ຫົວ​ຂໍ້ : ຄະນະຜູ້ແທນ ສ.ເຊັກ ຢ້ຽມຢາມລາວ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 21/02/2020 09:01:57 ຈຳ​ນວນ​ຜູ້​ເຂົ້າ​ຢ້ຽມ​ຊົມ 3822 ຄັ້ງ

  ຕອບ​ສະໜອງ​ຕາມ​ຄຳ​ເຊີນຂອງ​ສະພາແຫ່ງ​ຊາດລາວ ຄະນະ​ຜູ້​ແທນ​ຂັ້ນ​ສູງຂອງສະພາ​ຜູ້​ແທນ​​ລາ​​ສະດອນແຫ່ງ ສາທາລະນະ​ລັດເຊັກ ນຳ​ໂດຍ ທ່ານ ຣາ​ເດັກ ວອນ ດຣາ​ເຊັກ (Radek Vondracek), ປະທານ​ສະພາ​ຜູ້​ແທນ​​ລາ​​ສະ ​ດອນ​ແຫ່ງ ສ.ເຊັກ ໄດ້​ເດີນທາງ​ມາ​ຢ້ຽມຢາມ​ລາວ​ (19 -22/2/2020) ແລະ ໃນ​ຕອນ​ເຊົ້າວັນ​ທີ 20 ກຸມພາ​ນີ້, ຄະນະ​ຜູ້​ແທນ​​ໄດ້​ໄປ​ວາງ​ພວງມາລາ​ທີ່​ອະນຸສາວະລີ​ນັກຮົບ​ນິລະນາມ ຈາກ​ນັ້ນ​ກໍໄດ້​ເດີນທາງ​ໄປ​ສະພາ​ແຫ່ງ​ຊາດ ເພື່ອ​ພົບ​ປະ​ກັບ​ປະ​ທານ​ສະ​ພາ​ແຫ່ງ​ຊາດ​ລາວ. 
  ໃນ​ການ​ພົບ​ປະຄັ້ງ​ນີ້, ທັງ​ສອງ​ຝ່າຍໄດ້​ປຶກສາ​ຫາລື, ແລກປ່ຽນ​ບົດຮຽນຊຶ່ງກັນ ແລະ ກັນ ໃນ​ຫຼາຍ​ດ້ານເປັນຕົ້ນໄດ້​ຮ່ວມ​ກັນ​ປຶກສາ​ຫາລື, ຊອກ​ຫາ​ໂອກາດ​ໃນ​ການ​ຮ່ວມ​ມື​ກັນດຳເນີນ​ທຸລະ​ກິດ​ຕາມ​ທ່າແຮງ ແລະ ຄວາມ​ຕ້ອງການຂອງ​ແຕ່​ລະ​ຝ່າຍ ເພື່ອ​ປະກອບສ່ວນເຂົ້າ​ໃນ​ການ​ເພີ່ມ​ທະວີ​ການ​ຮ່ວມ​ມືທາງ​ດ້ານ​ເສດ​ຖະ​ກິດ​-​ການ​ຄ້າ, ການ​ລົງທຶນ, ການທ່ອງທ່ຽວໃຫ້​ເປັນ​ຮູບ​ປະ​ທຳ​ເທື່ອ​ລະ​ກ້າວ.
  ໂອກາດ​ດັ່ງກ່າວ, ທ່ານ​ນາງ ປານີ ຢາ​ທໍ່​ຕູ້ ປະທານສະພາແຫ່ງຊາດລາວ ໄດ້​ສະແດງ​ຄວາມ​ເຊື່ອ​ໝັ້ນ​ວ່າໝາກຜົນ​ຂອງ​ການ​ຢ້ຽມຢາມ​ໃນ​ຄັ້ງ​ນີ້​ຈະ​ເປັນ​ການ​ປະກອບ​ສ່ວນ​ສໍາ​ຄັນ​ຍິ່ງ. ຖື​ໄດ້​ວ່າ​ເປັນ​ຄັ້ງ​ປະຫວັດສາດ​ຂອງ​ການ​ຢ້ຽມຢາມ​ແລກປ່ຽນ​ເຂົ້າ​ໃນ​ການ​ສືບຕໍ່​ເສີມ​ຂະຫຍາຍສາຍ​ພົວພັນ​ມິດຕະພາບ​ທີ່​ເປັນ​ມູນເຊື້ອ ລະຫວ່າງ ສປປ ລາວ ແລະ ສາທາລະນະ​ລັດເຊັກ ກໍຄືລະຫວ່າງສອງ​ອົງການ​ນິຕິບັນຍັດຂອງ​ພວກ​ເຮົາໃຫ້​ມີ​ການ​ຂະຫຍາຍຕົວ​ໃນ​ທ່ວງ​ທ່າ​ໃໝ່.ພາຍຫຼັງ​ທີ່​ສອງ​ປະເທດ​ໄດ້​ຮັບ​ການ​ສ້າງຕັ້ງ​ສາຍ​ພົວພັນ​ການ​ທູດ ໃນ​ປີ 1962 ເປັນ ຕົ້ນ​ມາ. ພ້ອມ​ທັງ​ສະແດງ​ຄວາມ​ຂອບໃຈຕໍ່​ລັດຖະບານ ສາທາລະນະ​ລັດ ເຊັກ ທີ່​ໄດ້​ໃຫ້ການ​ສະໜັບສະໜູນເງິນ​ກູ້​ຜ່ອນຜັນຮ່ວມ​ກັບ​ຄູ່​ຮ່ວມ​ພັດທະນາ​ອື່ນໆ ແກ່​ລັດຖະບານ​ລາວ ເພື່ອ​ກໍ່ສ້າງ ໂຮງໝໍມິດຕະພາບ​ທັນ​ສະໄໝ ຢູ່​ນະຄອນຫຼວງ​ວຽງ​ຈັນ ຊຶ່ງ​ມາຮອດ​ປັດຈຸບັນໂຮງໝໍ​ດັ່ງກ່າວໄດ້​ເປີດ​ໃຫ້ການ​ບໍລິການແກ່​ປະຊາຊົນ​ແລ້ວ. ໄປ​ຄຽງ​ຄູ່​ກັບ​ການ​ພົວພັນ​ຮ່ວມ​ມືທາງ​ດ້ານ​ການ​ເມືອງ​-​ການ​ທູດ ທີ່​ດີ​ນັ້ນ ເຫັນ​ວ່າການ​ພົວພັນ​ຮ່ວມ​ມື​ທາງ​ດ້ານ​ເສດ​ຖະ​ກິດ​-​ການ​ຄ້າກໍ​ໄດ້​ມີ​ຈຸດ​ເລີ່ມຕົ້ນ​ທີ່​ດີ ຊຶ່ງ ສປປ ລາວ ສົ່ງ​ອອກ​ສິນຄ້າ​ໄປ ສ.ເຊັກ ບັນລຸ 1,03 ລ້ານ​ໂດ​ລາ​ (ປະເພດເຄື່ອງນຸ່ງ​ຫົ່ມ) ແລະ ນໍາ​ເຂົ້າ​ສິນຄ້າ​ຈາກ ສ.ເຊັກ ມີ​ມູນ​ຄ່າ 725.000 ໂດ​ລາ ເປັນຕົ້ນ​ແມ່ນອຸປະກອນການແພດ, ເຄື່ອງໃຊ້​ໄຟຟ້າ ແລະ ອຸປະ ກອນອື່ນໆ. ທ່ານ​ ນາງ ປານີ ຢາ​ທໍ່​ຕູ້ ໃຫ້​ຮູ້​ອີກ​ວ່າ: ສປປ ລາວ ແລະ ສ.ເຊັກ ມີ​ທ່າແຮງ​ຫຼາຍ​ດ້ານທີ່​ຈະ​ໄດ້​ມີ​ການ​ຮ່ວມມື​ກັນໃນ​ອະນາ​ຄົດ ເປັນຕົ້ນແມ່ນ ທ່າແຮງ ທາງ​ດ້ານ​ອຸດ​ສາ​ຫະ​ກຳ​-​ການ​ຄ້າ, ການ​ລົງທຶນ,  ການປົກ ​ປັກ​ຮັກສາ​ສິ່ງແວດລ້ອມ, ການ​ສົ່ງເສີມ​ການທ່ອງທ່ຽວ, ການ​ຮ່ວມ​ມື​ໃນ​ຂົງເຂດ​ວຽກ​ງານ ວັດທະນະ​ທຳ​-​ສັງຄົມ, ວຽກ​ງານສຶກສາ​-​ສາທາລະນະ​ສຸກ ແລະ ອື່ນໆ.
  ພ້ອມ​ດຽວ​​ກັນ​ນັ້ນ, ທ່ານ​ນາງ ປານີ ຢາ​ທໍ່​ຕູ້ ຍັງ​ໄດ້​ສະເໜີ​ໃຫ້​ລັດ​ຖະ​ສະພາແຫ່ງ ສ.ເຊັກ ສືບ​ຕໍ່​ເພີ່ມ​ທະວີ​ແລກປ່ຽນ ​ແລະ​ ການ​ຮ່ວມ​ມື​ລະຫວ່າງ​ສອງ​ສະພາ​ແຫ່ງ​ຊາດ ໃນ​ວຽກ​ງານ​ດ້ານ​ນິຕິບັນຍັດ​ລວມ​ທັງ​ການ​ແລກປ່ຽນ​ຂໍ້​ມູນ​ຂ່າວສານ​ທີ່​ແຕ່​ລະ​ຝ່າຍ​ມີ​ຄວາມ​ສົນໃຈ​ນຳ​ກັນ​ໂດຍ​ຜ່ານ​ການ​ຢ້ຽມຢາມ​ຂອງ​ຄະນະ​ຜູ້​ແທນ​ຂັ້ນ​ສູງ, ຂັ້ນ​ກຳມາ​ທິ​ການ ຈົນ​ເຖິງ​ຂັ້ນ​ວິຊາ​ການ​ນຳ​ກັນ​ ພ້ອມ​ນີ້​ສະເໜີ​ໃຫ້​ລັດ​ຖະ​ສະພາ ແຫ່ງ ສ.ເຊັກ ພິ​ຈາ​ລະ​ນາສ້າງຕັ້ງຄະນະ​ມິດຕະພາບ​ລັດ​ຖະ​ສະພາ ສ.ເຊັກ​-​ລາວ ເພື່ອ​ເປັນ​ກົນ​ໄກ​ໃຫ້​ແກ່​ການ​ຊຸກ ຍູ້ ແລະ ສົ່ງເສີມ​ການ​ພົວພັນ​ຮ່ວມ​ມື ລະຫວ່າງ​ສອງ​ອົງການ​ນິຕິບັນຍັດ ໃຫ້​ມີ​ປະສິດ​ທິ​ຜົນ​ກວ່າ​ເກົ່າ. ສໍາ​ລັບ​ສະພາ​ແຫ່ງ​ຊາດ​ລາວ ແມ່ນ​ໄດ້​ມີ​ຄະນະມິດ ຕະພາບ​ລັດ​ຖະ​ສະພາລາວ-​ເອີ​ຣົບ ຊຶ່ງ​ຮັບຜິດຊອບທັງ ສ.ເຊັກ ນໍາ; ສືບຕໍ່​ແລກປ່ຽນປຶກສາຫາ ລື ແລະ ສະໜັບສະໜູນ ຊຶ່ງ​ກັນ ແລະ ກັນ ທັງ​ແບບ​ສອງຝ່າຍ ແລະ ຫຼາຍ​ຝ່າຍໃນ​ການເຄື່ອນໄຫວຢູ່​ເວທີ​ລັດ​ຖະ​ສະພາ​ພາກ​ພື້ນ ແລະ ສາກົນຕາມຄວາມ​ເໜາະ​ສົມ, ຈາກ​ນັ້ນ​ຄະນະສະພາ​ຜູ້​ແທນ​ລາ​ສະ​ດອນ ສ.ເຊັກ​ ກໍ​ໄດ້​ເຂົ້າ​ຢ້ຽມ​ຂາ​ໍ່ນັບ ທ່ານ ບຸນ​ຍັງ ວໍລະ​ຈິດ ປະທານປະ ເທດ ແຫ່ງ ສປປ ລາວ ທີ່​ທຳນຽບ​ປະທານ​ປະເທດ ​ແລະ​ ຕອນ​ບ່າຍ​ຄະນະ​ສະພາ​ຜູ້​ແທນ​ລາ​ສະ​ດອນ​ກໍ​ໄດ້​ສືບຕໍ່​ເຂົ້າ​ຢ້ຽມ​ຂາ​ໍ່ນັບ ທ່ານ ທອງ​ລຸນ ສີ​ສຸລິດ ນາຍົກລັດຖະມົນຕີແຫ່ງ ສປປ ລາວ​ທີ່​ສຳນັກງານ​ນາຍົກລັດ ຖະມົນຕີ​ເຊັ່ນ​ດຽວ​ກັນ.
 (ຂ່າວ​-​ພາບ: ພູ​ວຽງ​ຄຳ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110