ທ່ານ ບໍ່ວຽງຄໍາ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ໃຫ້ກຽດຕ້ອນຮັບ ທ່ານ ໂຄບາຢາຊິ ເຄນອິຈິ (KOBAYASHI Kenichi) ເອກອັກຄະຣາຊະທູດວິ ສາມັນຜູ້ມີອຳນາດເຕັມ ແຫ່ງປະເທດຍີ່ປຸ່ນ ປະຈຳ ສປປ ລາວ ຄົນໃໝ່ ເຂົ້າຢ້ຽມຂໍ່ານັບ ໃນ​ວັນ​ທີ 10 ກຸມ​ພາ ນີ້ ທີ່​ກະ​ຊວງ ຕ​ສ ເນື່ອງໃນໂອກາດທີ່ມາດໍາລົງຕໍາແໜ່ງເປັນເອກອັກຄະຣາຊະທູດ ປະຈໍາ ສປປ ລາວ ຄົນໃໝ່.

ໃນໂອກາດນີ້, ທ່ານ ບໍ່ວຽງຄຳ ວົງດາລາ ໄດ້ສະແດງຄວາມຕ້ອນຮັບ, ຊົມເຊີຍ ແລະ ຕີລາຄາສູງ ຕໍ່ທ່ານ ໂຄບາຢາຊິ ເຄນອິຈິ ທີ່​ໄດ້​ປະຕິບັດ​ໜ້າ​ທີ່​ການ​ທູ​ດຢູ່ ສປປ ລາວ ​ຊຶ່ງ​ເປັນ​ການ​ປະກອບສ່ວນ​ອັນ​ສຳຄັນເຂົ້າ​ໃນ​ການ​ເສີມ​ຂະ​ຫຍາ​ຍສາຍ​ພົວພັນ​ມິດຕະພາບ ​ແລະ ການ​ຮ່ວມ​ມື​ ລະຫວ່າງ​ສອງປະ​ເທດໃຫ້​ມີ​ຄວາມແໜ້ນ​ແຟ້ນ ​ແລະ ​ແຕກ​ດອກ​ອອກ​ຜົນຍິ່ງ​ຂຶ້ນ. ພ້ອມນີ້, ໄດ້ສະແດງຄວາມຂອບໃຈຕໍ່ການຊ່ວຍ ເຫຼືອຂອງ​ຍີ່​ປຸ່ນ​ໃນໄລຍະຜ່ານມາ ໂດຍສະເພາະແມ່ນການຊ່ວຍເຫຼືອ ທາງດ້ານການຈັດຝຶກອົບຮົມຕ່າງໆ ເພື່ອພັດທະນາຊັບພະຍາກອນມະນຸດ ຢູ່ ສປປ ລາວ ແລະ ຊ່ວຍເຫຼືອສ້າງສູນຂໍ້ມູນທີ່ນຳໃຊ້ພະລັງງານ ຢ່າງມີປະສິດທິພາບແຫ່ງ ສປປ ລາວ (Lao PDR Energy Efficient Data Center) ໂດຍຜ່ານອົງການພັດທະນາອຸດສາຫະກຳ ເຕັກໂນໂລຊີ ແລະ ພະລັງງານໃໝ່ ຊຶ່ງໄດ້ເປີດນຳໃຊ້ ວັນທີ 29 ພະຈິກ 2016 ທີ່ຜ່ານມາ. ໃນໂອກາດດຽວກັນ, ທັງສອງຝ່າຍໄດ້ມີການປຶກສາຫາລື  ​ແລະ ​ແລກປ່ຽນ​ຄຳ​ຄິດ​ຄຳ​ເຫັນ ກ່ຽວກັບການຮ່ວມມືກັນທາງດ້ານຂະແໜງການເຕັກໂນໂລຊີ ແລະ ການສື່ສານ ກໍຄືການເສີມ ຂະຫຍາຍສາຍພົວພັນ ຮ່ວມມືອັນດີງາມລະຫວ່າງ ລາວ - ຍີ່ປຸ່ນ ໃຫ້ມີການຂະຫຍາຍຕົວເພີ່ມຂຶ້ນເລື້ອຍໆ.

ທ່ານ ໂຄບາຢາຊິ ເຄນອິຈິ ໄດ້ສະແດງຄວາມຂອບໃຈຕໍ່ ທ່ານ ບໍ່ວຽງຄຳ ວົງດາລາ ທີ່​ໄດ້​​ໃຫ້ກຽດ ຕ້ອນ​ຮັບຢ່າງ​ອົບ​ອຸ່ນໃນ​ຄັ້ງ​ນີ້ ແລະ ຈະສືບຕໍ່ຊຸກ​ຍູ້​ການພົວ​ພັນ​ຮ່ວມ​ມືໃນຕໍ່ໜ້າ ໂດຍສະເພາະໃນຂະແໜງ ເຕັກໂນໂລຊີ ແລະ ການສື່ສານ ໃຫ້​ໄດ້​ຮັບການເສີມຂະ​ຫຍາຍ​​ຍິ່ງຂຶ້ນເລື້ອຍໆ.

ຂ່າວ-ພາບ: ຫ້ອງການກະຊວງ ຕສ