​ເມື່ອບໍ່​ດົນ​ມານີ້, ທ່ານ ນາງ ວົງເດືອນ ວັດຕະໂສ ເຈົ້າເມືອງທຸລະຄົມ ໄດ້ລົງຕິດຕາມການກໍ່ສ້າງຂົວນໍ້າພະນາຍ ບ້ານເກິນກາງ ເມືອງທຸລະຄົມ ແຂວງວຽງຈັນ ໂດຍການເຂົ້າຮ່ວມ ແລະ ລາຍງານຄວາມຄືບໜ້າການກໍ່ສ້າງ ຂອງ ທ່ານ ທອງປະເສີດ ເພັດລາສີ ຮອງຫົວໜ້າຄະນະຮັບຜິດຊອບໂຄງການສ້ອມແປງທາງຫຼວງແຫ່ງຊາດ ເລກທີ 13 ທັງເປັນຄະນະຮັບຜິດຊອບການກໍ່ສ້າງຂົວນໍ້າພະນາຍ (ທາງເລກທີ 10 ກມ 63+400)  ຊຶ່ງທ່ານກ່າວວ່າ: ພາຍຫຼັງມີໜັງສືສັນຍາກໍ່ສ້າງຂົວນໍ້າພະນາຍ ສະບັບເລກທີ VTE05-2021-BM-NR01 ລົງວັນທີ 28 ມິຖຸນາ 2021, ຄະນະຮັບຜິດຊອບການກໍ່ສ້າງໄດ້ສົມທົບກັບ ບໍລິສັດຮັບເໝົາ ຄື: ບໍລິສັດ ມາລີນີ  ຈໍາກັດ ແລະ ຂະແໜງການກ່ຽວຂ້ອງ ວາງແຜນຮີບຮ້ອນຈັດຕັ້ງປະຕິບັດການກໍ່ສ້າງ ໂດຍລຽງລໍາດັບແຕ່ລະໜ້າວຽກທີ່ຮີບດ່ວນ ແລະ ວຽກໃດທີ່ຕ້ອງເຮັດຕາມຫຼັງ ຕາມແບບເຕັກນິກຂອງການອອກແບບທີ່ກົມຂົວທາງ ກະຊວງໂຍທາທິການ ແລະ ຂົນສົ່ງຮັບຮອງ, ແຕ່ເນື່ອງການລົງມືຈັດຕັ້ງປະຕິບັດຕົວຈິງນັ້ນ, ຍັງມີບາງເງື່ອນໄຂ ແລະ ປັດໄຈບາງດ້ານທີ່ຍັງບໍ່ທັນເອື້ອອໍານວຍ ຈຶ່ງມີຄວາມຈໍາເປັນຕ້ອງໄດ້ແກ້ໄຂໄປນໍາ ບວກກັບຄວາມຫຍຸ້ງຍາກໃນການຕອກເສົາເຂັມ, ຮາກຖານຂອງສົ້ນຂົວ ແລະ ອື່ນໆ.

      ໃນໂອກາດນີ້, ທ່ານເຈົ້າເມືອງ ໄດ້ກ່າວວ່າ: ໂດຍລວມແລ້ວທາງການນໍາຂອງເມືອງລ້ວນແລ້ວແຕ່ໄດ້ຊຸກຍູ້ຜັກດັນໃຫ້ການກໍ່ສ້າງຂົວໄປຕາມແບບ, ຕາມເຕັກນິກ ແລະ ຄອງຄອຍໃຫ້ການກໍ່ສ້າງສໍາເລັດໃນເວລາທີ່ກໍານົດໄວ້ ເຊັ່ນດຽວກັບຄວາມເປັນຫ່ວງເປັນໃຍຂອງປະຊາຊົນ ກໍຄືຜູ້ສັນຈອນໄປມາທີ່ຄອງຄອຍ​ຢາກໃຫ້ການ​ກໍໍ່ສ້າງຂົວ​​ໄດ້ສໍາເລັດໃນໄວໆນີ້. ຖ້າຫາກວຽກອັນໃດທີ່ຕິດພັນກັບອົງການປົກຄອງເມືອງ ກໍຈະສືບຕໍ່ໃຫ້ຄວາມຮ່ວມມື, ອໍານວຍຄວາມສະດວກຊ່ວຍຢ່າງເຕັມທີ່ ເພື່ອແກ້ໄຂບັນຫາຮ່ວມກັນຢ່າງສອດຄ່ອງ, ສໍາລັບສາເຫດທີ່ການກໍ່ສ້າງມີລັກສະນະຊັກຊ້າ ທາງບໍລິສັດຮັບເໝົາ ແລະ ຄະນະຊີ້ນໍາໂຄງການກໍໄດ້ລາຍງານໃຫ້ທາງເມືອງຮັບຮູ້ນໍາເປັນປົກກະຕິແລ້ວ, ແຕ່ເຖິງຢ່າງໃດກໍຕາມຂໍຮຽກຮ້ອງມາຍັງຄະນະຮັບຜິດຊອບການກໍ່ສ້າງ ເອົາໃຈໃສ່ສົມທົບກັບບໍລິສັດຮັບເໝົາ, ກົມຂົວທາງ ແລະ ພາກສ່ວນກ່ຽວຂ້ອງຕື່ມ ເພື່ອໃຫ້ຮີບຮ້ອນເລັ່ງມືຈັດຕັ້ງປະຕິບັດທຸກໜ້າວຽກທີ່ວາງໄວ້ໃຫ້ໄປຕາມລະບົບຢ່າງຖືກຕ້ອງ ທັງໃຫ້ມີຄວາມຮັບປະກັນດ້ານຄຸນນະພາບ ຫຼື ຖ້າຫາກມີບັນຫາໃດຫຍຸ້ງຍາກ  ຕິດພັນກ່ຽວຂ້ອງກັບເບື້ອງອົງການປົກຄອງເມືອງ ກໍຍິນດີໃຫ້ຄວາມຮ່ວມມືອໍານວຍຄວາມສະດວກໃຫ້ຢ່າງສຸດຄວາມສາມາດ.

(ຂ່າວ: ຫ້ອງການ ຖວທ ເມືອງທຸລະຄົມ).