ຫວ່າງບໍ່ດົນມານີ້ ທີ່ຫ້ອງປະຊຸມເມືອງສຸຂຸມາ ແຂວງຈຳປາສັກ ໄດ້ຈັດພິທີມອບ-ຮັບໃບຢັ້ງຢືນ 3 ດີ, 6 ຮັກສາຂອງສະຫະພັນນັກຮົບເກົ່າເມືອງສຸຂຸມາ ປະຈຳປີ 2021 ໂດຍການເຂົ້າຮ່ວມຂອງທ່ານນາງ ຄ່າຍແກ້ວ ສິງຫາວົງ ຮອງເລຂາພັກເມືອງສຸຂຸມາ, ທ່ານ ພັອ ບຸນມາກ ວິລະວົງ ປະທານສະຫະພັນນັກຮົບເກົ່າແຂວງຈຳປາສັກ, ມີທ່ານ ຄຳສິງ ໄຊຍະພອນ ຄະນະປະຈຳພັກເມືອງ ປະທານແນວລາວສ້າງຊາດເມືອງ ຜູ້ຊີ້ນຳວຽກງານອົງການຈັດຕັ້ງມະຫາຊົນເມືອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

      ໃນພິທີໄດ້ຜ່ານຂໍ້ຕົກລົງຂອງປະທານສະຫະພັນນັກຮົບເກົ່າແຂວງຈຳປາສັກ ວ່າດ້ວຍການມອບໃບຢັ້ງຢືນ 3 ດີ, 6 ຮັກສາ ປະຈຳປີ 2021 ໃຫ້ບຸກຄົນ 22 ຄົນ ຍິງ 1 ຄົນ, ປະເພດກົມກອງລວມໝູ່ 1 ກົມກອງ ແລະ 7 ໜ່ວຍຮາກຖານ. ໂດຍການໃຫ້ກຽດມອບຂອງທ່ານນາງ ຄ່າຍແກ້ວ ສິງຫາວົງ ແລະ ທ່ານ ພັອ ບຸນມາກ ວິລະວົງ ໃນໂອກາດນີ້, ທ່ານປະທານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໄລຍະຜ່ານມາ ພ້ອມຮຽກຮ້ອງໃຫ້ສະຫະພັນນັກຮົບເກົ່າເມືອງ ສືບຕໍ່ເອົາໃຈໃສ່ໃນການຈັດຕັ້ງປະຕິບັດຂໍ້ແຂ່ງຂັນ 3 ດີ, 6 ຮັກສາຂອງສະຫະພັນນັກຮົບເກົ່າເມືອງໃຫ້ດີຂຶ້ນກ່ວາເກົ່າ.

ຂ່າວ-ພາບ: ປັນຍາ ແກ້ວພິລົມ