ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 6 ກັນຍາຜ່ານມາ, ຢູ່ຮ່າໂນ້ຍ ທ່ານ ຫງວຽນ ຊວນຟຸກ ປະທານປະເທດຫວຽດນາມ ໄດ້ໃຫ້ການຕ້ອນຮັບ ທ່ານ ປຣາເນ່ ກູມາ ເວີມາ ເອກອັກຄະລັດຖະທູດອິນເດຍ ປະຈຳ ຫວຽດນາມ.

ຂ່າວລະບຸວ່າ: ໃນການຕ້ອນຮັບ, ທ່ານ ຫງວຽນຊວນຟຸກ ໄດ້ກ່າວຄຳຂອບໃຈຕໍ່ລັດຖະບານອິນເດຍ ທີ່ໄດ້ມອບເຄື່ອງຜະລິດອົກຊີ, ອຸປະກອນການແພດໃນການຕ້ານພະຍາດ ໂຄວິດ-19 ຢູ່ຫວຽດນາມ. ທ່ານ ຫງວຽນຊວນຟຸກ ຫວັງວ່າ: ລັດຖະບານອິນເດຍ ຈະຊ່ວຍເຫຼືອວັກຊິນປ້ອງກັນພະຍາດ ໂຄວິດ-19, ພ້ອມກັບຢາປິ່ນປົວພະຍາດ ໂຄວິດ-19 ແລະ ວັດຖຸອຸປະກອນການແພດ ເພື່ອຕ້ານພະຍາດ ໂຄວິດ-19 ໃຫ້ແກ່ຫວຽດນາມ. ທ່ານຍັງສະເໜີໃຫ້ ທ່ານເອກອັກຄະລັດຖະທູດອິນເດຍ ສົມທົບກັບບັນດາອົງການທີ່ມີໜ້າທີ່ຮັບຜິດຊອບຂອງຫວຽດນາມ ເພື່ອສືບຕໍ່ຊຸກຍູ້ການພົວພັນລະຫວ່າງສອງປະເທດ, ໃນນັ້ນຄວນຮັກສາບັນດາການຢ້ຽມຢາມຂັ້ນສູງ ແລະ ຂັ້ນຕ່າງໆ, ຊຸກຍູ້ບັນດາຂໍ້ຕົກລົງຮ່ວມມືທີ່ສອງຝ່າຍໄດ້ລົງນາມ.

ທ່ານ ປຣາເນ່ ກູມາ ເວີມາ ເອກອັກຄະລັດຖະທູດອິນເດຍ ປະຈຳ ຫວຽດນາມ ໄດ້ເຫັນດີກັບບັນດາບັນຫາທີ່ທ່ານປະທານປະເທດຫວຽດນາມ ຍົກອອກມາ ແລະ ມີຄວາມຫວັງຢາກເພີ່ມທະວີການຮ່ວມມືສອງຝ່າຍໃນທຸກໆຂົງເຂດ. ທ່ານ ປຣາເນ່ ກູມາ ເວີມາ ໃຫ້ຮູ້ວ່າ: ອິນເດຍ ພ້ອມແລ້ວທີ່ຈະໃຫ້ການຊ່ວຍເຫຼືອຢາປິ່ນປົວ ແລະ ວັກຊິນປ້ອງກັນພະຍາດ ໂຄວິດ-19 ໃຫ້ແກ່ຫວຽດນາມ.