ກອງປະຊຸມໃຫຍ່ຄັ້ງທີ VI ຂອງໜ່ວຍພັກພະແນກບໍລິຫານ-ສັງລວມ ກອງພັນໃຫຍ່ 201 ໃນກອງພົນທີ 2 ເມື່ອບໍ່​ດົນ​ມານີ້, ທີ່ກອງ​ພັນ​ດັ່ງ​ກ່າວ, ໂດຍການເປັນປະທານຂອງສະຫາຍ ພັນໂທ ອ່ອນ ທັດສະນະວັນ ເລຂາໜ່ວຍພັກ ຫົວໜ້າພະແນກບໍລິຫານ-ສັງລວມ, ໃຫ້ກຽດເຂົ້າຮ່ວມຂອງສະຫາຍ ພັນເອກ ບຸນພົບ ວິໄລສັກ ຄະນະພັກກອງພົນ ເລຂາຄະນະພັກ ຫົວໜ້າການເມືອງກອງພັນໃຫ່ຍ 201, ມີຄະນະໜ່ວຍພັກ ແລະ ສະມາຊິກພັກ ພ້ອມດ້ວຍແຂກຖືກເຊີນເຂົ້າຮ່ວມ.

      ໃນກອງປະຍັງໄດ້ຮັບຟັງບົດລາຍງານການເມືອງທັງສອງພາກ ຊຶ່ງສະເໜີໂດຍສະຫາຍ ພັນໂທ ອ່ອນ ທັດສະນະວັນ. ຕະຫຼອດໄລຍະ 5 ປີ ຜ່ານມາ ເຫັນໄດ້ວ່າໜ່ວຍພັກພະແນກບໍລິຫານ-ສັງລວມເປັນໝວ່ຍພັກໜຶ່ງເຮັດໜ້າທີ່ວຽກງານໂດຍກົງໃຫ້ກອງພັນໃຫຍ່ 201,  ຍາມໃດຄະນະໜ່ວຍພັກກໍໄດ້ເອົາໃຈໃສ່ວຽກງານສຶກສາອົບຮົມການເມືອງນຳພາແນວຄິດໃຫ້ພະນັກງານ-ສະມາຊິກພັກ, ດຳເນີນຊິວິດການເມືອງ ປະຈຳອາທິດ, ປະຈຳເດືອນ ບໍ່ໃຫ້ຂາດ, ຖືເອົາການຕຳນິຕິຊົມເຊິ່ງກັນ ແລະ ກັນ ເພື່ອເສີມຂະຫຍາຍຈຸດດີແກ້ໄຂຈຸດອ່ອນຂອງຕົນໃຫ້ດີ​ຂຶ້ນ,  ເຮັດໃຫ້ກົມກອງມີຄວາມສະຫງົບ, ເປັນລະບຽບຮຽບຮ້ອຍ, ຄຽງຄູ່ກັບການປັບປຸງກໍ່ສ້າງກຳລັງ, ເຮັດໃຫ້ໜວ່ຍພັກມີຄວາມເຂັ້ມແຂງຂຶ້ນເລື່ອຍໆ. ໃນນັ້ນ, ສະມາຊິກພັກຍັງໄດ້ປະກອບຄຳຄິດຄຳເຫັນໃສ່ບົດລາຍງານການເມືອງຢ່າງກົງໄປ ກົງມາ, ເຮັດໃຫ້ບົດລາຍງານຄັ້ງນີ້ມີຄວາມສົມບູນ.

      ໃນກອງປະຊຸມຍັງ​ໄດ້​ປ່ອນ​ບັດ​ເລືອກ​ເອົາ​ຄະ​ນະ​ພັກ​ຊຸດ​ໃໝ໋, ຊຶ່ງ​ມີຜູ້ຮັບສະໝັກເລືອກ 5 ສະຫາຍ, ເລືອກໄດ້ 3 ສະຫາຍ ແລະ ກອງ​ປະ​ຊຸມ​ຄັ້ງ​ປະ​ຖົມ​ມະ​​ລຶກໄດ້​ເລືອກ​ເອົາສະຫາຍ ພັນໂທ ອ່ອນ ທັດສະນະວັນ ເປັນເລຂາ, ເລືອກ​ເອົາສະຫາຍ ພັນໂທ ຄຳງ່າ ແກ້ວສີປະເສີດ ເປັນຮອງເລຂາ ແລະ  ສະຫາຍ ພັນໂທ ໄຊພອນ ສີປະເສີດ ເປັນກຳມະການ

        ໃນຕອນທ້າຍຂອງກອງປະຊຸມຍັງໄດ້ຮັບການໂອ້ລົມຂອງສະຫາຍ ພັນເອກ ບຸນພົບ ວິໄລສັກ ໄດ້ເນັ້ນໜັກໃຫ້ ຄະນະໜວ່ຍພັກຊຸດໃໝ່ຈົ່ງພ້ອມກັນເອົາໃຈໃສ່ວຽກງານວິຊາສະເພາະຂອງຕົນ ແລະ ເຮັດສຳເລັດໜ້າທີ່ ທີ່ຖືກມອບໝາຍ, ຕັ້ງໜ້າສຶກສາອົບຮົມການເມືອງນຳພາແນວຄິດໃຫ້ພະນັກງານ-ສະມາຊິກພັກຢູ່ພາຍໃນກົມກອງຂອງຕົນ, ສ້າງໃຫ້ໄດ້ໜວ່ຍພັກປອດໃສ ເຂັ້ມແຂງ ແລະ ໜັກ​ແໜ້ນ.

(ຂ່າວ-ພາບ : ເກດ ອານຸສອນ, ນັກຂ່າວກອງພັນໃຫ່ຍ201)