ທ່ານ ທະວິສັກ ໄຊຍະວົງ ວ່າການເລຂາພັກເມືອງ ວ່າການເຈົ້າເມືອງ ພ້ອມດ້ວຍຄະນະນຳເມືອງເງິນ ແຂວງໄຊຍະບູລີ ໄດ້ຕ້ອນຮັບທ່ານ ມອນໄຊ ລາວມົວຊົງ ກຳມະການສຳຮອງສູນກາງພັກ ເລຂາ ຄຊປປລ ສູນກາງ ແລະ ທ່ານນາງ ເພັດສະໝອນ ບຸດດາ ຮອງເລຂາຄະນະບໍລິຫານງານຊາວໜຸ່ມ ແຂວງຄຳມ່ວນ ພ້ອມດ້ວຍທີມງານໄດ້ເດີນທາງເຄື່ອນໄຫວຢ້ຽມຢາມບ້ານຈັດສັນໃໝ່ ບ້ານກິ່ວງີ້ວ ເມືອງເງິນ ໃນວັນທີ 4 ພຶດສະພາ ຜ່ານມາ.

ທ່ານ ທອງພັນ ສຸກສະຫວັດ ຮອງເຈົ້າໆເມືອງເງິນ ຄະນະຮັບຜິດຊອບຊີ້ນຳການຍົກຍ້າຍ-ຈັດສັນບ້ານກິ່ວງີ້ວ ໄດ້ລາຍງານສະພາບການຍົກຍ້າຍຈັດສັນບ້ານກິ່ວງີ້ວໂດຍຫຍໍ້ວ່າ: ບ້ານກິ່ວງີ້ວແມ່ນບ້ານໜຶ່ງໃນ 22 ບ້ານຂອງເມືອງເງິນ ປະກອບມີ 2 ເຜົ່າຄື: ເຜົ່າມົ້ງ ແລະ ເຜົ່າກຶມມຸ, ມີ 10 ໜ່ວຍ, 108 ຄອບຄົວ, ມີປະຊາກອນທັງໝົດ 652 ຄົນ ຍິງ 314 ຄົນ, ຫ່າງຈາກເທດສະບານເມືອງ 21 ກິໂລແມັດ. ມາຮອດປັດຈຸບັນໄດ້ສຳເລັດການເກັບກຳຂໍ້ມູນຊັບສິນຕ່າງໆ, ທີ່ດິນປຸກສ້າງ, ດິນທຳການຜະລິດຢູ່ເຂດເກົ່າ ແລະ ປະຕິບັດການຊົດເຊີຍຄ່າເສຍຫາຍຕ່າງໆພາຍໃນບ້ານຕາມເງື່ອນໄຂທີ່ກຳນົດໄວ້ໃນຂໍ້ຕົກລົງ 948 ຂອງທ່ານເຈົ້າແຂວງສໍາເລັດໂດຍພື້ນຖານ. ການກໍ່ສ້າງພື້ນຖານໂຄງລ່າງພາຍໃນບ້ານຈັດສັນໃໝ່ມີທັງໝົດ 6 ກິດຈະກຳຄື: ໂຄງການກໍ່ສ້າງເຮືອນຈຳນວນ 136 ຫຼັງ, ເລີ່ມລົງມືກໍ່ສ້າງແຕ່ເດືອນມີນາ ຫາ ເດືອນພະຈິກ 2021 ໃຊ້ເວລາ 9 ເດືອນ, ໂຄງການກໍ່ສ້າງເສັ້ນທາງພາຍໃນບ້ານ, ໂຄງການກໍ່ສ້າງລະບົບໄຟຟ້າ, ໂຄງການກໍ່ສ້າງລະບົບນ້ຳໃຊ້ພາຍໃນບ້ານ, ໂຄງການກໍ່ສ້າງໂຮງຮຽນອະນຸບານ ແລະ ໂຮງຮຽນປະຖົມ, ໂຄງການກໍ່ສ້າງຫໍປະຊຸມບ້ານ, ສາລາສັງເວດ ແລະ ຕະຫຼາດ, ປັດຈຸບັນການຍົກຍ້າຍປະຊາຊົນມາອາໄສຢູ່ບ້ານຈັດສັນໃໝ່ກິ່ວງີ້ວໄດ້ສຳເລັດໃນທ້າຍເດືອນກຸມພາ 2022 ນີ້.

      ສຳລັບທິດທາງແຜນການໃນຕໍ່ໜ້າຈະສືບຕໍ່ຈັດສັນທີ່ດິນທຳການຜະລິດ, ສືບຕໍ່ກໍ່ສ້າງເສັ້ນທາງເຂົ້າຫາເຂດທຳການຜະລິດ ແລະ ຟື້ນຟູອາຊີບໃຫ້ແກ່ປະຊາຊົນບ້ານກິ່ວງີ້ວ, ໃນໂອກາດນີ້, ທີມງານຄະນະບໍລິຫານງານຊາວໜຸ່ມສູນກາງ, ແຂວງ, ເມືອງ ຍັງໄດ້ລົງຢ້ຽມຢາມສວນໝາກລິ່ນຈີ່ ຂອງປະຊາຊົນບ້ານຫ້ວຍເຜີ້ງ ອີກດ້ວຍ.

ຂ່າວ-ພາບ: ອິນແປງ ແຫວນຄຳ