ໜັງສືພິມ ປະຊາຊົນ

ຈຳປາສັກ ລາຍງານ 10 ບັນຫາຕໍ່ກອງປະຊຸມການຄ້າທົ່ວປະເທດ ຄັ້ງທີ IV

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 27/01/2022 20:25:47 ຈຳນວນຢ້ຽມຊົມ 2236 ຄັ້ງ

ຫວ່າງບໍ່ດົນມານີ້ ທີ່ພະແນກອຸດສາຫະກຳ ແລະ ການຄ້າແຂວງ, ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ ໄດ້ເຂົ້າຮ່ວມ ແລະ ປະກອບຄຳເຫັນຕໍ່ກອງປະຊຸມທາງໄກຂອງຄະນະກຳມະການອຳນວຍຄວາມສະດວກທາງດ້ານການຄ້າ ທົ່ວປະເທດ ຄັ້ງທີ IV ໂດຍກ່າວວ່າ: ຖືເປັນກຽດຢ່າງສູງທີ່ໄດ້ຕາງໜ້າຄະນະກຳມະການອຳນວຍຄວາມສະດວກທາງດ້ານການຄ້າແຂວງຈຳປາສັກ ຜ່ານບົດລາຍງານການຈັດຕັ້ງປະຕິບັດວຽກອຳນວຍຄວາມສະດວກທາງດ້ານການຄ້າຢູ່ແຂວງຈຳປາສັກ ແລະ ຕອບຄຳຖາມເຈາະຈີ້ມຂອງທ່ານປະທານກອງປະຊຸມ.

ການຈັດຕັ້ງປະຕິບັດວຽກອຳນວຍຄວາມສະດວກໃນປີ 2021 ທີ່ເຫັນວ່າຄະນະກຳມະການອຳນວຍຄວາມສະດວກທາງດ້ານການຄ້າ ໄດ້ຈັດກອງປະຊຸມປຶກສາຫາລື ດ້ານເຕັກນິກວິຊາການ ລະຫວ່າງ ພາກລັດ ແລະ ພາກທຸລະກິດຢູ່ແຂວງຈຳປາສັກ ສາມາດສັງລວມບັນຫາທີ່ຕິດພັນກັບວຽກອໍານວຍຄວາມສະດວກທາງດ້ານການຄ້າ ລວມມີ 10 ບັນຫາ: ບັນຫາທີ່ໄດ້ຮັບການແກ້ໄຂ 4 ບັນຫາ, ແກ້ໄຂໄດ້ບາງສ່ວນ 2 ບັນຫາ, ກໍາລັງດໍາເນີນການແກ້ໄຂ 1 ບັນຫາ, ໄດ້ຮັບການຊີ້ແຈງແລ້ວ 2 ບັນຫາ ແລະ ຍັງບໍ່ມີຄວາມຄືບໜ້າ 1 ບັນຫາ; ສຳລັບນິຕິບຸກຄົນ ຫຼື ການຈັດຕັ້ງທີ່ຂຶ້ນທະບຽນວິສາຫາກິດ, ຮັບອະນຸຍາດການລົງທຶນຈາກຂະແໜງການກ່ຽວຂ້ອງ ໄດ້ຮັບເລກປະຈຳຕົວຜູ້ເສຍອາກອນ ແລະ ໄດ້ຈົດທະບຽນເຂົ້າໃນລະບົບອາກອນມູນຄ່າເພີ່ມ (ຊຶ່ງສ່ວຍສາອາກອນປະຈຳແຂວງເປັນຜູ້ຄຸ້ມຄອງ) ຖ້າຫາກບໍ່ປະຕິບັດການຖືບັນຊີຢ່າງຖືກຕ້ອງ ຄົບຖ້ວນ ບໍ່ແຈ້ງ ແລະ ມອບອາກອນຕາມໝາຍກຳນົດ ແລະ ບໍ່ນຳໃຊ້ໃບເກັບເງິນທີ່ຖືກຕ້ອງ ຈະຖືກຄິດໄລ່ອາກອນກຳໄລແບບບັງຄັບຕາມກົດໝາຍວ່າດ້ວຍອາກອນລາຍໄດ້ ສະບັບເລກທີ 67/ສພຊ, ລົງວັນທີ 18 ມີຖຸນາ 2019; ການຕັ້ງຈຸດ (ປ້ອມ) ກວດກາຕາມເສັ້ນທາງຂອງເຈົ້າໜ້າທີ່ຕຳຫຼວດ ເພື່ອກວດກາສິນຄ້າ ແລະ ເອກະສານເຄື່ອນຍ້າຍສິນຄ້າຊຶ່ງໄດ້ສ້າງຄວາມຫຍຸ້ງຍາກ ແລະ ເພີ່ມຄ່າໃຊ້ຈ່າຍ ໃຫ້ແກ່ການເຄື່ອນຍ້າຍສິນຄ້າຢູ່ພາຍໃນປະເທດຂອງແຂວງຈຳປາສັກ ແມ່ນຕັ້ງຈຸດເພື່ອກວດກາການເຄື່ອນໄຫວຂອງລົດໃຫ້ຖືກຕ້ອງກັບເງື່ອນໄຂ ໃນການດຳເນີນທຸລະກິດ ເພື່ອສະກັດກັ້ນການຊື້-ຂາຍສິ່ງຜິດກົດໝາຍ ແລະ ເພື່ອຄວາມເປັນລະບຽບຮຽບຮ້ອຍຂອງສັງຄົມ.

ການອອກຄຳແນະນຳຂອງທ່ານເຈົ້າແຂວງຈຳປາສັກ ສະບັບເລກທີ 05/ຈຂ.ຈສ, ລົງວັນທີ 11 ພະຈິກ 2021 ກ່ຽວກັບການຄຸ້ມຄອງທຸລະກິດການຄ້າສິນຄ້າກະສິກຳ (ມັນຕົ້ນ, ກາເຟ ແລະ ຢາງພາລາ) ແມ່ນເນື່ອງມາຈາກການຄຸ້ມຄອງຂອງຂະແໜງການຍັງບໍ່ທັນເຂັ້ມແຂງເທົ່າທີ່ຄວນ ພ້ອມດຽວກັນຫົວໜ່ວຍທຸລະກິດກໍບໍ່ມີຄວາມຈິງໃຈທີ່ຈະແຈ້ງມອບພັນທະໃຫ້ລັດ ການເຄື່ອນໄຫວທຸລະກິດບໍ່ຖືກຕ້ອງຕາມລະບຽບ, ມີການລັກລອບຊື້-ຂາຍ ໃນລະດູການເກັບກ່ຽວ ເຮັດໃຫ້ຜູ້ລົງທຶນເສຍຫາຍຫຼາຍລ້ານໂດລາໃນແຕ່ລະປີ ການເກັບກຳສະຖິຕິໂຕເລກການຊື້-ຂາຍບໍ່ແທດເໝາະກັບເນື້ອທີ່ການຜະລິດ ເຖິງແມ່ນວ່າແຂວງໄດ້ອອກແຈ້ງການສະບັບດັ່ງກ່າວ ແຕ່ໃນການຈັດຕັ້ງປະຕິບັດຕົວຈິງໃນການອອກເອກະສານເຄື່ອນຍ້າຍ ຂົງເຂດ ອຸດສາຫະກຳ ແລະ ການຄ້າ ຍັງບໍ່ໄດ້ຖືກຈັດຕັ້ງປະຕິບັດ. (ຂ່າວ-ພາບ: ເກດສະໜາ ແກ້ວສຸວັນນະແສງ)