ກອງປະຊຸມພັດທະນາລະບົບຄຸ້ມຄອງວຸດທິບັດ ໄດ້ຈັດຂຶ້ນໃນວັນທີ 14 ກຸມພາ ຜ່ານມານີ້ ທີ່ຫ້ອງປະຊຸມໂຮງຮຽນເຕັກນິກວິຊາຊີບ ແບບປະສົມ ແຂວງອຸດົມໄຊ ໂດຍການເປັນປະທານຂອງ ທ່ານ ລັດສະໝີ ທຳມະວົງ ຮອງຫົວໜ້າກົມປະກັນຄຸນນະພາບການສຶກສາ ກະຊວງສຶກສາທິການ ແລະ ກິລາ, ມີທ່ານ ບຸນຄ້ຳ ປັນຍາສັກ ຮອງຫົວໜ້າໂຮງຮຽນເຕັກນິກວິຊາຊີບ ແບບປະສົມແຂວງ, ມີແຂກ​ຖືກ​ເຊີນ ແລະ ຂະແໜງການກ່ຽວຂ້ອງເຂົ້າຮ່ວມ.

      ຈຸດປະສົງຂອງກອງ​ປະ​ຊຸມຄັ້ງນີ້, ເພື່ອເປັນການເຜີຍແຜ່ດຳລັດວ່າດ້ວຍຂອບວຸດທິການສຶກສາແຫ່ງຊາດ, ດຳລັດສະບັບນີ້ ກຳນົດຫຼັກການ ແລະ ລະບຽບການກ່ຽວກັບການຄຸ້ມຄອງ ແລະ ຕິດຕາມກວດກາ ວຽກງານຂອບວຸດທິການສຶກສາແຫ່ງຊາດ ເພື່ອເຮັດໃຫ້ວຽກງານດັ່ງກ່າວລວມສູນ, ເປັນເອກະພາບ, ມີປະສິດທິພາບ ແລະ ປະສິດທິຜົນ ແນໃສ່ສະໜັບສະໜູນການຮຽນຕໍ່ລະຫວ່າງຊັ້ນ ແລະ ສາຍ, ການຮຽນຮູ້ຕະຫຼອດຊີວິດ ແລະ ການຮັບຮູ້ວຸດທິການສຶກສາ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ໃນແຕ່ລະໄລຍະ ແລະ ສາມາດເຊື່ອມໂຍງກັບ ພາກພື້ນ ແລະ ສາກົນ ຊຶ່ງດຳລັດດັ່ງກ່າວປະກອບມີ  7 ໝວດ 35 ມາດຕາ.

(ຂ່າວ-ພາບ: ແສງອາທິດ)