3 ໜ່ວຍພັກ ທີ່ຂຶ້ນກັບໜ່ວຍພັກຮາກຖານ ກອງບັນຊາການ ປກສ ເມືອງລະມາມ ແຂວງ​ເຊກອງ ຄື: ໜ່ວຍພັກພະແນກຕຳຫຼວດ, ໜ່ວຍພັກພະແນກສັນຕິບານ ແລະ ໜ່ວຍພັກພະແນກຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ໄດ້ຈັດພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020 ຂຶ້ນໃນ​ທ້າຍ​ອາ​ທິດ​ຜ່ານ​ມາ ທີ່ຫ້ອງປະຊຸມຫ້ອງການດັ່ງກ່າວ ໂດຍໃຫ້ກຽດເຂົ້າຮ່ວມເປັນປະທານຂອງ ສະ​ຫາຍ ວົງເດືອນ ຈັນທະບຸດຊຽງ ກຳມະການພັກແຂວງ ເລຂາພັກເມືອງ ເຈົ້າເມືອງໆລະມາມ ປະທານຊີ້ນຳວຽກງານ ປກຊ-ປກສ ຂັ້ນເມືອງ, ມີຄະນະໜ່ວຍພັກ, ຄະນະຈັດຕັ້ງເມືອງ ພ້ອມດ້ວຍສະມາຊິກພັກເຂົ້າຮ່ວມ.

   ສະ​ຫາຍ ສົມເດດ ສາລີໂພດ ຮອງຫົວໜ້າຄະນະຈັດຕັ້ງເມືອງ ໄດ້ຂຶ້ນຜ່ານມະຕິຕົກລົງຂອງຄະນະປະຈຳພັກແຂວງ ເລກທີ 143/ຄຈພຂ.ຊກ, ລົງວັນທີ 17/2/2021, ວ່າດ້ວຍຮັບຮອງເອົາໜ່ວຍພັກພະແນກຕຳຫຼວດ, ພະແນກສັນຕິບານ, ພະແນກຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ທີ່ຂຶ້ນກັບຄະນະພັກຮາກຖານກອງບັນຊາການ ປກສ ເມືອງລະມາມ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020 ແລະ ຮັບຮອງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປິ 2021.

    ໂອກາດນີ້, ສະ​ຫາຍເລຂາພັກເມືອງ ໄດ້ເນັ້ນໃຫ້ຄະນະພັກ, ສະມາຊິກພັກ ພະນັກງານນັກຮົບ ຈົ່ງພ້ອມກັນສືບຕໍ່ເອົາໃຈໃສ່ຊີ້ນຳໆພາວຽກງານການເມືອງ-ແນວຄິດໃຫ້ມີຄວາມໜັກແໜ້ນ ເຂັ້ມແຂງກວ່າເກົ່າ, ເພີ່ມທະວີຄວາມສາມັກຄີພາຍໃນ-ພາຍນອກ ຢ່າງໜັກແໜ້ນກວ້າງຂວາງ, ມີຄວາມເປັນເອກະພາບສູງພາຍໃນພັກ, ມີຄວາມຕັດສິນໃຈ, ມີນ້ຳໃຈບຸກບືນສູ້ຊົນໃນການຈັດຕັ້ງປະຕິບັດໜ້າທີ່ວຽກງານໃຫ້ໄດ້ຮັບຜົນສຳເລັດ ພ້ອມກັນສືບຕໍ່ຮັກສາມູນເຊື້ອການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໄວ້ໃຫ້ໝັ້ນຄົງຕະຫຼອດໄປ.

(ຂ່າວ-ພາບ: ດາວສະຫວັນ).