ໃນໂອກາດເຂົ້າຮ່ວມ ກອງ​ປະຊຸມ​​ຜັນ​ຂະຫຍາຍ​ວຽກ​ງານ​ຈັດ​ຕັ້ງ​ທົ່ວ​ປະ​ເທດ ຄັ້ງ​ທີ XI ແລະ ສະຫຼຸບວຽກງານຈັດຕັ້ງ, ກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງທົ່ວແຂວງເຊກອງ ໄລຍະ 5 ປີ (2016-2022) ​ລະ​ຫວ່າ​ງ ວັນທີ 27-28 ມັງກອນ 2022 ສະຫາຍ ນາງ ສີ​ໃສ ລື​ເດດ​ມູນ​ສອນ ກຳມະການ​ກົມ​ການ​ເມືອງ​ສູນ​ກາງ​ພັກ ​​ຄະ​ນະເລຂາທິການ​ສູນ​ກາງ​ພັກ ຫົວໜ້າ​ຄະນະ​ຈັດ​ຕັ້ງ​ສູນ​ກາງ​ພັກ ​ໄດ້​ຢ້ຽມຢາມ-​ເຮັດ​ວຽກ​ຢູ່​ເມືອງທ່າແຕງ ແຂວງ​​ເຊກອງ ​ໂດຍ​ມີ​ສະຫາຍ ນາງ ຈັນຫອມ ມະຫາໄຊ ຮອງເລຂາພັກແຂວງ ຜູ້ຊີ້ນຳວຽກງານພັກ-ພະນັກງານ ແຂວງເຊກອງ, ສະຫາຍ ສົມເພັດ ເອີດລັດດາ  ກໍາມະການພັກແຂວງ ເລຂາ​ພັກ​ເມືອງ ​ເຈົ້າ​ເມືອງທ່າແຕງ ພ້ອມດ້ວຍຄະນະ ໃຫ້ການ​ຕ້ອນຮັບຢ່າງອົບອຸ່ນ​.

ໃນໂອກາດດັ່ງກ່າວ ສະຫາຍເລຂາພັກເມືອງທ່າແຕງ ໄດ້ລາຍງານສະພາບການຊີ້ນຳ-ນຳພາໂດຍລວມຂອງເມືອງເປັນຕົ້ນ  ການນຳພາວຽກງານຈັດຕັ້ງ, ການນຳພາພັດທະນາເສດຖະກິດ-ສັງຄົມ, ທ່າແຮງບົ່ມຊ້ອນ ແລະ ສິ່ງທ່າທ້າຍຕໍ່ການນຳພາໃນໄລຍະໃໝ່ຂອງເມືອງ.

ຈາກນັ້ນ ສະຫາຍຫົວໜ້າ​ຄະນະ​ຈັດ​ຕັ້ງ​ສູນ​ກາງ​ພັກ ໄດ້ມີຄຳເຫັນໂອ້ລົມໃຫ້ທິດຊີ້ນຳຕໍ່ການນຳຫຼັກແຫຼ່ງຂອງເມືອງ ໃນການເປັນແບບຢ່າງນຳໜ້າຂອງພະນັກງານ-ສະມາຊິກພັກ, ເອົາໃຈໃສ່ສ້າງພັກໃຫ້ ປອດໃສ,​ ເຂັ້ມແຂງ,​ ໜັກແໜ້ນ ດ້ວຍຄຸນນະພາບໃໝ່, ເຊື່ອມຊຶມກຳແໜ້ນກົດລະບຽບພັກ ສະໄໝທີ XI ຢ່າງເລິກເຊິ່ງ, ຕິດຕາມກວດກາ ແລະ ປະເມີນການນຳພາຂອງຄະນະພັກແຕ່ລະຂັ້ນ, ກຳແໜ້ນປະຫວັດຂອງພະນັກງານທີ່ຂຶ້ນກັບສິດຄຸ້ມຄອງຂອງຕົນຢ່າງລະອຽດ, ຮັກສາຈັນຍາບັນ ແລະ ຄຸນທາດການເມືອງຂອງພະນັກງານ-ສະມາຊິກພັກ ໄວ້ໃຫ້ໝັ້ນຄົງ, ພ້ອມ​ກັນ​ຈັດ​ຕັ້ງປະຕິບັດສອງວາລະແຫ່ງຊາດ ແລະ ຄາດໝາຍສູ້ຊົນທີ່ເມືອງຂອງ​ຕົນວາງອອກ​ໃຫ້​ປະກົດ​ຜົນ​ເປັນ​ຈິງ​.

ຂ່າວ ແລະ ພາບ: ຄອນຄຳ ໂສລັດຕະນະວົງ