ຄະນະສະຖາປັດຕະຍະກຳສາດ (ຄສປ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີເປີດໂຄງການກໍ່ສ້າງສວນສາທາລະນະເພື່ອການຮຽນຮູ້ຂຶ້ນໃນວັນທີ 22 ກຸມພາ ຜ່ານມານີ້ ທີ່ຄະນະ ຄສປ ໂດຍມີ ທ່ານ ອຸດົມ ພອນຄຳເພັງ ຮັກສາການອະທິການບໍດີ ມຊ, ທ່ານ ສິນທະວອນ ດາລາວົງ ຄະນະບໍດີ ຄສປ, ມີບັນດາແຂກຖືກເຊີນ ​ແລະ ພະນັກງານກ່ຽວຂ້ອງເຂົ້າຮ່ວມ.

     ທ່ານ ສິນທະວອນ ດາລາວົງ ໄດ້ລາຍງານໃຫ້ຮູ້ວ່າ: ສວນສາທາລະນະເພື່ອການຮຽນຮູ້ມີເນື້ອທີ່ທັງໝົດ 4 ເຮັກຕາກວ່າ, ເພື່ອຕອບສະໜອງຕໍ່ກິດຈະກຳການສຶກສາໃຫ້ຄົບຖ້ວນຕາມ 5 ຫຼັກມູນ ທີ່ກະຊວງສຶກສາທິການ ແລະ ກິລາວາງອອກ ພ້ອມທັງຕອບສະໜອງຕາມວິໄສທັດການພັດທະນາຮອດປີ 2030 ແລະ ແຜນຍຸດທະສາດການພັດທະນາປີ 2016-2025 ຂອງ ມຊ, ເພື່ອສ້າງເງື່ອນໄຂໃຫ້ແກ່ການຫັນການຮຽນ-ການສອນລົງສູ່ພາກປະຕິບັດຕົວຈິງໃຫ້ຫຼາຍຂຶ້ນ ໂດຍມີຈຸດປະສົງສ້າງເປັນສວນສາທາລະນະເພື່ອການຮຽນຮູ້ວິຊາການດ້ານຕ່າງໆ ໂດຍຕິດພັນກັບວິຊາການຮຽນ-ການສອນ ແລະ ການຝຶກຫັດຂອງຄູ-ອາຈານ ແລະ ນັກສຶກສາ ບໍ່ສະເພາະແຕ່ຄະນະສະຖາປັດຕະຍະກໍາສາດແຕ່ຍັງລວມເຖິງຄະນະອື່ນໆ, ນອກຈາກນີ້ຍັງສ້າງເປັນພິພິທະພັນວັດທະນະທໍາບັນດາຊົນເຜົ່າ ເພື່ອໃຫ້ນັກສຶກສາໄດ້ຮຽນຮູ້ສະຖາປັດຕະຍະກໍາທ້ອງຖິ່ນຊົນເຜົ່າຕ່າງໆ, ສ້າງເປັນສວນຕົ້ນໄມ້ ແລະ ດອກໄມ້ສາຍພັນຕ່າງໆ ເພື່ອເຮັດໃຫ້ນັກສຶກສາໄດ້ຮຽນຮູ້ການອອກແບບຈັດສວນຕົ້ນໄມ້, ສ້າງເປັນສະຖານທີ່ເຕົ້າໂຮມຂອງຄູ-ອາຈານ ແລະ ນັກສຶກສາ ເພື່ອຈັດກິດຈະກໍາຕ່າງໆເຊັ່ນ: ເປັນສະຖານທີ່ພັກຜ່ອນອອກກຳລັງກາຍ, ຈັດງານຕະຫຼາດນັດຜະລິດຕະພັນນັກສຶກສາ, ພື້ນທີ່ຈັດວາງສະແດງຜົນງານທາງວິຊາການຕ່າງໆຂອງຄູ - ອາຈານ ແລະ ຜົນງານຂອງນັກສຶກສາ ແລະ ຈັດງານເທດສະການຕ່າງໆຂອງ ມຊ, ສ້າງຫໍມູນເຊື້ອ ມຊ ເພື່ອເປັນບ່ອນວາງສະ ແດງການກຳເນີດ ແລະ ເຕີບໃຫຍ່ຂະຫຍາຍຕົວຂອງ ມຊ ເພື່ອເປັນສະຖານທີ່ເອື້ອອໍານວຍຄວາມສະດວກໃຫ້ແກ່ຄູ-ອາຈານ ແລະ ນັກສຶກສາໃຫ້ກາຍເປັນພື້ນທີ່ສວນສາທາລະນະທີ່ມີຄວາມໂດດເດັ່ນສວຍງາມປະດັບເອ້ໃຫ້ແກ່ ມຊ ເພື່ອໃຫ້ມວນຊົນສາມາດເຂົ້າມານໍາໃຊ້ຢ່າງພ້ອມພຽງ ຊຶ່ງມູນຄ່າການກໍ່ສ້າງໃນເບື້ອງຕົ້ນແມ່ນ 6 ຕື້ກີບ.

      ທ່ານ ອຸດົມ ພອນຄຳເພັງ ກ່າວວ່າ: ເປົ້າໝາຍໃນການສ້າງສວນສາທາລະນະແຫ່ງນີ້ເປັນຈຸດໃຈກາງໃນການພັກຜ່ອນ, ຮຽນຮູ້ຕ່າງໆ ຈຶ່ງໄດ້ຕັດສິນໃຈສ້າງສະຖານທີ່ດັ່ງກ່າວນີ້ເປັນສວນສວຍສົດງົດງາມ, ສ້າງປະໂຫຍດຢ່າງຫຼວງຫຼາຍໃຫ້ການຮຽນຮູ້ຕະຫຼອດຊີວິດ ຊຶ່ງໄດ້ເຕົ້າໂຮມເອົາບັນດາແຫຼ່ງຄວາມຮູ້ຕ່າງໆມາລວມໄວ້ຢູ່ໃນສວນແຫ່ງນີ້ເພື່ອເປັນສັນຍາລັກຂອງການພັດທະນາດ້ານວິຊາການ ແລະ ເປັນສັນຍາລັກຂອງຄວາມສາມັກຄີ.

ຂ່າວ-ພາບ: ພູວັນ