ໃນວັນທີ 26 ມັງກອນ ຜ່ານ​ມານີ້ ທີ່ສະຖາບັນການເງິນ-ການບັນຊີ ໄດ້ຈັດກອງປະຊຸມວິຊາການສ້າງທ່າຫັນປ່ຽນໃໝ່ຂອງວຽກວິສາຫະກິດບັນຊີ ແລະ ວິສາຫະກິດກວດສອບໃຫ້ເປັນຕົວແທນພາກລັດໃນການຊຸກຍູ້ການຖືບັນຊີໃຫ້ຖືກຕ້ອງຕາມລະບຽບກົດໝາຍ ໂດຍການເປັນປະທານຂອງທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ, ມີທ່ານ ນາງ ດາວອນ ທອງຈັນ ຫົວໜ້າກົມຄຸ້ມຄອງບັນຊີ ກະຊວງການເງິນ, ມີຕາງໜ້າພະແນກການເງິນ ນະຄອນຫຼວງວຽງຈັນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

       ກອງປະຊຸມຄັ້ງນີ້, ໄດ້ສະຫຼຸບ ແລະ ລາຍງານການເຄື່ອນໄຫວວຽກງານຂອງວິສາຫະກິດບັນຊີ ແລະ ວິສາຫະກິດກວດສອບ ປະ​ຈຳປີ 2021 ​ແລະ ທິດ​ທາງ​ແຜນການ ປະ​ຈຳ ​ປີ 2022, ເຜີຍແຜ່ຂໍ້ຕົກລົງວ່າດ້ວຍການອະນຸຍາດດຳເນີນວິສາຫະກິດບັນຊີ, ວິສາຫະກິດກວດສ​ອບ ແລະ ນັກກວດສອບຕາມກົດໝາຍ, ຄຳ​ສັ່ງ​ເລກທີ 18 ຂອງ​ນາຍົກ​ລັດຖະມົນ​ຕີ ທີ່​ຕິດ​ພັນ​ກັບ​ວຽກງານ​ບັນຊີ ​ແລະ ກວດ​ສອບ​ອິດ​ສະຫຼະ,  ນຳສະເໜີຮ່າງບົດບັນທຶກການປະຖົມນິເທດ ສຳລັບວິສາຫະກິດສ້າງຕັ້ງໃໝ່ ແລະ ປຶກສາຫາລືກ່ຽວກັບທິດທາງ ແລະ ແຜນການໃນຕໍ່ໜ້າ.

ໂອກາດດັ່ງກ່າວ, ທ່ານຮອງລັດຖະມົນຕີກະຊວງການເງິນ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນໍາຕໍ່ກອງ​ປະຊຸມ ​ໄດ້ໃຫ້​ຄວາມ​ສຳຄັນວຽກງານບັນຊີ, ກວດສອບອິດສະຫຼະ ຊຶ່ງລັດຖະບານ​ໄດ້ຖືເອົາເປັນວຽກໜຶ່ງທີ່ເອົາເຂົ້າໃນວາລະແຫ່ງຊາດວ່າດ້ວຍການແກ້ໄຂຂໍ້ຫຍຸ້ງຍາກທາງດ້ານເສດຖະກິດ ແລະ ກຳນົດເຂົ້າໃນຄຳສັ່ງເລກທີ 18 ຂອງນາຍົກລັດຖະມົນຕີ ວ່າດ້ວຍ ການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ.

ໃນ​ກອງ​ປະ​ຊຸ​ມ, ຜູ້ເຂົ້າຮ່ວມໄດ້ມີການສົນທະນາແລກປ່ຽນບົດຮຽນຊຶ່ງກັນ ແລະ ກັນ ລະ ຫວ່າງຜູ້ເຂົ້າຮ່ວມຈາກບັນດາ​ກົມກະຊວງການ​ເງິນ, ພະແນກ​ການ​ເງິນ​ ນະຄອນຫຼວງວຽງຈັນ,   ວິ​ສາ​ຫະກິດ​ບັນຊີ ​ແລະ ວິ​ສາ​ຫະກິດ​ກວດ​ສອບກ່ຽວກັບສະພາບການເຄື່ອນໄຫວຂອງວິ​ສາ​ຫະກິດ​ບັນຊີ, ວິ​ສາ​ຫະກິດ​ກວດ​ສອບ  ແລະ ບັນດານິຕິກໍາທີ່​ກ່ຽວຂ້ອງເພື່ອເຫັນດີເປັນເອກະພາບໃນການຈັດຕັ້ງປະຕິບັດ​ໃນ​​ຕໍ່​ໜ້າ.

(ຂ່າວ-ພາບ: ກະ​ຊວງ​ການ​ເງິນ)