ກອງ​ປະຊຸມ​ຄົບ​ຄະນະບໍລິຫານ​ງານ​ພັກ​​ເມືອງໄຊຍະບູລີ ແຂວງໄຊຍະບູລີ ຄັ້ງທີ 6 ສະ​ໄໝ​ທີ IX ໄດ້ສຳເລັດລົງໃນວັນທີ 9 ກັນຍາຜ່ານ​ມານີ້ ທີ່ຫ້ອງປະຊຸມຫ້ອງວ່າການເມືອງ ໂດຍການເປັນປະທານ ຂອງ ສະຫາຍ ບຸນແທນ ທີແກ້ວ ກຳມະການພັກແຂວງ ເລຂາພັກເມືອງ ເຈົ້າເມືອງໄຊຍະບູລີ ໃຫ້ກຽດເຂົ້າຮ່ວມຂອງ ສະຫາຍ ດວງຕາ ໄຊວຸດ ຮອງເລຂາພັກແຂວງ, ມີຄະນະປະຈໍາພັກເມືອງ, ກຳມະການພັກເມືອງ, ຫົວໜ້າຫ້ອງການຂອງເມືອງ, ເລຂາຄະນະພັກຮາກຖານເຂົ້າຮ່ວມ.

ກອງປະຊຸມຄົບ​ຄະນະບໍລິຫານ​ງານ​ພັກ​​ເມືອງໄຊຍະບູລີ ຄັ້ງທີ 6 ສະ​ໄໝ​ທີ IX ໃນຄັ້ງນີ້ແມ່ນໄດ້ຮັບຟັງການເຜີຍແຜ່ມະຕິກອງປະຊຸມຄົບຄະນະສະໄໝວິສາມັນ ຂອງຄະນະບໍລິຫານງານສູນກາງພັກ ສະໄໝທີ XI, ເຜີຍແຜ່ຄໍາສັ່ງຂອງກົມການເມືອງສູນກາງພັກ ເລກທີ 01/ກມສພ, ລົງວັນທີ 26 ກໍລະກົດ 2021 ວ່າດ້ວຍການເພີ່ມທະວີນຳພາ-ຊີ້ນຳ ຂອງຄະນະພັກແຕ່ລະຂັ້ນ ໃນການຈັດຕັ້ງປະຕິບັດ ມາດຕະການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ຄໍາສັ່ງຂອງກົມການເມືອງ ເລກທີ 02/ກມສພ, ລົງວັນທີ 26 ກໍລະກົດ 2021 ວ່າດ້ວຍການເພີ່ມທະວີນໍາພາ-ຊີ້ນໍາ ຂອງຄະນະພັກແຕ່ລະຂັ້ນ ຕໍ່ການຕ້ານສະກັດກັ້ນ ແລະ ແກ້ໄຂບັນຫາຢາເສບຕິດ, ເອກະສານຄໍາແນະນໍາຂອງຄະນະຈັດຕັ້ງສູນກາງພັກ ເລກທີ 102/ຄຈສພ ລົງວັນທີ 24 ມິຖຸນາ 2021 ກ່ຽວກັບການຈັດຕັ້ງປະຕິບັດກົດລະບຽບພັກປະຊາຊົນ ປະຕິວັດລາວ ສະໄໝທີ XI ແລະ ຮັບຟັງການຜ່ານມະຕິຕົກລົງ ວ່າດ້ວຍການແບ່ງຄວາມຮັບຜິດຊອບ ພາຍໃນຄະນະບໍລິຫານງານພັກເມືອງໄຊຍະບູລີ ສະໄໝທີ IX ຄືນໃໝ່, ຮັບຟັງການຜ່ານບົດສະຫຼຸບຕີລາຄາການຈັດຕັ້ງປະຕິບັດການນໍາພາວຽກງານຮອບດ້ານ 6 ເດືອນຕົ້ນປີ ແລະ ທິດທາງແຜນການວຽກຈຸດສຸມ 6 ເດືອນ ທ້າຍປີ 2021 ພ້ອມນີ້ກອງປະຊຸມຍັງໄດ້ຮັບຟັງການປະກອບຄໍາເຫັນຈາກບັນດາຫ້ອງການ, ອົງການ, ກົມກອງຂອງເມືອງກ່ຽວກັບການຈັດຕັ້ງປະຕິບັດວຽກງານຂອງຕົນໂດຍຍົກໃຫ້ເຫັນຜົນງານດ້ານດີທີ່ຈະຕ້ອງສືບຕໍ່ເສີມຂະຫຍາຍ, ຈຸດອ່ອນຂໍ້ຄົງຄ້າງທີ່ຈະຕ້ອງພ້ອມກັນປັບປຸງແກ້ໄຂໃຫ້ດີຂຶ້ນ.

ຕອນທ້າຍກອງປະຊຸມສະຫາຍຮອງເລຂາພັກແຂວງໄຊຍະບູລີ ກໍໄດ້ໃຫ້ກຽດໂອ້ລົມຊຶ່ງກ່ອນໝົດສະຫາຍໄດ້ຍ້ອງຍໍຊົມເຊີຍຕໍ່ຜົນງານອົງຄະນະພັກເມືອງໄຊຍະບູລີຍາດມາໄດ້ ພ້ອມນີ້ສະຫາຍກໍໄດ້ເນັ້ນໜັກໃຫ້ອົງຄະນະພັກເມືອງໄຊຍະບູລີ ແລະ ຄະນະນໍາທຸກຂະແໜງການເວົ້າລວມເວົ້າສະເພາະແມ່ນຄະນະບໍລິຫານພັກເມືອງ ແລະ ຄະນະພັກທຸກສະຫາຍ ຈົ່ງຍົກສູງຄວາມຮັບຜິດຊອບຂອງຕົນຕໍ່ການເຮັດໜ້າທີ່ການເມືອງ-ແນວຄິດເປັນວຽກຕົ້ນຕໍຢູ່ແຖວໜ້າທີ່ຕ້ອງໄດ້ເຮັດປົກກະຕິ, ຕໍ່ເນື່ອງ, ຍາວນານ ແລະ ສອດຮ້ອຍໄປທຸກຂົງເຂດວຽກງານ, ເອົາໃຈໃສ່ຊີ້ນໍາ-ນໍາວຽກງານປ້ອງກັນຊາດ-ປ້ອງກັນຄວາມສະຫງົບປະຊາຊົນ ເດັດຂາດ, ໂດຍກົງ, ຮອບດ້ານ ແລະ ຕ້ອງປະຕິບັດຢ່າງເປັນປະຈໍາ, ສຸມໃສ່ການນໍາພາການພັດທະນາເສດຖະກິດເປັນວຽກງານໃຈກາງຂອງການພັດທະນາ, ສິ່ງສໍາຄັນແມ່ນເອົາໃຈໃສ່ແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ສືບຕໍ່ຄຸ້ມຄອງ ແລະ ພັດທະນາວຽກງານວັດທະນາທໍາ-ສັງຄົມ ໂດຍສະເພາະແມ່ນການປະຕິບັດເປົ້າ   ໝາຍການພັດທະນາແບບຍືນຍົງຂົງເຂດສຶກສາ 15 ຕົວຊີ້ວັດ, ສາທາລະນະສຸກ 10 ຕົວຊີ້ວັດ ໃຫ້ສືບຕໍ່ພັດທະນາບັນລຸເປົ້າໝາຍທີ່ວາງໄວ້ ແລະ ມີຄວາມຍືນຍົງ, ຄະນະພັກທຸກຂັ້ນຕ້ອງຖືສໍາຄັນ ແລະ ມີຄວາມຮັບຜິດຊອບໃນການກໍ່ສ້າງພັກ-ພະນັກງານ ຊຶ່ງວຽກງານດັ່ງກ່າວແມ່ນຄວາມຮັບຜິດຊອບຂອງຕົນເອງ ເປັນຕົ້ນແມ່ນການສືບຕໍ່ແຜນການກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນດ້ານການເມືອງ-ແນວຄິດ, ການຈັດຕັ້ງ, ແບບແຜນວິທີເຮັດວຽກໃຫ້ບັນລຸຕາມຄາດໝາຍທີ່ວາງໄວ້, ທຸກໆປີຮອດເດືອນ 11 ຕ້ອງໄດ້ປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ, ສືບຕໍ່ຫັນລົງກໍ່ສ້າງຮາກຖານການເມືອງ,  ສືບຕໍ່ນໍາພາອົງການແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນໃນການຍູ້ຂະບວນການດ້ານຕ່າງໆຂອງອົງການຈັດຕັ້ງຂອງຕົນໃນການຫັນເອົາແນວທາງ, ນະໂຍບາຍ, ມະຕິ, ຄໍາສັ່ງຂອງພັກເປັນອັນລະອຽດ ເພື່ອຈັດຕັ້ງປະຕິບັດຢູ່ຮາກຖານໃຫ້ເປັນຂະບວນ ແລະ ເປັນຮູບປະທໍາ.

ຂ່າວ-ພາບ: ສົມພົງ ສີສະຫວັດ