເສດ​ຖະ​ກິດ​-​ສັງຄົມ​ແຫ່ງ​ຊາດ.
   ກອງ​ປະຊຸມ​ເປີດ​ກວ້າງ​ຈະ​ໄດ້​ດຳເນີນ​ເປັນ​ເວລາ 2 ວັນ​ ໂດຍ​​ໄດ້​ພ້ອມ​ກັນ​ສຸມ​ໃສ່​ຄົ້ນຄວ້າ, ປະກອບ​ຄຳ​ເຫັນ ແລະ ປຶກສາ​ຫາ​ລື​ບັັນ​ດາ ເນື້ອ​ໃນ, ວຽກ​ງານ ທີ່​ສຳຄັນ​ດັ່ງນີ້: 
1. ສະຫຼຸບ​ສະພາບ​ການ ຈັດຕັ້ງ​ປະຕິບັດ​ແຜນ​ພັດ​ວຽກ​ງານ​ພະລັງງານ ແລະ ບໍ່​ແຮ່​ໄລຍະ 5 ປີ​ຄັ້ງ​ທີ VIII (2016-2020) ແລະ ຄາດ​ຄະເນແຜນ ​ພັດ​ວຽກ​ງານ​ພະລັງງານ ແລະ   ບໍ່​ແຮ່​ໄລຍະ 5 ປີ​ຄັ້ງ​ທີ 9   (2020-2025).
2. ສະຫຼຸບ​ສະພາບ​ການ​ລົງ ທຶນ​ຂອງ​ພາກ​ລັດ ແລະພາກ​ ເອກະ​ຊົນ​ໃນ​ຂະແໜງ​ພະລັງ ງານ ແລະ ບໍ່​ແຮ່ ແລະ ສິ່ງ​ທ້າ​ ທາຍ​ໃນ​ຕະຫຼາດ​ສົ່ງ​ອອກ​ພະລັງ ງານ​ຂອງ​ສປປ​ລາວ.
3. ປຶກສາ​ຫາລື ແລະ ປະກອບ​ຄຳ​ເຫັນ​ເຂົ້າ​ໃສ່​ການ​ປັບປຸງ​ໂຄງ​ສ້າງ​ລາຄາ​ໄຟຟ້າ​ໃນ​ໄລຍະ​ໃໝ່. 
4. ປຶກສາ​ຫາລື​ກ່ຽວ​ກັບ​ການ​ກຳນົດ​ແຜນ​ພັດທະນາ​ວຽກ​ງານ​ພະລັງງານ ແລະ ບໍ່​ແຮ່ ແບບ​ເຊື່ອມ​ສານ, ການ​ກຳນົດ​ແຜນ​ພະລັງ​ງານ. 
5. ປຶກສາ​ຫາລື​ກ່ຽວ​ກັບ​ຫົວໜ່ວຍ​ລາຄາ​ກາງ​ການ​ກໍ່ສ້າງ​ລະບົບ​ສາຍ​ສົ່ງ, ຕາ​ຂ່າຍ ແລະ ໝໍ້​ແປງ.
6. ສິ່ງ​ທ້າ​ທາຍ​ໃນ​ການ​ພັດທະນາ​ພະລັງງານ​ທົດ​ແທນ.
7. ສະຫຼຸບ​ສະພາບ​ການ​ກວດ​ສອບ ແລະ ກວດກາ​ຄວາມ​ປອດ​ໄພ​ຂອງ​ເຂື່ອນ​ໄຟຟ້າ​ໃນ​ໄລຍະ​ທີ່​ຜ່ານ ມາ.
8. ສະ​ພາບ​ດໍາ​ເນີນ​ທຸລະ​ກິດ​ຂອງ​ລັດ​ວິ​ສາ​ຫະ​ກິດ​ໄຟຟ້າ​ໃນ​ໄລຍະ​ຜ່ານ​ມາ. 
9. ສະພາບ​ລວມ​ໃນ​ການ​ພັດທະນາ​ຂະແໜງ​ທໍລະນີ​ສາດ​-​ບໍ່​ແຮ່​ໃນ​ໄລຍະ​ຜ່ານ​ມາ ແລະ ແຜນ​ພັດ​ທະນາ​ໄລຍະ 5 ຫາ 10 ຕໍ່​ໜ້າ. 
   ນອກຈາກ​ນີ້, ພວກ​ເຮົາ​ຍັງ​​ໄດ້​ຄົ້ນຄວ້າ, ປຶກສາ​ຫາລື, ປະກອບ​ຄຳ​ເຫັນ ແລະ ຕົກລົງ​ວຽກງານ​ອື່ນໆ​ອີກ​ຈຳນວນ​ໜຶ່ງ ແລະ ປຶກສາ​ຫາລື ແລະ ຫາ​ມາດ​ຕະການ​ແກ້​ໄຂ​ຂໍ້ຄົງຄ້າງ​ທີ່​ພວກ​ເຮົາ​ບໍ່​ສາມາດ​ປະຕິບັດ​ໄດ້​ໃນ​ໄລຍະ 5 ປີຜ່ານມາ, ເພື່ອ​ສືບຕໍ່​ວາງ​ຍຸດທະສາດ ແລະ ມາດ​ຕະການ​ແກ້​ໄຂ​ໃນຕໍ່ໜ້າ ໃຫ້​ຖືກ​ທິດ ແລະ​ ສືບຕໍ່​ແກ້​ໄຂ​ໃຫ້​ຂາດ​ຕົວ​ໃນ​ແຜນ IX ໄລຍະ 2021-2025.
  (ຂ່າວ​-​ພາບ : ສຸກ​ສາຄອນ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110