ປະ​ເທດການາດາໃຫ້ການສະໜັບສະໜູນ ຜ້າອັດ​ປາກ - ​ດັງ (Masks) ​ໃຫ້ ສປປ ລາວ ເພື່ອຕອບໂຕ້ພະຍາດໂຄວິດ-19 ໃນຈຳນວນ 981.600 ອັນ. ພິທີມອບ-ຮັບ ໄດ້ຈັດຂຶ້ນໃນ​ວັນ​ທີ 26 ມັງກອນ ນີ້ ທີ່ກະຊວງສາທາລະນະສຸກ ໂດຍການກ່າວມອບ ຂອງ ທ່ານ ບ໋ອບ ປາແກ່ນ ອຸປະທູດແຫ່ງການາດາ ປະຈຳ ສປປ ລາວ ແລະ ກ່າວຮັບຂອງ ທ່ານ ບຸນແຝງ ພູມມາໄລສິດ ລັດຖະມົນຕີກະຊວງສາທາລະນະສຸກ ​ຊຶ່ງ​ມີ​ພະ​ນັກ​ງານ​ແພດ-ໝໍ ແລະ ພາກສ່ວນກ່ຽວຂ້ອງເຂົ້າຮ່ວມ.

ການຊ່ວຍເຫຼືອຂອງປະ​ເທດການາດາໃນຄັ້ງນີ້ ເພື່ອເປັນການຈັດຕັ້ງປະຕິບັັດຕາມນະໂຍບາຍຂອງ ກະຊວງ ແລະ ໜ່ວຍງານສາທາລະນະສຸກຂອງປະເທດການາດາ ພາຍໃຕ້ໂຄງການຫຼຸດຜ່ອນໄພຂົ່ມຂູ່ດ້ານອາວຸດ ມີຄວາມພູມໃຈສະໜັບສະໜູນອຸປະກອນປ້ອງກັນສ່ວນບຸກຄົນ (PPE) ຫຼາຍກວ່າ 9,5 ລ້ານອັນ ໃຫ້ແກ່ສະມາຊິກອາຊຽນ ເພື່ອຕອບໂຕ້ກັບການລະບາດຂອງພະຍາດໂຄວິດ-19. ອຸປະກອນປ້ອງກັນສ່ວນບຸກຄົນ (PPE) ຈະຖືກແຈກຢາຍໃຫ້ຫ້ອງການເລຂາທິການອາຊຽນ ຈຳນວນ 2.896.000 ອັນ  ແລະ ບັນດາປະເທດສະມາຊິກອີກ 7 ປະເທດ ໃນນັ້ນມີ ບຣູໄນ 870.000 ອັນ, ກໍາປູເຈຍ 950.000 ອັນ, ອິນໂດເນເຊຍ 800.000 ອັນ, ສປປ ລາວ 1.129.600 ອັນ, ມຽນມາ 1.107.200 ອັນ, ຟີລິບປິນ 837.200 ອັນ ແລະ ປະເທດໄທ 980.000 ອັນ, ການເປັນຄູ່ຮ່ວມງານລະຫວ່າງສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) ແລະ ປະເທດການາດາ ໄດ້ສືບຕໍ່ໃຫ້ການຊ່ວຍເຫຼືອອາ ຊຽນໃນການຕອບໂຕ້ກັບການລະບາດຂອງພະຍາດໂຄວິດ-19. ປະເທດການາດາ ມຸ່ງໝັ້ນທີ່ຈະສືບຕໍ່ການຮ່ວມມືກັບອາຊຽນໃນການຊ່ວຍເຫຼືອເພື່ອຟື້ນຟູຈາກການລະບາດຂອງພະຍາດໂຄວິດ-19 ໃນຂົງເຂດອິນໂດ-ປາຊີຟິກ. ການສະໜັບສະໜູນອຸປະກອນປ້ອງກັນສ່ວນບຸກຄົນ (PPE) ຄັ້ງ​ນີ້ ເພື່ອເປັນການເຮັດໃຫ້ແນ່ໃຈວ່າບັນດາປະເທດສະມາຊິກອາຊຽນ ລວມທັງ ສປປ ລາວ ສາມາດເຂົ້າເຖິງອຸປະກອນທີ່ຈຳເປັນຕໍ່ການປ້ອງກັນພະຍາດໂຄວິດ-19.

ທ່ານ ບອບ ປາແກ່ນ ໃຫ້ຮູ້ຕື່ມວ່າ: ໜຶ່ງໃນວຽກງານບຸລິມະສິດ ປະເທດການາດາ ຢູ່ ສປປ ລາວ ຄືສ້າງຄວາມເຂັ້ມແຂງ ໃນການປ້ອງກັນ ຄວບຄຸມ ແລະ ຕອບໂຕ້ໂຣກລະບາດ. ການຊ່ວຍເຫຼືອຕ່າງໆ ໃຫ້ ສປປ ລາວ ທີ່ຜ່ານມາ ລວມມີອຸປະກອນການກວດຫາເຊື້ອ ເພື່ອຫຼຸດຜ່ອນພະຍາດໂຄວິດ-19. ພ້ອມນັ້ນຍັງໄດ້ຊ່ວຍເຫຼືອ ອົງການກາແດງລາວ ໃນການສ້າງສູນກັກກັນຜູ້ຕິດເຊື້ອພະຍາດໂຄວິດ-19 ແລະ ໄດ້ເຮັດວຽກຮ່ວມກັບ ສະຖາບັນປັດສະເຕີ ໃນການຄົ້ນຄວ້າ ເພື່ອສຶກສາ-ປ້ອງກັນພະຍາດຂົ່ມຂູ່ທາງຊີວະພາບທີ່ຈະເກີດຂຶ້ນ ລວມເປັນມູນຄ່າ 3,5 ລ້ານໂດລາ.

ຂ່າວ-ພາບ: ບຸນ​ອູ້ມ