ພະແນກກະສິກຳ ແລະ ປ່າໄມ້ ແຂວງອຸດົມໄຊ ໄດ້ຈັດກອງປະຊຸມສະຫຼຸບປິດໂຄງການຄຸ້ມຄອງປ່າສະຫງວນແຫ່ງຊາດ ພູຫີຜີ CBI 003 ODX ຂຶ້ນເມື່ອບໍ່​ດົນ​ມານີ້ ທີ່ຫ້ອງປະຊຸມພະແນກ​ດັ່ງ​ກ່າວ ໂດຍການເປັນປະທານຂອງ ທ່ານ ບຸນເກີດ ສະໜອງໄຊ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ມີທ່ານ ຫຸມພັນ ບຸບຜາຄຳ ເຈົ້າເມືອງໆຫຼາ, ມີຫົວໜ້າຫ້ອງການກະສິກຳເມືອງຫຼາ, ເມືອງໄຊ ພ້ອມດ້ວຍ ນາຍບ້ານເຂດປ່າສະຫງວນພູຫີຜີ ແລະ ວິຊາການທີ່ກ່ຽວຂ້ອງເຂົ້າຮ່ວມ.

ໂຄງການຄຸ້ມຄອງປ່າສະຫງວນແຫ່ງຊາດພູຫີຜີແມ່ນໂຄງການໜຶ່ງ ຊຶ່ງໄດ້ຮັບທຶນສະໜັບສະໜູນຈາກ ກອງທຶນປົກປັກຮັກສາສິ່ງແວດລ້ອມ ກປສ ເປັນໄລຍະທີ 1 ໄດ້ເຊັນສັນຍາ ໃນຄັ້ງວັນທີ 11 ກໍລະກົດ 2016 ລວມມູນຄ່າທັງໝົດ 700 ລ້ານກີບ ມີໄລຍະໃນການຈັດຕັ້ງປະຕິບັດ 5 ປີ (2016-2020). ປ່າສະຫງວນແຫ່ງຊາດພູຫີຝີມີເນື້ອທີ່ທັງໝົດ 87.350 ຮຕ ກວມເອົາ ເມືອງໄຊ ແລະ ເມືອງຫຼາ. ໃນນັ້ນ, ກວມເອົາ 8 ບ້ານເປົ້າໝາຍຂອງສອງເມືອງ, ມີຈໍານວນຄອບຄົວ ທັງໝົດ 735 ຄອບຄົວ, ມີພົນລະເມືອງທັງໝົດ 3.629 ຄົນ ຍິງ 1.809 ຄົນ. ມີກິດຈະກຳຕົ້ນຕໍຫຼັກແມ່ນໄດ້ເນັ້ນໃສ່ການຝຶກອົບຮົມສ້າງຄວາມເຂັ້ມແຂງ ໃນການຄຸ້ມຄອງປ່າສະຫງວນ ແລະ ອະນຸລັກຊີວະນາໆພັນ, ການເຜີຍແຜ່ສ້າງຈິດສຳນຶກ, ຈັດຕັ້ງແຜນອະນຸລັກປ່າໄມ້ບ້ານ, ກອງທຶນບ້ານເພື່ອພັດທະນາບ້ານ, ກຳນົດຕັ້ງປ້າຍຊີ້ບອກ, ປັກຫຼັກໝາຍເຂດແດນ, ຝຶກອົບຮົມກ່ຽວກັບການຄຸ້ມຄອງປ່າສະຫງວນໃຫ້ພະນັກງານ ເມືອງ ແລະ ບ້ານ, ຝຶກອົບຮົມກ່ຽວກັບການຄຸ້ມຄອງຊີວະນາໆພັນ ແລະ ແຜນ​ງານ​ອື່ນໆ. ຜ່ານການປະຕິບັດຂອງໂຄງການມີຫຼາຍດ້ານທີ່ພົ້ນເດັ່ນ ເຊັ່ນ: ພະນັກງານ ແລະ ປະຊາຊົນຈຳນວນ 199 ສະຫາຍ ຍິງ 113 ຄົນໄດ້ຮັບການຍົກລະດັບ, ມີຂອບເຂດ, ຫຼັກໝາຍ ຈຳນວນ 80 ຫຼັກ, ປ້າຍຈໍານວນ 8 ປ້າຍ, ມີແຜນຄຸ້ມຄອງໄລຍະຍາວ ເນື້ອທີ່ປ່າສະຫງວນ 87.350 ເຮັກຕາ ໄດ້ຮັບການປົກປັກຮັກສາເນື້ອທີ່ປ່າພາຍໃນ 100 ເຮັກຕາ ໄດ້ຮັບການຟື້ນຟູໃຫ້ເປັນປ່າ, ສັດສາວາສິ່ງ ພຶດພັນນາໆ ໄດ້ຮັບການປົກປັກຮັກສາ ແລະ ຂະຫຍາຍພັນໃນລະດັບດີ, ພ້ອມນີ້ ຍັງໄດ້ເປີດກວ້າງປຶກສາຫາລື ແລກປ່ຽນຄວາມຄິດເຫັນໃນວຽກງານຄຸ້ມຄອງປ່າໄມ້ຕື່ມອີກ.

(ຂ່າວ-ພາບ: ແສງອາທິດ)