​​ ສະຫະພັນກຳມະບານຄະນະ​ຈັດ​ຕັ້ງ​ສູນ​ກາງ​ພັກ ໄດ້​ຈັດກອງ​ປະຊຸມ​ໃຫຍ່ສະມາຊິກ​ກຳມະບານ ຄັ້ງ​ທີ VI ຂອງຕົນຂຶ້ນ ໃນ​ວັນ​ທີ 26 ພະ​ຈິກ​ ຜ່ານ​ມາ ທີ່​ຄະ​ນະ​ຈັດ​ຕັ້ງ​ສູນ​ກາງ​ພັກ ໂດຍ​ເປັນ​ກຽດ​​ເຂົ້າ​ຮ່ວມ​ຂອງ​ ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ ​ຄະ​ນະເລຂາທິການສູນກາງພັກ ເລຂາຄະນະພັກ ຫົວໜ້າຄະນະຈັດຕັ້ງສູນກາງພັກ, ມີສະຫາຍ ນາງ ອາລີ ວົງໜໍ່ບຸນທຳ ກຳມະການສູນກາງພັກ ປະທານສູນກາງສະຫະ​ພັນ​ກຳມະບານລາວ, ມີສະມາຊິກກຳ​ມະ​ບານ​ ​ພ້ອມດ້ວຍ​​ແຂ​ກຖືກ​ເຊີນເຂົ້າ​ຮ່ວມ.

​​ສະຫາຍ ວິລະ​ພັນ ສີ​ລິ​ທຳ ​ປະທານ​ສະຫະພັນ​ກຳມະບານຄະນະ​ຈັ​ດຕັ້ງ​ສູນ​ກາງ​ພັກ ໄດ້​ຜ່ານ​ຮ່າງ​ລາຍງານການເມືອງ, ຕີລາຄາຜົນສຳເລັດການຈັດຕັ້ງປະຕິບັດມະຕິກອງປະຊຸມໃຫຍ່ຕະຫຼອດໄລຍະ 5 ປີຜ່ານມາ, ຍົກໃຫ້ເຫັນດ້ານດີ, ດ້ານອ່ອນ-ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ ພ້ອມນີ້ ກໍໄດ້ຜ່ານຮ່າງ​ບົດສຳຫຼວດການນຳພາລວມຂອງຄະນະບໍລິຫານງານສະຫະພັນ​ກຳມະບານຄະນະຈັດ​ຕັ້ງ​ສູນ​ກາງ​ພັກ ສະໄໝທີ V, ແຜນພັດທະນາວຽກ​ງານ​ກຳມະບານ​ຄະນະ​ຈັດ​ຕັ້ງ​ສູນ​ກາງ​ພັກ ແລະ ເປັນເອກະພາບກັນຮັບຮອງເອົາທິດທາງແຜນການ 5 ປີຕໍ່ໜ້າ.

ຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະບໍລິ ຫານງານຊຸດໃໝ່ ຊຶ່ງ​ມີຜູ້ສະໝັກ 12 ສະຫາຍ ຍິງ 3 ສະຫາຍ, ເລືອກ​ເອົາ 9 ສະ​ຫາຍ ຍິງ 1 ສະ​ຫາຍ.

ກອງປະຊຸມຄັ້ງ​ປະຖົມ​ມະ​ລືກ ໄດ້ເປັນເອກະສັນກັນເລືອກເອົາ ສະຫາຍ ຄູນເພັງ ໄຊສະຫວາດ ເປັນປະທານຄະນະບໍລິຫານງານ ສະຫະພັນກຳມະບານຄະນະ​ຈັດ​ຕັ້ງ​ສູນ​ກາງ​ພັກ ສະໄໝທີ VI, ສະຫາຍ ສິນນະຄອນ ດວງບັນດິດ ເປັນຮອງປະທານ ທັງເປັນປະທານກວດກາ, ສະຫາຍ ມະນີ ກ່ານສີລາ ເປັນຮອງປະທານ, ສະຫາຍ ສາດທະສິນ ຫຼວງຄູນ ເປັນຮອງປະທານກວດກາ.

ສະຫາຍ ນາງ ອາລີ ວົງໜໍ່ບຸນທຳ ໄດ້ສະ​ແດງ​ຄວາມຍ້ອງຍໍຊົມເຊີຍຕໍ່ຜົນສໍາເລັດຂອງ ສະຫະພັນກຳມະບານຄະນະ​ຈັດ​ຕັ້ງ​ສູນ​ກາງ​ພັກ ໃນໄລຍະ 5 ປີຜ່ານມາ ແລະ ຊົມເຊີຍຕໍ່ບັນດາສະຫາຍຄະນະບໍລິຫານງານສະຫະພັນກຳມະບານ ຄະນະ​ຈັດ​ຕັ້ງ​ສູນ​ກາງ​ພັກຊຸດໃໝ່ ພ້ອມ​ກັບ​ໃຫ້​ທິດຊີ້ນຳ ເພື່ອ​ປັບປຸງ, ​ແກ້​ໄຂ​​ດ້ານ​ອ່ອນ-ຂໍ້ຄົງຄ້າງ ພ້ອມກັນສຸມ​ທຸກ​ສະຕິ​ປັນຍາ​ເຫື່ອ​ແຮງ​ເຂົ້າ​ໃນ​ການ​ປົກ​ປັກ​ຮັກສາ ​ແລະ ພັດ ທະນາ​ປະ​ເທດຊາດ, ​​ຊີ້​ນຳ-ນຳພາ ​ຈັດຕັ້ງປະຕິບັດ​ມະຕິ​ກອງ​ປະຊຸມ​ໃຫຍ່ຄັ້ງ​ນີ້ ​ໃຫ້​ມີຜົນສຳເລັດໃໝ່ທີ່ກ້າວໜ້າ.

ຂ່າວ-ພາບ: ຄະ​ນະ​ຈັດ​ຕັ້ງ​ສູນ​ກາງ​ພັກ