ແຂວງ​ຈຳ​ປາ​ສັກ ຮ່ວມ​ກັບ ກະຊວງການເງິນ ໄດ້ຈັດ​ກອງ​ປະ​ຊຸມເຜີຍແຜ່ວາລະແຫ່ງຊາດຕິດພັນກັບ ຂະແໜງການເງິນ ຂຶ້ນທີ່ສະໂມສອນຂອງແຂວງ​ຈຳ​ປາ​ສັກ ໃນວັນທີ 26 ມັງກອນ ນີ້ ໂດຍການເປັນປະທານຂອງ ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ມີການນຳເມືອງ, ນະຄອນ ແລະ ຂະ​ແໜງ​ການ​ກ່ຽວ​ຂ້ອງໃນທົ່ວແຂວງເຂົ້າຮ່ວມ.

ຈຸດປະສົງ ແມ່ນເລັ່ງໃສ່ການປະເມີນຜົນການຈັດຕັ້ງປະຕິບັດການເຜີຍແຜ່ວາລະແຫ່ງຊາດທີ່ຕິດພັນກັບຂະແໜງການເງິນ ໂດຍລວມແມ່ນສຸມໃສ່ການຈັດຕັ້ງປະຕິບັດການປ້ອງກັນແກ້ໄຂບັນຫາຂໍ້ຫຍຸ້ງຍາກຂອງບັນຫາເສດຖະກິດການເງິນ. ໃນນີ້, ບັນຫາຫຼັກແມ່ນຕ້ານການຮົ່ວໄຫຼຂອງງົບປະມານ ທີ່ເປັນບັນ​ຫາແກ່ຍາວ ແລະ ບໍ່ໄດ້ຮັບການແກ້ໄຂ ທີ່ໄດ້ສົ່ງຜົນເສຍຫາຍອັນມະຫາສານໃຫ້ແກ່ລັດ ເປັນຕົ້ນໃນ 4 ຂອດໃຫຍ່ທີ່ເປັນບັນຫາລວມໃນຂອບເຂດທົ່ວປະເທດ. ໃນນັ້ນ, ແມ່ນຂອດການນຳເຂົ້ານ້ຳມັນເຊື້ອໄຟ, ການນຳເຂົ້າສິນຄ້າອຸປະໂພກ - ບໍລິໂພກ ລວມທັງບັນຫາພາຫະນະ, ອາໄຫຼ່ບໍ່ຖືກຕ້ອງ ແລະ ການຮົ່ວໄຫຼໃນຂົງເຂດບັນຊີ ຄືການຖືສອງບັນຊີ ແລະ ບັນຫາກົງຈັກການຈັດຕັ້ງການແບ່ງຂັ້ນຄຸ້ມຄອງ.

      ໃນໂອກາດນີ້, ກອງປະຊຸມໄດ້ມີການເຜີຍແຜ່ຄຳສັ່ງເລກທີ 01 ຂອງກົມການເມືອງສູນກາງພັກ ວ່າດ້ວຍການເພີ່ມທະວີການນຳພາ ຊີ້ນຳຄຸ້ມຄອງຂອງຄະນະພັກແຕ່ລະຂັ້ນ, ຄຳສັ່ງຂອງນາຍົກລັດຖະມັນຕີ ສະບັບເລກທີ 18/ນຍ ວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງງົບປະມານແຫ່ງລັດ ແລະ ເອກະສານທີ່ຕິດພັນກັບວາລະແຫ່ງຊາດ, ຄຳສັ່ງນາຍົກລັດຖະມົນຕີ ເລກທີ 20/ນຍ ແລະ ຄຳແນະນຳ ຂອງກະຊວງການເງິນທີ່ຕິດພັນກັບວຽກງານການເງິນອີກດ້ວຍ.

(ຂ່າວ: ດວງໃຈ ຂຸນສັກດາ, ພາບ: ເກດສະໜາ ແກ້ວສຸວັນນະແສງ)