​ເມື່ອບໍ່​ດົນ​ມານີ້, ພະອາຈານ ສຸນິກອນ ຈະເລີນສຸກ ເຈົ້າອາວາດວັດດອນໜູນ ເມືອງໄຊທານີ ນະຄອນຫຼວງວຽງຈັນ ພ້ອມຄະນະ ໄດ້ນຳເອົາອຸປະກອນການຮຽນ-ການສອນ ແລະ ເຄື່ອງໃຊ້ຫ້ອງການ ມອບໃຫ້ແກ່ໂຮງຮຽນ ມ.ຕົ້ນສົງເມືອງຫົງສາ ແຂວງໄຊຍະບູລີ ທີ່ໂຮງຮຽນແຫ່ງດັ່ງກ່າວ. ໂດຍກ່າວຕ້ອນຮັບຂອງ ພະອາຈານ ສົມພອນ ຄຳຈະເລີນ ເຈົ້າຄະນະເມືອງ ຜູ້ອຳນວຍການ ໂຮງຮຽນ ມ.ຕົ້ນສົງເມືອງຫົງສາ ພ້ອມດ້ວຍຄະນະ, ມີຕາງໜ້າຫ້ອງການສຶກສາທິການ ແລະ ກິລາເຂົ້າຮ່ວມ.

ຈຸດປະສົງ ເພື່ອຊ່ວຍພັດທະນາການສຶກສາຂອງສາມະເນນ ໃຫ້ມີ​ການພັດທະນາການຮຽນຮູ້ຂອງເຂົາເຈົ້າໃຫ້ນັບມື້ນັບດີຂຶ້ນເລື້ອຍໆ. ຈາກນັ້ນ, ພະອາຈານ ສົມພອນ ຄຳຈະເລີນ ​ໄດ້ຕາງໜ້າໃຫ້ຜູ້ປົກຄອງ ແລະ ນັກຮຽນທັງໝົດ ໄດ້ສະແດງຄວາມຂອບໃຈ ແລະ ຮູ້ບຸນຄຸນມາຍັງ ພະອາຈານ ສຸນິກອນ ຈະເລີນສຸກ ທີ່ໄດ້ລະດົມອຸປະກອນການຮຽນ-ການສອນມາໃຫ້ ແລະ ຈະເລີນພອນຕໍ່ຜູ້ທີ່ຮ່ວມປະກອບສ່ວນຊ່ວຍເຫຼືອແບ່ງເບົາອຸປະກອນການຮຽນ-ການສອນໃນຄັ້ງນີ້ ແລະ ໃຫ້ຄຳໝັ້ນສັນຍາວ່າ: ຈະແຈກຢາຍອຸປະກອນການຮຽນ-ການສອນ ໃຫ້ນັກຮຽນຢ່າງທົ່ວເຖິງ ແລະ ໃຫ້ເກີດຜົນປະໂຫຍດສູງສຸດຕື່ມອີກ.

ອຸປະກອນທີ່ນຳມາມອບໃນຄັ້ງນີ້, ປະກອບມີ: ເຈ້ຍ A4 ຈຳນວນ 5 ແກັດ, ປຶ້ມຂຽນ 25 ມັດ, ສໍດໍາ 10 ກັບ, ຢາງລຶບ 2 ກັບ, ບັນທັດ 10 ກັບ, ໂຮງແຫຼມສໍ 2 ກັບ ແລະ ບິກ 7 ກັບ ລວມມູນຄ່າທັງໝົດ 2 ລ້ານ 5 ແສນກວ່າກີບ.

(ພາບ-ຂ່າວ: ກິດຕິສັກ ບົວໄລ)