ວັນທີ 25 ຕຸລາ 2021 ທີ່ສະພາແຫ່ງຊາດ ໄດ້ຈັດກອງປະຊຸມຄົບຄະນະກໍາມາທິການຍຸຕິທໍາ ປະຈໍາປີ 2021 ຜ່ານທາງລະບົບກອງປະຊຸມທາງໄກ ໂດຍການເປັນປະທານຂອງ ທ່ານ ສີສູນທອນ ສໍພາບມີໄຊ ຮອງປະທານກໍາມາທິການຍຸຕິທຳ ສະພາແຫ່ງຊາດ ຊຶ່ງມີ  ທ່ານ ບຸນທັນ ບຸນທະວິໄລ ຮອງຫົວໜ້າອົງການໄອຍະການປະຊາຊົນສູງສຸດ (ອອປສ) ພ້ອມດ້ວຍຕາງໜ້າຈາກພາກສ່ວນກ່ຽວເຂົ້າຮ່ວມ.

ກອງປະຊຸມໃນຄັ້ງນີ້, ເພື່ອເປັນການສະຫຼຸບຕີລາຄາການຈັດຕັ້ງປະຕິບັດພາລະບົດບາດການເປັນເສນາທິການໃຫ້ແກ່ສະພາແຫ່ງຊາດ, ການຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ຂອງອົງການລັດທີ່ກ່ຽວຂ້ອງ; ກອງປະຊຸມໄດ້ຮັບຟັງບົດສະຫຼຸບການເຄື່ອນໄຫວວຽກງານປະຈຳປີ 2021 ແລະ ທິດທາງແຜນການວຽກງານຈຸດສຸມ ປີ 2022 ຂອງກໍາມາທິການຍຸຕິທໍາສະພາແຫ່ງຊາດ; ບົດລາຍງານການເຄື່ອນໄຫວວຽກງານປະຈໍາປີ ຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ປະຈຳປີ 2021 ແລະ ແຜນການ ປີ 2022; ບົດປະກອບຄໍາເຫັນຂອງທ່ານປະທານກໍາມາທິການຍຸຕິທໍາຕໍ່ກັບບົດລາຍງານການເຄື່ອນໄຫວປະຈໍາປີ ຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ; ຮ່າງມະຕິ ວ່າດ້ວຍການຮັບຮອງເອົາບົດລາຍງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ; ຮ່າງມະຕິ ກອງປະຊຸມຄົບຄະນະຄະນະ ຂອງກຳມາທິການຍຸຕິທຳສະພາແຫ່ງຊາດ. ນອກຈາກນັ້ນ, ບັນດາທ່ານສະມາຊິກສະພາແຫ່ງຊາດທີ່ເຂົ້າຮ່ວມກອງປະຊຸມຍັງໄດ້ສຸມສະຕິປັນຍາເຂົ້າໃນການປະກອບຄໍາຄິດຄໍາເຫັນໃສ່ບົດລາຍງານຕ່າງໆ ເພື່ອເຮັດໃຫ້ເນື້ອໃນຄົບຖ້ວນ ແລະ ສົມບູນ.

ກອງປະຊຸມຍັງໄດ້ຮັບຟັງການໂອ້ລົມ ຈາກ ທ່ານ ຈະເລີນ ເຢຍປາວເຮີ ຮອງປະທານຄະນະປະຈໍາສະພາແຫ່ງຊາດ ທ່ານໄດ້ສະແດງຄວາມຍ້ອງຍໍຊົມເຊີຍ ແລະ ໄດ້ເນັ້ນໜັກໃຫ້ກຳມາທິຍຸຕິທຳ  ສືບຕໍ່ຮັກສາຜົນງານດ້ານດີ ເພື່ອຜັນຂະຫຍາຍຕໍ່ໄປ ແລະ ປັບປຸງແກ້ໄຂບັນຫາຈຸດອ່ອນຄົງຄ້າງໃຫ້ດີຂຶ້ນ ໃນການປະຕິບັດພາລະບົດບາດການເປັນເສນາທິການໃຫ້ແກ່ສະພາແຫ່ງຊາດ ຕໍ່ວຽກງານຍຸຕິທຳ ກໍຄືການຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍຂອງພາກສ່ວນຕ່າງໆທີ່ກ່ຽວຂ້ອງ.  (ຂ່າວ-ພາບ: ຈະເລີນສິນ)