ຄະນະນໍາສູນກາງແນວລາວສ້າງຊາດ (ສນ​ຊ) ໄດ້ຈັດກອງປະຊຸມປຶກສາຫາລືຜັນຂະຫຍາຍຄໍາແນະນໍາເລກທີ 047/ຄປຈ ຂຶ້ນໃນທ້າຍ​ອາ​ທິດ​ຜ່ານ​ມາ ທີ່ຫ້ອງປະຊຸມສູນຝຶກອົບຮົມ ສນ​ຊ, ໂດຍການເປັນປະທານຂອງທ່ານ ເຍ່ຍເກີຢາ ໜໍ່ຈໍຈົງຕົວ ຮອງປະທານ ສນ​ຊ, ມີບັນດາຄະນະພັກ, ຫົວໜ້າ-ຮອງຫົວໜ້າຫ້ອງການ, ກົມ ແລະ ສູນຝຶກອົບຮົມ ຕະຫຼອດຮອດພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ບຸນນໍ່ເປເຈົ່າ, ເປັນບຸນປະຈຳປີຂອງເຜົ່າມົ້ງ ເພື່ອສົ່ງທ້າຍປີເກົ່າຕ້ອນຮັບປີໃໝ່, ເປັນສັນຍາລັກແຫ່ງຄວາມສາມັກຄີ, ຄວາມຜູກພັນໝັ້ນຄົງ ໃນວົງສາຄະນາຍາດຂອງປະຊາຊົນເຜົ່າມົ້ງທີ່ຢູ່ຫ່າງໄກໄດ້ມາພົບປະສ້າງສັນ ແລະ ເພື່ອເຮັດພິທີກຳລະນຶກເຖິງບັນພະບູລຸດຂອງວົງສາຄະນາຍາດຕົນ.

ກອງປະຊຸມຄັ້ງນີ້, ເພື່ອເປັນການຜັນຂະຫຍາຍຄໍາແນະນໍາ 047/ຄປຈ, ລົງວັນທີ 27 ມີນາ 2020 ວ່າດ້ວຍການສະຫຼອງວັນບຸນຕ່າງໆ ແລະ ການປະຕິບັດບາງຮີດຄອງປະເພນີບັນດາຊົນເຜົ່າ ຫັນມາເປັນຄໍາແນະນໍາອັນສະເພາະກ່ຽວກັບ ບຸນນໍ່ເປເຈົ່າຂອງຊົນເຜົ່າມົ້ງ, ເພື່ອສ້າງຄວາມເປັນເອກະພາບກໍານົດ ວັນ, ເວລາ ອັນຈະແຈ້ງຂອງແຕ່ລະປີ ໃນການຈັດຕັ້ງປະຕິບັດວັນບຸນດັ່ງກ່າວໃຫ້ໄດ້ຮັບຜົນດີໃນຕໍ່ໜ້າ.

(ຂ່າວ-ພາບ: ສນ​ຊ)