ອົງການ UNICEF  ​ຮ່ວມ​ກັບ ກະຊວງຖະແຫຼ​ງຂ່າວ, ວັດທະນະທຳ ແລະ ທ່ອງທ່ຽວ, ສູນກາງຊາວໜຸ່ມ ປະຊາຊົນ ປະຕິວັດລາວ, ມະຫາວິທະຍາໄລແຫ່ງຊາດລາວ, ອົງການ ChildFund ໃນປະເທດລາວ ແລະ ອົງການ Global Shapers ໄດ້ຈັດງານນຳສະເໜີແນວຄວາມຄິດ, ໂອ້ລົມ, ສົນທະນາຂອງຕົວແທນຊາວໜຸ່ມລາວ ທີ່ເນັ້ນໃສ່​ຜົນກະທົບຂອງການລະບາດຂອງພະຍາດໂຄວິດ-19 ຕໍ່ເດັກ ແລະ ໄວໜຸ່ມໃນ ສປປ ລາວ ຂຶ້ນໃນວັນທີ 27​ ມັງກອນ​​ ນີ້ ທີ່ສູນກາງຊາວໜຸ່ມປະຊາຊົນປະຕິວັດລາວ.

ງານສົນທະນາແລກປ່ຽນຄໍາຄິດເຫັນຂອງ​ຊາວໜຸ່ມລາວໃນ​ຄັ້ງ​ນີ້ພາຍ​ໃຕ້​ຫົວ​ຂໍ້​ຫຼັກ “ເພື່ອຄົ້ນຄິດຄືນໃໝ່ເຖິງຄົນລາວແຕ່ນີ້ຫາປີ 2030  ສ້າງຍຸກຫຼັງການລະບາດຂອງພະຍາດໂຄວິດ-19 ທີ່ດີກວ່າ, ມີສີຂຽວຫຼາຍຂຶ້ນ ແລະ ຍືນຍົງກວ່າເກົ່າ ເພື່ອເດັກທຸກໆຄົນ”, ໄດ້ເຕົ້າໂຮມເອົາຊາວໜຸ່ມລາວ ທີ່ມີພອນສະຫວັນ ແລະ ມີຄວາມມຸ່ງໝັ້ນເປັນຕົວແທນຈໍານວນ 7 ຄົນ ທີ່ມາຈາກພື້ນຖານທີ່ແຕກຕ່າງກັນໃນຂອບເຂດທົ່ວປະເທດ ເພື່ອນຳສະເໜີທັດສະນະຂອງເຂົາເຈົ້າກ່ຽວກັບບັນຫາທີ່ສຳຄັນທີ່ສົ່ງຜົນກະທົບຕໍ່ເດັກ ແລະ ໄວໜຸ່ມ ໃນ ສປປ ລາວ ລວມທັງຫົວຂໍ້ທີ່ກ່ຽວພັນກັບການສຶກສາ, ການປ່ຽນແປງຂອງດິນຟ້າອາກາດ, ສາທາລະນະສຸກ, ການປົກປ້ອງເດັກ.

ຫົວຂໍ້ທີ່​ນຳ​ມາ​ສົນ​ທະ​ນາ​ມີ​ຄື: 1​. ການຢຸດພັກໜຶ່ງປີ​ ກະກຽມຂ້ອຍສູ່​ການຮຽນຮູ້ຕະຫຼອດຊີວິດ ໂດຍພຣະ​ສົມກຽດ ສີຢາງ​ວົງສາ, 2. ເປັນຫຍັງຈຶ່ງບໍ່ມີຊີວິດ​ປົກກະຕິແບບໃໝ່ສຳລັບການປ່ຽນແປງດິນຟ້າອາກາດ ສະເໜີໂດຍ ນາງ ມະໄລສອນ ວັນນະລາດ​, 3. ເປັນຫຍັງສຸຂະພາບຈິດທີ່ດີຈຶ່ງເລີ່ມຈາກການຮັບຟັງ ສະເໜີໂດຍໂດຍ ນາງ ດາລາສັກ ຍອດຈະເລີນ, 4. ຄວາມຫວັງທີ່ເດັກ​ຈະຫຼຸດພົ້ນຈາກຄວາມຮຸນແຮງທຸກຮູບແບບ ສະເໜີໂດຍ ນາງ ປາເຢຍ​ ຢ່າງເຊົາເຢ້, 5. ຄວາມສັບຊ້ອນຂອງໂພຊະນາການຂອງເດັກ​ ແລະ ແມ່ຍິງໃນ ສປປ ລາວ ສະເໜີໂດຍ ນາງ ໄພລິນ ເກີດຫຼ້າ​, 6. ສິ່ງທີ່ພໍ່ແມ່ຂອງຂ້ອຍສອນ​​ຂ້ອຍກ່ຽວກັບຄວາມສະເໝີພາບ​ຍິງ-ຊາຍ ສະເໜີໂດຍ ນາງ ພະນົມພອນ ຜາອຸດົມ ແລະ 7. ຄວາມສໍາຄັນຂອງການຍອມຮັບ ແລະ ການ​ເຄົາລົບຕໍ່ຄວ​າມເປັນຕົວເອງຂອງທຸກ​ເພດ ຈຶ່ງສໍາຄັນ ສະເໜີໂດຍ ທ້າວ ວັນນະນ້ອຍ ນິຍົມສິນ ຊຶ່ງຕົວແທນໄວໜຸ່ມແຕ່ລະຄົນລ້ວນແລ້ວແຕ່ເປັນບຸກຄົນທີ່ເປັນແບບຢ່າງໃນທ້ອງຖິ່ນຂອງຕົນ ໂດຍນັກເວົ້າເອງໄດ້ມີປະສົບການດໍາເນີນໂຄງການເພື່ອປູກຈິດສໍານຶກກ່ຽວກັບບັນຫາທີ່ສໍາຄັນຕໍ່ຕົນເອງທີ່ເປັນໄວໜຸ່ມ ຫຼື ໄດ້ມີສ່ວນຮ່ວມໃນການວຽກງານເພື່ອປັບປຸງຊຸມຊົນຂອງຕົນ.

ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ ກ່າວວ່າ: “ຍ້ອນການ​ລະບາດຂອງພະຍາດໂຄວິດ-19 ຢ່າງຕໍ່ເນື່ອງ, ເດັກນ້ອຍ ແລະ ໄວໜຸ່ມໃນ ສປປ ລາວ ພວມ​ປະເຊີນກັບວິກິດການຂະໜາດໃຫຍ່ທີ່ບໍ່ເຄີຍມີມາກ່ອນ. ​ໃນຂະນະທີ່ພວກເຮົາພວມສ້າງໂລກຄືນໃໝ່ ຫຼັງການ​ລະບາດຂອງພະຍາດໂຄວິດ-19, ຊາວໜຸ່ມ​ຕ້ອງການເວທີເພື່ອສະແດງຄວາມຄິດເຫັນຂອງຕົນ ​ກ່ຽວກັບບັນຫາທີ່ມີຄວາມສໍາຄັນຕໍ່​ພວກເຂົາເອງ ແລະ ມີສ່ວນຮ່ວມໃນຂະບວນການເພື່ອຈິນຕະນາການຄືນໃໝ່ເຖິງ​ອະນາຄົດທີ່ດີກວ່າ. ສະນັ້ນ, “ຄຳຄິດເຫັນຂອງຊາວໜຸ່ມ​ລາວ” ຈຶ່ງເປັນ​ບັນຫາສຳຄັນ, ນຳມາຄົ້ນຄວ້າໃຫ້ຊັດເຈນ.​”

ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼ​ງຂ່າວ, ວັດທະນະທຳ ແລະ ທ່ອງທ່ຽວ​ ກ່າວ​ວ່າ: “ໃນເກືອບ 2 ທົດສະວັດຂອງການຮ່ວມມືລະຫວ່າງ MICT ແລະ ອົງການ UNICEF, ພວກເຮົາໄດ້ເຫັນແລ້ວວ່າສື່ມວນຊົນມີບົດບາດອັນມີພະລັງທີ່ສຸດໃນ​ການເປັນກະບອກ​ສຽງຂອງຊາວໜຸ່ມລາວ ແລະ ການໂຄສະນາສົ່ງເສີມສະຫວັດດີພາບ​ຂອງພວກເຂົາ. ດ້ວຍ “ຄຳຄິດເຫັນຂອງຊາວໜຸ່ມ​ລາວ”, ຊາວໜຸ່ມມີເວທີຫຼາກຫຼາຍເພື່ອສືບຕໍ່ເປັ​ນກະບອກ​ສຽງຂອງຕົນ​​ໃນໄລ​ຍະ​ການ​ລະບາດຂອງພະຍາດໂຄວິດ-19, ພວກ​ເຮົາຈໍາເປັນ​ຕ້ອງ​ສ້າງໂອກາດໃຫ້ແກ່​ເດັກ​ ​ແລະ ຊາວ​ໜຸ່ມໄດ້​ເຂົ້າ​ຮ່ວມ​ໃນ​ການ​ພັດທະນາ​ປະ​ເທດຊາດໃນຖານະ​ເປັນ​ພົນລະ​ເມືອງ​ທີ່ຫ້າວຫັນ​.”

 ທ່ານ ອຸດົມ ພອນຄໍາແພງ​ ຮັກສາການອະທິການບໍດີ​ NUOL ​ກ່າວ​ວ່າ: “ມີຄວາມສຳຄັນຫຼາຍທີ່ຄົນຮຸ່ນອາວຸໂສ​ກວ່າໄດ້ມີສ່ວນຮ່ວມ ແລະ ໄດ້ຍິນສຽງຈາກຄົນຮຸ່ນໜຸ່ມກ່ວາໃນເລື່ອງທີ່ສຳຄັນທີ່ສຸດຕໍ່​ພວກເຂົາ​ໃນໄລ​ຍະ​ທີ່ທ້າທາຍນີ້ ແລະ ຊາວໜຸ່ມລາວກໍມີວິທີການແລກປ່ຽນທັດສະນະ ແລະ ວິໄສທັດຂອງຕົນສໍາລັບ​ອະນາຄົດທີ່ພວກເຂົາ​ຕ້ອງການ.​ NUOL ພູມໃຈທີ່ໄດ້ມີບົດບາດໃນການສະໜັບສະໜູນຊາວໜຸ່ມໃນລາວ ໂດຍຜ່ານ “ຂະບວນການຄົ້ນຄິດຂອງຊາວໜຸ່ມ​ລາວ”. ພວກເຮົາຮູ້ສຶກຕື່ນເຕັ້ນທີ່ສຸດທີ່ໄດ້ປະກອບສ່ວນເຂົ້າໃນການສ້າງ​​ເວທີສົນທະນາແລກປ່ຽນບົດຮຽນສໍາລັບໄວໜຸ່ມ​ ແລະ ຫວັງວ່າແນວຄວາມຄິດ ແລະ ທັດສະນະຂອງພວກເຂົາ​ຈະຖືກ​​ຮັບຟັງ ແລະ ໄດ້ຮັບການ​ພິຈາລະນາ.​

 ທ່ານ ນາງ ເພຍ​ ເຣ​ເບ​ລ​ໂລ ບ​ຣີ​ໂຕ ຜູ້ຕາງໜ້າອົງການອຸຍນີເຊັບປະຈຳ ສປປ ລາວ ກ່າວວ່າ: “ຄໍາຄິດເຫັນ​ຊາວໜຸ່ມລາວ” ເປັນເວທີໃຫ້ຊາວໜຸ່ມໄດ້ສະແດງອອກ ແລະ ມີສ່ວນຮ່ວມຢ່າງຫ້າວຫັນ​ໃນການສ້າງ​ໂລກຄືນໃໝ່​ຫຼັງການ​​ລະບາດຂອງພະຍາດ​ໃຫ້​ດີກວ່າ, ຂຽວ​ສົດ​ໃສກວ່າ, ແບບຍືນ​ຍົງ​ກວ່າ. ງານ​ດັ່ງກ່າວມີຄວາມສຳຄັນເປັນພິເສດສຳລັບພວກເຮົາ ເນື່ອງຈາກວ່າເມື່ອບໍ່ດົນມານີ້ອົງການUNICEF ໄດ້ສະເຫຼີມສະຫຼອງ ວັນຄົບຮອບ 75 ປີຂອງຕົນ ​ຊຶ່ງ​ເປັນການຢັ້ງຢືນເຖິງຄວາມມຸ່ງໝັ້ນອັນຍາວນານເປັນເວລາຫຼາຍທົດສະວັດ​​ຂອງພວກເຮົາໃນການສົ່ງເສີມສຽງຂອງເດັກ​ໃນທົ່ວໂລກ, ລວມທັງໃນ ສປປ ລາວ ອີກດ້ວຍ.”​ ​

ຂ່າວ-ພາບ: ບຸນ​ຕອມ