ໜັງສືພິມ ປະຊາຊົນ

ລມຕ ຍຸຕິທຳຕ້ອນຮັບທູດຍີ່ປຸ່ນ ເຂົ້າຢ້ຽມພົບປະ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 25/01/2022 19:06:27 ຈຳນວນຢ້ຽມຊົມ 4045 ຄັ້ງ

ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທຳ ໄດ້ຕ້ອນຮັບການເຂົ້າຢ້ຽມພົບປະຂອງທ່ານ ໂຄບາຢາຊິ ເຄນອິຈິ (KOBAYASHI Kenichi) ເອກອັກຄະຣາຊະທູດວິສາມັນຜູ້ມີອຳນາດເຕັມແຫ່ງປະເທດຍີ່ປຸ່ນ ປະຈຳ ສປປ ລາວ ໃນວັນທີ 25 ມັງກອນນີ້ ທີ່ ກະຊວງດັ່ງກ່າວ.

ໃນໂອກາດດັ່ງກ່າວ, ທ່ານ ໄພວີ ສີບົວລິພາ ກໍໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ໂຄບາຢາຊິ ເຄນອິຈິ ທີ່ໄດ້ຖືກແຕ່ງຕັ້ງມາປະຕິບັດໜ້າທີ່ ດຳລົງຕຳແໜ່ງເປັນເອກອັກຄະຣາຖະທູດແຫ່ງຍີ່ປຸ່ນ ຄົນໃໝ່ ປະຈຳ ສປປ ລາວ ຊຶ່ງຈະເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ສປປ ລາວ ແລະ ຍີ່ປຸ່ນໃຫ້ຂະຫຍາຍຕົວຍິ່ງໆຂຶ້ນ, ສຳລັບ ກະຊວງຍຸຕິທຳ ແຫ່ງ ສປປ ລາວ ແມ່ນໄດ້ຮ່ວມມືທາງດ້ານວິຊາການກົດໝາຍ ກັບ ກະຊວງຍຸຕິທຳຍີ່ປຸ່ນ ນັບແຕ່ປີ 1996 ເປັນຕົ້ນມາ ແລະ ໄດ້ມີການພົບປະແລກປ່ຽນໃນຂົງເຂດຍຸຕິທຳ ແລະ ກົດໝາຍ ໃຫ້ມີກອບຫຼັກການ ແລະ ມີປະສິດທິຜົນຍິ່ງໆຂຶ້ນໃນຕໍ່ໜ້າ.

ໃນໂອກາດດຽວກັນ ທ່ານ ໂຄບາຢາຊິ ເຄນອິຈິ ກໍໄດ້ສະແດງຄວາມຂອບອົກຂອບໃຈຕໍ່ ທ່ານ ໄພວີ ສີບົວລິພາ ທີ່ໄດ້ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້ ແລະ ກ່າວຢືນຢັນວ່າ ຈະຕັ້ງໜ້າປະຕິບັດໜ້າທີ່ຂອງຕົນໃຫ້ດີທີ່ສຸດ ເພື່ອເສີມຂະຫຍາຍສາຍພົວພັນ ແລະ ການຮ່ວມມືລະຫວ່າງ ຍີ່ປຸ່ນ ແລະ ສປປ ລາວ ໃຫ້ນັບມື້ຂະຫຍາຍຕົວຍິ່ງໆຂຶຶ້ນ.

ຂ່າວ-ພາບ: ບຸນຕອມ

ຂ່າວທີ່ໄດ້ຮັບຄວາມນິຍົມ