ມອບ-ຮັບ ອາຄານຮຽນ ໂຮງຮຽນປະຖົມສົມບູນບ້ານເຫຼົ່າ ຈຸດສຸມຊຽງໄຄ ເມືອງໄຊບູລີ ແຂວງສະຫວັນນະເຂດ ໄດ້​ຈັດ​ຂຶ້ນ​ເມື່ອບໍ່​ດົນ​ມານີ້ ທີ່ບ້ານດັ່ງກ່າວ, ໂດຍໃຫ້ກຽດກ່າວມອບຂອງ ທ່ານ ວິໄລສັກ ອຸດົມ ປະທານສະໂມສອນສະຫວັນໂຟວິວໄດຣ ພ້ອມຄະນະ ແລະ ກ່າວຮັບໂດຍ ທ່ານ ຖາວອນ ອິນສີຊຽງໃ​ໝ່  ຮອງຫົວໜ້າພະແນກສຶກສາທິການ ແລະ ກິລາ ແຂວງສະຫວັນນະເຂດ, ມີ​ແຂກ​ຖືກ​ເຊີນ ແລະ ພາກ​ສ່ວນ​ກ່ຽວ​ຂ້ອງເຂົ້າຮ່ວມ.

      ໂຄງ​ການກໍ່​ສ້າງອາຄານຮຽນ ໂຮງຮຽນປະຖົມສົມບູນ ບ້ານ​ດັ່ງ​ກ່າວ ​ເປັນ​ໂຄງ​ການ​ສືບ​ຕໍ່ກໍ່ສ້າງ​ທີ່​ຍັງ​ບໍ່​ທັນ​ສໍາເລັດ. ດັ່ງ​ນັ້ນ, ສະໂມສອນສະຫວັນໂຟວິວໄດຣ ເຫັນໄດ້ຄວາມສໍາຄັນ​ຕໍ່ວຽກງານການສຶກສາ ຈຶ່ງໄດ້ໃຫ້ການສະໜັບສະໜູນ ທຶນໃນການກໍ່​ສ້າງ​ຕໍ່ມູນຄ່າ 60 ລ້ານກີບ, ເພື່ອອໍານວຍຄວາມສະດວກໃຫ້ແກ່ນັກຮຽນ, ທັງ​ເປັນ​ການ​ສົ່ງ​ເສີມວຽກງານສຶກສາທິການ ແລະ ກິລາຢູ່ບ້ານເຫຼົ່າ ໃຫ້ມີຄວາມສະດວກສະບາຍ ຈຶ່ງໄດ້ສືບຕໍ່ເລີ່ມລົງມືການກໍ່ສ້າງນັບແຕ່ວັນທີ 29 ມີນາ 2020 ແລະ ໄດ້ສໍາເລັດໃນວັນທີ 10 ມັງກອນ 2022, ເປັນອາຄານຊັ້ນດຽວ ແບບ​ຖາ​ວອນ ​ມີຂະໜາດ 12x32 ແມັດ ແລະ ມີທັງໝົດ 4 ຫ້ອງ ແລະ ມີຫ້ອງນໍ້າ 2 ຫ້ອງ.

    ໂອກາດດັ່ງກ່າວ, ທ່ານ ຖາວອນ ອິນສີຊຽງໃໝ່ ຕາງໜ້າອໍານາດການປົກຄອງຂອງບ້ານ ແລະ ໂຮງຮຽນ ໄດ້ກ່າວຄວາມຂອບໃຈມາຍັງສະໂມສອນສະຫວັນໂຟວິວໄດຣ ທີ່​ໃຫ້ການສະໜັບສະໜູນທາງດ້ານທຶນຮອນ ແລະ ດ້ານວິຊາການໃນ​ການ​ສ້າງໂຮງຮຽນແຫ່ງ​ດັ່ງ​ກ່າວ, ຫວັງຢ່າງຍິງວ່າການຊ່ວຍເຫຼືອຄັ້ງນີ້ຈະບໍ່ແມ່ນເປັນການຊ່ວຍເຫຼືອຄັ້ງສຸດທ້າຍ ແລະ ໂອກາດໜ້າຈະໄດ້ຮັບການຊ່ວຍເຫຼືອຕື່ມອີກ.

(ຂ່າວ-ພາບ: ຄຳແພງເພັດ ຂັນຕິວົງ)