ໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 73 ປີ 20 ມັງກອນ 1949 – 20 ມັງກອນ 2022 ນີ້, ໃນວັນທີ 18 ມັງກອນ ນີ້ ໜ່ວຍສະ​ຫະ​ພັນແມ່ຍິງ - ຊາວໜຸ່ມກົມກອງອ້ອມຂ້າງກອງບັນຊາການທະຫານແຂວງຫຼວງ​ພະ​ບາງ, ນໍາໂດຍສະຫາຍ ພັນໂທ ນາງ ສີດາ ພົມມະຈັນ ຄະນະບໍລິຫານງານສະຫະພັນແມ່ຍິງແຂວງ ຫົວໜ້າພະແນກສະຫະພັນແມ່ຍິງທະຫານແຂວງ, ມີສະຫາຍ ຮ້ອຍເອກ ສົມນຶກ ວິໄຊ ຫົວໜ້າພະແນກຊາວໜຸ່ມທະຫານແຂວງ ພ້ອມດ້ວຍຄະນະ ໄດ້ນໍາເອົາເຄື່ອງບໍລິໂພກ-ອຸປະໂພກ ແລະ ກະຕ່າຂອງຂວັນເຂົ້າອວຍພອນ ຄະນະພັກ - ຄະນະບັນຊາກອງບັນຊາການທະຫານແຂວງ ຊຶ່ງປະກອບມີ ໝີ່ 7 ແກັດ, ປ໋ອງປາ 1 ແກັດ, ສະບູ່ນົກແກ້ວ 1 ແກັດ, ​ແປງ​ຖູ​ແຂ້ວ 1 ແກັດ, ຢາຖູ​ແຂ້ວ 1 ແກັດ, ແຟັບ 2 ແກັດ, ຢາສູບລາວ 24 ກັບ ແລະ ກະຕ່າຂອງຂວັນ ລວມມູນຄ່າທັງໝົດ 5 ລ້ານກວ່າກີບ. ໂດຍແມ່ນສະຫາຍ ພັນເອກ ສີວິໄຊ ເພັງສັນຕິສຸກ ສະມາຊິກສະພາແຫ່ງຊາດ ຫົວໜ້າການເມືອງກອງບັນຊາການທະຫານແຂວງ ຕາງໜ້າຮັບ ພ້ອມດ້ວຍຄະນະພັກ ກອງບັນຊາການ, ຫົວໜ້າຫ້ອງ, ຮອງຫ້ອງເຂົ້າຮ່ວມ.

ໂອກາດດຽວກັນນີ້ ສະຫາຍ ພັນເອກ ສີວິໄຊ ເພັງສັນຕິສຸກ ໄດ້ກ່າວສະແດງຄວາມຂອບໃຈ ຕໍ່ສອງອົງການຈັດຕັ້ງມະຫາຊົນ ກໍຄືຊາວໜຸ່ມ - ແມ່ຍິງ ທີ່ໄດ້ພ້ອມກັນລະດົມທຶນປະກອບສ່ວນຊຸກຍູ້ຊ່ວຍເຫຼືອເພື່ອຊື້ເຄື່ອງບໍລິໂພກ ແລະ ອຸປະໂພກມອບໃຫ້ກອງບັນຊາການທະຫານແຂວງ ເພື່ອໄປແຈກຢາຍໃຫ້ບັນດາກົມກອງທີ່ເຮັດໜ້າທີ່ເຄື່ອນໄຫວປ້ອງກັນເວນຍາມຢູ່ເຂດທຸລະກັນດານຫ່າງໄກສອກຫຼີກ ເພື່ອໃຫ້ນາຍ ແລະ ພົນທະຫານໄດ້ບໍລິໂພກກັນ ທັງເປັນການອວຍພອນກໍາລັງຂອງອ້າຍ-ນ້ອງນັກຮົບ ໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 73 ປີ ໃຫ້ມີບັນຍາກາດຟົດຟື້ນ.

(ຂ່າວ-ພາບ: ໄຊຍະສອນ ລັດຕະນະວົງ)