ທ່ານ ໄພ​ວີ ສີ​ບົວ​ລິ​ພາ ລັດ​ຖະ​ມົນ​ຕີ​ກະ​ຊວງ​ຍຸ​ຕິ​ທຳ ​ໄດ້​ຕ້ອນ​ຮັບ​ການ​ເຂົ້າ​ຢ້ຽມ​ຂ່ຳ​ນັບ​ຂອງ​ທ່ານ ນາງ  ເພຍ​ຣີ​ແບນ​ໂລ ບ​ຣິດ​ໂຕ ຜູ້​ຕາງ​ໜ້າ​ອົງ​ການ​ອຸຍ​ນີ​ເຊັບ  (UNICEF)  ປະ​ຈຳ​ລາວ ໃນ​ວັນ​ທີ 9 ກັນ​ຍານີ້ ​ທີ່​ກະ​ຊວງ​ດັ່ງ​ກ່າວ.  ໃນ​ໂອ​ກາດ​ດັ່ງ​ກ່າວ​ທ່ານລັດ​ຖະ​ມົນ​ຕີກະ​ຊວງ​ຍຸ​ຕິ​ທຳ​ ໄດ້​ສະ​ແດງ​ຄວາມ​ຍິນ​ດີ​ຕ້ອນ​ຮັບ ແລະ ຕີ​ລາ​ຄາ​ສູງ​ຕໍ່​ຜູ້​ຕາງ​ໜ້າ​ອົງ​ການ​ອຸຍ​ນີ​ເຊັບ​ ປະ​ຈຳລາວ ​ທີ່​ໄດ້​ມາ​ສະ​ແດງ​ຄວາມ​ຍິນ​ດີ​ຕໍ່​ການ​ຮັບ​ໜ້າ​ທີ່​ເປັນ​ລັດ​ຖະ​ມົນ​ຕີ​ຄົນ​ໃໝ່ກະ​ຊວງ​ຍຸ​ຕິ​ທຳ ຊຶ່ງ​ເປັນ​ການ​ຮັດ​ແໜ້ນ​ສາຍ​ພົວ​ພັນ​ຮ່ວມ​ມື​ທີ່​ດີ​ລະ​ຫວ່າງ ກະ​ຊວງ​ຍຸ​ຕິ​ທຳ ແລະ ອົງ​ການ​ອຸຍ​ນີ​ເຊັບ ​ທີ່​ມີ​ມາ​ແລ້ວນັ້ນ​ໃຫ້​ນັບ​ມື້​ເພີ່ມ​ພູນ​ຄູນ​ສ້າງ​ຂຶ້ນ​ໄປ​ເລື້ອຍໆ.

ໃນ​ປີ 2021 ກະ​ຊວງ​ຍຸ​ຕິ​ທຳ​ ໄດ້​ຮັບ​ງົບ​ປະ​ມານ​ຊ່ວຍ​ເຫຼືອ​ຈາກລັດຖະບານຝຣັ່ງ​ຜ່ານ​ລະ​ບົບ​ບໍ​ລິ​ຫານ ອຸຍ​ນີ​ເຊັບ (UNICEF) ​ມູນ​ຄ່າ 15.000 ໂດ​ລາ ​ເພື່ອ​ສຸມ​ໃສ່​ປະ​ຕິ​ບັດ 3 ກິດ​ຈະ​ກຳ​ໃນ​ການ​ເຜີຍ​ແຜ່​ດຳ​ລັດ​ວ່າ​ດ້ວຍ​ການ​ເອົາ​ເດັກ​ໄປເ​ປັນ​ລູກ​ລ້ຽງ​ຢູ່​ແຂວງວຽງ​ຈັນ, ໄຊ​ຍະ​ບູ​ລີ ແລະ ຫຼວງ​ພະ​ບາງ ກິດ​ຈະ​ກຳ​ດັ່ງ​ກ່າວ​ສຳ​ເລັດ​ລົງ​ໃນ​ທ້າຍ​ເດືອນ​ສິງ​ຫາ 2021 ຜ່ານ​ມາ. ດັ່ງ​ນັ້ນ​ ກະຊວງຍຸຕິທຳຮຽກຮ້ອງມາຍັງ ອົງການອຸຍນີເຊັບຈົ່ງສືບຕໍ່ໃຫ້ການສະໜັບສະໜູນດ້ານເຕັກນິກ ວິຊາກການ ແລະ ງົບປະມານເຂົ້າໃນການຊ່ວຍເຫຼືອ ແລະ ປົກປ້ອງເດັກເປັນຕົ້ນແມ່ນການໂຄສະນາວຽກງານການເອົາເດັກໄປເປັນລູກລ້ຽງໃຫ້ແກ່ຄະນະຮັບຜິດຊອບພິຈາລະນາການເອົາເດັກມາເປັນລູກລ້ຽງ ຂັ້ນແຂວງ, ຂັ້ນເມືອງ ທີ່ຍັງບໍ່ໄດ້ຜ່ານການໂຄສະນາເຜີຍແຜ່ ແລະ ການຝຶກອົບຮົມເທື່ອ ແລະ ຊຸກຍູ້ວຽກງານການໄກ່ເກ່ຍຄະດີເດັກຂັ້ນບ້ານ ແລະ ວຽກງານປົກປ້ອງແກ້ໄຂການກະທຳຜິດຂອງເດັກໂດຍບໍ່ໃຫ້ສານຕັດສິນ, ເພື່ອໃຫ້ສາມາດຂະຫຍາຍໂຄງ ການທົດລອງໄປອີກ 3 ແຂວງທີ່ມີການກະທຳຜິດຂອງເດັກເກີດຂຶ້ນຫຼາຍ.

ອົງການອຸຍນີເຊັບ ຫຼື ອົງການສະຫະປະຊາຊາດກອງທຶນສຳລັບເດັກ ແມ່ນອົງການຈັດຕັ້ງສາກົນໃນ ສປປ ລາວ ໄດ້ໃຫ້ການປະກອບສ່ວນອັນໃຫຍ່ຫຼວງແກ່ ສປປ ລາວ ຢ່າງຕໍ່ເນື່ອງ. ເພື່ອຮັບປະກັນວຽກງານການສົ່ງເສີມ ແລະ ປົກປ້ອງສິດທິຂອງເດັກ ແລະ ແມ່ຍິງໃຫ້ມີປະສິດທິພາບຄຽງຄູ່ກັບແຜນພັດທະນາເສດຖະກິດ-ສັງຄົມ ໃນແຕ່ລະໄລຍະ ​ໂດຍ​ສະ​ເພາະ 17 ເປົ້າໝາຍການພັດທະນາແບບຍືນຍົງ (SDG) ຂອງ ສປປ ລາວ ຮອດປີ 2030.    ຂ່າວ-ພາບ: ບຸນ​ອູ້ມ