ໜັງສືພິມ ພາສາຕ່າງປະເທດ ໄດ້ຈັດກອງປະຊຸມ ສຳມະນາໃນຫົວຂໍ້” ນະໂຍບາຍ ການຕ່າງປະເທດຂອງ ສ​ປ​ປ ລາວ ໃນຍຸກໃໝ່ ແລະ ສະຖານະການໂລກໃນປັດຈຸບັນ ແລະ ການຕະຫຼາດສື່ແບບໃໝ່ໃນຍຸກໂລກາພິວັດ ຂຶ້ນເມື່ອວັນທີ 6 ພຶດສະພາ ນີ້ ທີ່ສຳນັກງານໜັງສືພິມພາສາຕ່າງປະເທດ (ຮູບແບບອອນລາຍ) ໂດຍການເປັນປະທານຂອງ ທ່ານ ທອງຫຼໍ່ ດວງສະຫວັດ ຫົວໜ້າບັນນາທິການ ໜັງສືພິມພາສາຕ່າງປະເທດ ມີນັກວິທະຍາກອນ, ຄະນະບັນນາທິການ ແລະ ພະນັກງານເຂົ້າຮ່ວມ.

     ທ່ານ ທອງຫຼໍ່ ດວງສະຫວັນ ກ່າວວ່າ: ການສຳມະນາດັ່ງກ່າວ ແມ່ນເພື່ອໃຫ້ນັກຮົບສື່ມວນຊົນໄດ້ມີໂອກາດຮັບຮູ້ ແລະ ເຂົ້າໃຈໃນຫົວຂໍ້ທີ່ສຳຄັນດັ່ງກ່າວ ຊຶ່ງສື່ມວນຊົນຕ້ອງຮຽນຮູ້ຮອບທິດ, ກຳໄດ້ສະຖານະການທັງໃນອະດີດ ແລະ ໃນປັດຈຸບັນທີ່ມີລະບົບຂໍ້ມູນຂ່າວສານໄດ້ເຊື່ຶອມໂຍງ​ກັນ ຊຶ່ງມີທັງອັນດີ ແລະ ອັນບໍ່ດີທີ່ໄດ້ສ້າງຂຶ້ນໃນທຸກໆວິນາ​ທີ,ເພາະພວກເຮົາເປັນຜູ້ນຳເອົາຂໍ້ມູນຂ່າວສານທີ່ຖືກຕ້ອງຊັດເຈນ, ວ່ອງໄວທັນກັບເຫດການມາບໍລິການສັງຄົມຜ່ານຫຼາກຫຼາຍຮູບແບບ ຫຼາຍສີສັນໄປສູ່ກຸ່ມເປົ້າໝາຍທັງພາຍໃນ ແລະ ຕ່າງປະເທດ ສະນັ້ນ, ພວກເຮົາຕ້ອງກຳແໜ້ນແນວທາງນະໂນບາຍຂອງພັກ-ກົດໝາຍຂອງ​ລັດ ແລະ ລະບຽບການຕ່າງໆ, ອັນສຳຄັນອີກອັນໜຶ່ງ ແມ່ນແນວທາງການຕ່າງປະເທດຂອງ ສປປ ລາວ, ພ້ອມນີ້ຍັງເປັນການພັດທະນາບຸກຄະລາກອນສື່ມວນຊົນລາວກ້າວສູ່ຄຸນນະພາບໃໝ່, ທັນສະໄໝ, ວ່ອງໄວ, ຊັດເຈນ ແລະ ທັນກັບເຫດການ, ຂະຫຍາຍຂອບເຂດການພົວພັນຮ່ວມມື ແລະ ເຊື່ອມໂຍງກັບເວທີສື່ມວນຊົນສາ​ກົນໃຫ້ນັບມື້ນັບກວ້າງຂວາງຕາມວິໃສທັດຂອງກະຊວງຖະແຫຼງຂ່າວ, ວັດທະນະທຳ ແລະ ທ່ອງທຽວ.

     ທ່ານກ່າວຕື່ມວ່າ: ເພື່ອຄວາມຍືນຍົງຂອງອົງການສື່ ແລະ ອາຊີບສື່ ພວກເຮົາຕ້ອງໄດ້ພັດທະນາຕົນເອງ ແລະ ສື່ຂອງຕົນໃຫ້ສອດຄ່ອງໄປຄຽງຄູ່ກັບຍຸກສະໄໝ ໂດຍຊອກຫາກົນໄກ, ວິທີ ແລະ ຊ່ອງທາງ ເພື່ອເຮັດແນວໃດໃຫ້ອົງການສື່ຂອງຕົນມີລາຍຮັບປະຈຳວັນເພື່ອມາຮັບໃຊ້ເຂົ້າໃນວຽກງານວິຊາສະເພາະກໍຄືຮັບໃຊ້ໜ້າທີ່ການເມືອງຂອງຕົນຕາມພັກ-ລັດ ແລະ ປະຊາຊົນມອບໝາຍໃຫ້.

     ການສຳມະນາຄັ້ງນີ້ຜູ້ເຂົ້າຮ່ວມ ໄດ້ຮັບຟັງ 2 ຫົວຂໍ້ສຳຄັນຄື ” ນະໂຍບາຍ ການ ຕ່າງປະເທດຂອງລາວໃນຍຸກໃໝ່ ແລະ ສະຖານການໂລກໃນປັດຈຸບັນ ແລະ ຫົວຂໍ້ “ການຕະຫຼາດສື່ແບບໃໝ່ໃນຍຸກໂລກາພິວັດ”.

(ຂ່າວ-ພາບ: ສຳນານ)