ງານບຸນກິນຈຽງ ຫຼື ໜໍ່ເປເຈົ່າ ເປັນຮີດຄອງປະເພນີຂອງຊົນເຜົ່າມົ້ງທີ່ເຄີຍຈັດຕັ້ງປະ​ຕິ​ບັດມາແຕ່ດຶກດໍາບັນ. ໃນນັ້ນ, ຄະນະພັກອຳນາດການປົກຄອງບ້ານ ພ້ອມດ້ວຍປະຊາຊົນ ບ້ານຊາຍຈະເລີນ ເມືອງຫ້ວຍຊາຍ ແຂວງບໍ່ແກ້ວ ກໍໄດ້ຈັດງານບຸນກິນຈຽງ ປະຈຳປີ 2022.

      ທ້າວ ນໍ່ຈື ກາໄຈລີ  ເລຂາຄະນະພັກຮາກຖານ ນາຍບ້ານໆຊາຍຈະເລີນ ໄດ້​ໃຫ້ສຳພາດຕໍ່ຜູ້ສື່ຂ່າວເມືອງວ່າ: ເຜົ່າມົ້ງມີເອກະລັກທາງດ້ານຮີດຄອງປະເພນີ ເຊື່ອຖືຜີເຮືອນ, ສືບສາຍຕະກຸນທາງພໍ່ ຫຼື ຝ່າຍຊາຍເປັນຫຼັກ, ໜໍ່ເປເຈົ່າ ແມ່ນການສະຫຼອງຜົນງານການເກັບກ່ຽວ​ຜົນ​ຜະ​ລິດ ທີ່ຍາດມາໄດ້ໃນຕະຫຼອດໄລຍະໜຶ່ງປີ, ເປັນການສົມມາຄາລະວະຕໍ່ພໍ່ແມ່, ຜູ້ອາວຸໂສ ແລະ ຜູ້ນຳພາ, ເປັນການສ້າງໂອກາດເຕົ້າໂຮມບັນດາພໍ່ແມ່, ຍາດຕິພີ່ນ້ອງ, ແຂກຄົນທັງຢູ່ໃກ້ ແລະ ຢູ່ໄກໄດ້ມາພົບພໍ້ຢ້ຽມຢາມ ເພື່ອສະແດງຄວາມສາມັກຄີ, ຄວາມຂອບອົກຂອບໃຈ, ຄວາມຮູ້ບຸນຄຸນຊຶ່ງກັນ ແລະ ກັນ. ເປັນການສ້າງໂອກາດໃຫ້ຜູ້ເປັນພໍ່-ແມ່ໄດ້ເລືອກໄພ້, ເລືອກເຂີຍ, ຊາຍໜຸ່ມ, ຍິງສາວໄດ້ເລືອກຄູ່ຊີວິດຂອງຕົນເອງ, ການເອ້ຢ້ອງ, ອວດອ້າງຄວາມຮັ່ງມີຂອງໃຜລາວ ທັງເປັນການຟື້ນຟູ, ເຜີຍແຜ່ຮີດຄອງປະເພນີອັນດີງາມ ແລະ ວັດທະນະທໍາຂອງຕົນນຳອີກ.

     ທ່ານໄດ້ກ່າວຕື່ມວ່າ: ການຈັດງານໃນຄັ້ງນີ້ ມີຄວາມແຕກຕ່າງໃນໄລຍະຜ່ານມາເນື່ອງຈາກມີການລະບາດຂອງເຊື້ອພະຍາດໂຄວິດ-19  ຈຶ່ງໄດ້ຈັດຕາມຮີດຕາມຄອງກິດຈະກຳບາງຢ່າງບໍ່ສາມາດນໍາມາສະແດງ. ມາໃຫ້ຊົມມີພຽງແຕ່ກິດຈະກຳໂຍນໝາກຄອນ, ການວາງຂາຍສິນຄ້າເທົ່ານັ້ນ ຈຶ່ງເຮັດໃຫ້ບັນຍາດກາດບໍ່ຄຶກຄັກ. ສຳ​ລັບການປະຕິບັດມາດຕະການ​ໂຄວິດ-19 ແມ່ນໄດ້ພ້ອມກັນປະຕິບັດຢ່າງເຂັ້ມງວດ ມີການວັດແທກອຸນຫະພູມ, ມີເຈົ້າໜ້າທີ່ປ້ອງກັນ.

(ຂ່າວ-ພາບ: ຄຳພັນ ແກ້ວມະນີ)