ໃນວັນ​ທີ 2 ພະ​ຈິກນີ້ ທີ່​ຫໍສະ​ພາ​ແຫ່ງ​ຊາດນະຄອນຫຼວງວຽງຈັນ, ການ​ດຳ​ເນີ​ນກອງ​ປະ​ຊຸມ​ສະ​ໄໝ​ສາ​ມັນ​ເທື່ອ​ທີ 2 ຂອງ​ສະ​ພາ​ແຫ່ງ​ຊາດ ຊຸດ​ທີ IX ໄດ້​ດຳ​ເນີນ​ເປັນ​ມື້​ທີ 2 ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໃນ​ຮູບ​ແບບ​ທາງ​ໄກ, ບັນດາສະມາຊິກສະພາແຫ່ງຊາດຈາກເຂດເລືອກຕັ້ງຕ່າງໆໄດ້ສືບຕໍ່ປະກອບຄຳເຫັນຕໍ່ບົດລາຍງານຂອງລັດຖະບານກ່ຽວກັບແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດດ້ວຍຄວາມຮັບຜິດຊອບສູງ ຕາມການເຈາະຈີ້ມ ແລະ ໃຫ້ທິດຊີ້ນໍາຂອງປະທານກອງປະຊຸມ ເປັນຕົ້ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປະຈໍາປີ 2021, ທິດທາງແຜນການປີ 2022 ໂດຍສຸມໃສ່ຂົງເຂດແຜນການ ແລະ ການລົງທຶນ, ຂົງເຂດວັດທະນະທຳ-ສັງຄົມ ທີ່ພວມພົ້ນເດັ່ນໃນປັດຈຸບັນເຊັ່ນ: ຄາດໝາຍສູ້ຊົນຂອງຂະແໜງການສຶກສາ, ສາທາລະນະສຸກ, ອັດຕາການວ່າງງານ ແລະ ການແກ້ໄຂໄພວ່າງງານລວມທັງບັນຫາອື່ນໆ.

 ໃນນັ້ນ, ທ່ານ ສຸ​ວັນ​ນີ ໄຊ​ຊ​ະນະ ສ​ສ​ຊ​ ປະ​ຈຳ​ເຂດ​ເລືອກ​ຕັ້ງ​ 11 ແຂວງບໍລິຄຳໄຊ ກໍໄດ້ຍົກໃຫ້ເຫັນ ການພັດທະນາຊົນນະບົດລຶບລ້າງຄວາມທຸກຍາກຢູ່ພາຍໃນແຂວງ ຕາມການລາຍງານຂອງລັດຖະບານໃນວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ປີ 2021 ໄດ້ສຸມທຶນເຂົ້າໃນບັນດາໂຄງການດັ່ງກ່າວ ໂດຍສ່ວນໃຫຍ່ແມ່ນໂຄງການເດີມ ຊຶ່ງບໍ່ສາມາດສ້າງເປັນໂຄງການໃໝ່ໃນການພັດທະນາຊົນນະບົດໃນຄວາມເປັນຈິງງົບດັ່ງກ່າວທັງຈຳກັດ ທັງເນັ້ນໃສ່ການສຳລະໂຄງການທີ່ປະຕິບັດສໍາເລັດ ແລະ ກຳລັງປະຕິບັດຢູ່ ສະນັ້ນໃນຫຼາຍປີຜ່ານມາບວກໃສ່ຜົນກະທົບທາງທຳມະຊາດຈຶ່ງເຮັດໃຫ້ຊົນນະບົດກໍຍັງເປັນຊົນນະບົດຄືເກົ່າ ຫຼາຍບ້ານ ຫຼາຍເມືອງ ກໍຍັງບໍ່ທັນສາມາດບັນລຸເງື່ອນໄຂພົ້ນທຸກໄດ້. ສຳລັບແຂວງບໍລິຄຳໄຊ ແມ່ນເມືອງໄຊຈຳພອນ ຍັງເປັນເມືອງທຸກຍາກ. ທາງແຂວງໄດ້ມີຄວາມພະຍາມຍາມສູງເພື່ອນຳເອົາເມືອງດັ່ງກ່າວຫຼຸດພົ້ນຈາກຄວາມທຸກຍາກ ຊຶ່ງມີປະຊາຊົນສິບພັນກວ່າຄົນ ທັງເປັນເຂດພື້ນຖານການປະຕິວັດ ທັງເປັນຈຸດສຸມການຜະລິດ ສະນັ້ນ, ທາງແຂວງຈຶ່ງໄດ້ນໍາສະເໜີເອົາໂຄງການພັດທະນາຊົນນະບົດຢູ່ໃນເມືອງໄຊຈຳພອນ ນີ້ເປັນຈຸດສຸມຕົວແບບໜຶ່ງໃນຕົ້ນປີ 2021 ໃນນາມສະມາຊິກສະພາແຫ່ງຊາດປະຈຳເຂດເລືອຕັ້ງດັ່ງກ່າວຈຶ່ງສະເໜີຕໍ່ລັດຖະບານເພື່ອສືບຕໍ່ຊຸກຍູ້ບັນດາຂະແໜງການທີ່ກ່ຽວຂ້ອງນໍາສະເໜີເອົາໂຄງການພັດທະນາຊົນນະບົດຢູ່ໃນເມືອງໄຊຈຳພອນເຂົ້າໃນໂຄງການບຸລິມະສິດໜຶ່ງຂອງລັດຖະບານ ຍ້ອນເຂດດັ່ງກ່າວເປັນເຂດພື້ນຖານຂອງການປະຕິວັດ ເປັນເຂດທີ່ມີຄວາມຫຍຸ້ງຍາກ ດັ່ງນັ້ນ, ຈຶ່ງຢາກສະເໜີໃຫ້ລັດຖະບານຊ່ວຍແກ້ໄຂ.

ທ່ານ ​ນາງ ອຳ​ໄພ​ວອນ ລ້ອມ​ບຸນ​ແພງ ສ​ສ​ຊ ປະ​ຈຳ​ເຂດ​ເລືອກ​ຕັ້ງ​ທີ 8 ແຂວງ​ຫົວ​ພັນ ໄດ້ມີຄຳເຫັນ ຫຼາຍບັນຫາເປັນຕົ້ນການປະຕິບັດວາລະແຫ່ງຊາດກ່ຽວກັບການແກ້ໄຂຂໍ້ຫຍຸ້ງຍາກດ້ານເສດຖະກິດ-ການເງິນຂອງລັດຖະບານ ທີ່ພົວພັນເຖິງແກ້ໄຂບັນຫາໜີ້ສິນຂອງລັດ, ໜີ້ສາທາລະນະ, ການເຈລະຈາຊໍາລະໜີ້ ແລະ ອື່ນໆ ໂດຍສະເໜີໃຫ້ລັດຖະບານກວດກາຄືນບັນດາໂຄງການຕ່າງໆຂອງລັດ ເຖິງຄວາມຈໍາເປັນ ແລະ ຜົນປະໂຫຍດຕົວຈິງທີ່ປະເທດກໍຄືປະຊາຊົນຈະໄດ້ຮັບ ເພື່ອຫຼຸດຜ່ອນບັນຫາໜີ້ສິນ, ລວມເຖິງການຄຸ້ມຄອງໂຄງການລົງທຶນຂອງຕ່າງປະເທດ ຊຶ່ງຜ່ານມາເຫັນວ່າລັດຖະບານໄດ້ອະນຸຍາດຫຼາຍໂຄງການ ແຕ່ການຄຸ້ມຄອງຍັງເຮັດບໍ່ໄດ້ດີເທົ່າທີ່ຄວນ. ດັ່ງນັ້ນ, ຈຶ່ງສະເໜີໃຫ້ລັດຖະບານຄວນຕັດສິນໃຈ, ມີຄວາມເຂັ້ມງວດນຳກັນ ແລະ ມີຄວາມເປັນທຳ ຈຶ່ງຈະເຮັດໃຫ້ການຈັດຕັ້ງປະຕິບັດບັນຫາດັ່ງກ່າວນີ້ສຳເລັດ. ຂະນະດຽວກັນ ລັດຖະບານຄວນຄົ້ນຄວ້າຕື່ມວ່າພາກສ່ວນໃດປະຕິບັດໄດ້ດີກໍຄວນຍ້ອງຍໍ ແລະ ພາກສ່ວນໃດປະຕິບັດບໍ່ໄດ້ ຄວນມີມາດຕະການແກ້ໄຂ.      

 ຂ່າວ-ພາບ: ພູວັນ