ໜັງສືພິມ ປະຊາຊົນ

ເລີ່ມລົງມືກໍ່ສ້າງສະຖາບັນເຕັກໂນໂລຊີການສື່ສານຂໍ້ມູນຂ່າວສານ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 27/04/2022 13:29:10 ຈຳນວນຢ້ຽມຊົມ 27945 ຄັ້ງ

ພິທີວາງສີລາລືກໂຄງການກໍ່ສ້າງ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ຢູ່ນະຄອນຫຼວງວຽງຈັນ ເນື່ອງໃນໂອກາດວັນສ້າງຕັ້ງສາຍພົວພັນທາງການທູດລະຫວ່າງ ສອງປະເທດ ລາວ-ຈີນ ຄົບຮອບ 61 ປີ, ໂດຍແມ່ນ ກຸ່ມບໍລິສັດກໍ່ສ້າງເສັ້ນທາງລົດໄຟແຫ່ງປະເທດຈີນ ຈຳກັດ ເປັນຜູ້ຮັບເໝົາກໍ່ສ້າງ.

ພິທີດັ່ງກ່າວໄດ້ຈັດຂຶ້ນໃນວັນທີ 25 ເມສາ ຜ່ານມາ ທີ່ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໂດຍມີ ທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ທ່ານ ຈຽງ ຈ່າຍຕົງ ເອກອັກຄະລັດຖະທູດ ສປ ຈີນ ປະຈຳ ສປປ ລາວ, ມີພາກສ່ວນກ່ຽວຂ້ອງເຂົ້າຮ່ວມ.

ໂຄງການດັ່ງກ່າວຕັ້ງຢູ່ພາຍໃນສະຖາບັນເຕັກໂນໂລຊີການສື່ສານຂໍ້ມູນຂ່າວສານ ນະຄອນຫຼວງວຽງຈັນ ຊຶ່ງຈະເປັນພາຫະນະທີ່ສຳຄັນຂອງແຜນຍຸດທາສາດການເຊື່ອມຕໍ່ລະບົບການສື່ສານຂໍ້ມູນຂ່າວສານ ລະຫ່ວາງ ສປ ຈີນ ກັບ ອາຊຽນ, ປະກອບມີສູນຝຶກອົບຮົມ 1 ຕຶກ ສູງ 5 ຊັ້ນ, ເນື້ອທີ່ກໍ່ສ້າງ 5.500 ຕາແມັດ, ໃນຕຶກລວມມີຫ້ອງຮຽນ, ຫ້ອງທົດລອງ, ຫໍສະໝຸດ, ຫ້ອງປະຊຸມ ແລະ ອື່ນໆ ຊຶ່ງປະກອບມີເຄື່ອງອຸປະກອນການສຶກສາ ແລະ ອຸປະກອນຫ້ອງທົດລອງທີ່ຈຳເປັນ ແລະ ສະໜອງຫຼັກສູດຝຶກອົບຮົມ ໃຫ້ແກ່ອາຈານ ແລະ ນັກຝຶກອົບຮົມ ຂອງຝ່າຍ ລາວ.
ທ່ານ ຈຽງ ຈ່າຍຕົງ ໄດ້ກ່າວວ່າ: ຝ່າຍຈີນຈະເພີ່ມຄວາມຮ່ວມມືທາງດ້ານການສຶກສາວິຊາຊີບ, ບໍລິການໆພັດທະນາເສດຖະກິດ-ສັງຄົມ ຂອງ ສປປ ລາວ ແລະ ໃຫ້ການຮ່ວມມືທາງພາກປະຕິບັດຢ່າງໃກ້ຊິດ, ເພື່ອຜົນປະໂຫຍດຂອງສອງຊາດ ໂດຍສະເພາະແມ່ນປະຊາຊົນຂັ້ນຮາກຖານ, ພາຍຫຼັງເລີ່ມຕົ້ນໂຄງການແລ້ວ, ຝ່າຍຈີນຈະດຳເນີນການຝຶກອົບຮົມໃຫ້ແກ່ຄູ-ອາຈານຝ່າຍລາວ ລວມທັງໝົດ 312 ຄົນ, ເພື່ອເປັນການອຸດທິ “ພູມປັນຍາຂອງຈີນ” ແລະ ”ແບບແຜນຂອງຈີນ” ໃຫ້ແກ່ການພັດທະນາເສດຖະກິດ-ສັງຄົມຂອງ ສປປ ລາວ. ສໍາລັບໂຄງການຊ່ວຍເຫຼືອສະຖາບັນເຕັກໂນໂລຊີການສື່ສານຂໍ້ມູນຂ່າວສານແມ່ນສືບຕໍ່ຈາກໂຄງການທາງລົດໄຟ ລາວ-ຈີນ ຊຶ່ງເປັນການກໍ່ສ້າງໂຄງການທີ 2 ຂອງ ກຸ່ມບໍລິສັດກໍ່ສ້າງທາງລົດໄຟ ແຫ່ງປະເທດຈີນ ຈຳກັດ ທີ່ຢູ່ພາຍໃນ ສປປ ລາວ.

ທ່ານ ບໍ່ວຽງຄຳ ວົງດາລາ ໄດ້ສະແດງຄວາມຂອບໃຈຢ່າງສູງມາຍັງຝ່າຍຈີນ ທີ່ໄດ້ປະກອບ ສ່ວນໃນການພັດທະນາວຽກງານການສຶກສາໃນດ້ານການສື່ສານຂໍ້ມູນຂ່າວສານ ຊຶ່ງຈະເປັນການເພີ່ມຂີດຄວາມສາມາດຂອງການຮ່ວມມືຕື່ມອີກບາດກ້າວໜຶ່ງລະຫ່ວາງ ລາວ-ຈີນ ຕາມຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”
ພາຍຫຼັງໂຄງການນີ້ກໍ່ສ້າງສໍາເລັດ ຈະເຮັດໃຫ້ພາກປະຕິບັດຕົວຈິງຂອງສອງປະເທດ ລາວ-ຈີນ ຕາມແລວທາງ “ໜຶ່ງແລວໜຶ່ງເສັ້ນທາງ”, ໂດຍສະເພາະແມ່ນການຝຶກອົບຮົມເຕັກໂນໂລຊີ ການສື່ສານລະບົບເຄືອຂ່າຍໄຮ້ສາຍ 4G/5G ໃຫ້ແກ່ບຸກຄະລາກອນເຕັກນິກຂອງຝ່າຍລາວ ພ້ອມທັງສ້າງລະບົບການຝຶກອົບຮົມບຸກຄະລາກອນໃໝ່ ແລະ ຄົບຊຸດ ເພື່ອເປັນການກະຕຸກຊຸກຍູ້ການພັດທະນາເຕັກນິກການສື່ສານຂອງທ້ອງຖິ່ນ, ເພີ່ມຄວາມເຊື່ອຖື ແລະ ການຊ່ວຍເຫຼືອຊຶ່ງກັນ ແລະ ກັນລະຫວ່າງປະຊາຊົນສອງຊາດລາວ-ຈີນ ໄດ້ບັນລຸເປົ້າໝາຍຮ່ວມກັນຂອງການພັດທະນາເສດຖະກິດຂອງສອງປະເທດຕື່ມອີກ.