ຄະນະໂຄສະນາອົບຮົມ ເມືອງລະຄອນເພັງ ແຂວງສາລະວັນ ປາຖະກະຖາເລົ່າຄືນມູນເຊື້ອ 4 ວັນສໍາຄັນປະຫວັດສາດຂອງພັກ-ຂອງຊາດ ແລະ ສາກົນ ຄື: ວັນກໍາມະກອນສາກົນ ຄົບຮອບ 136 ປີ, ວັນຜ່າວົງປິດລ້ອມອອກຈາກທົ່ງໄຫຫີນ ຂອງກອງພັນທີ 2 ຄົບຮອບ 63 ປີ, ວິລະກໍາໂຕນຄຸກຢ່າງມະຫັດສະຈັນ ຂອງຜູ້ນໍາພັກ ແລະ ແນວລາວສ້າງຊາດຄົບຮອບ 62 ປີ ແລະ ວັນຄ້າຍວັນເກີດປະທານ ໂຮ່ຈິມິນ ຄົບຮອບ 132 ປີ ຂຶ້ນ ຫວ່າງບໍ່ດົນມານີ້, ໂດຍການເຂົ້າຮ່ວມຂອງ ທ່ານ ແກ້ວຜາ ສີລາດວງໃຈ ຮອງເລຂາພັກເມືອງ ຜູ້ຊີ້ນໍາວຽກງານການເມືອງ-ແນວຄິດ, ພັກ-ພະນັກງານ ໂດຍມີພະນັກງານຫຼັກແຫຼ່ງ - ນໍາພາ, ພະນັກງານລັດຖະກອນ - ອາສາສະໝັກ ແລະ ກໍາລັງປະກອບອາວຸດ ເຂົ້າຮ່ວມ.

ທ່ານ ແກ້ວຜາ ສີລາດວງໃຈ ໄດ້ເລົ່າຄືນມູນເຊື້ອວັນສ້າງຕັ້ງກໍາມະກອນສາກົນ ຄົບຮອບ 136        ປີ, ວັນຜ່າວົງປິດລ້ອມ ຂອງກອງພັນທີ 2 ວິລະຊົນ ຄົບຮອບ 63 ປີ ແລະ ວິລະກໍາໂຕນຄຸກຢ່າງມະຫັດສະຈັນ ຂອງຜູ້ນໍາພັກ ແລະ ແນວລາວສ້າງຊາດ ຄົບຮອບ 62 ປີ, ການຕີຜ່າວົງປິດລ້ອມ ໂດຍໄດ້ຍົກໃຫ້ເຫັນສາເຫດ ແລະ ຄວາມເປັນມາຂອງວັນກໍາມະກອນສາກົນ, ຄວາມໝາຍສໍາຄັນ ແລະ ບັນດາປະຖົມປັດໄຈທີ່ເຮັດໃຫ້ກອງພັນທີ 2 ວິລະຊົນ ສາມາດຜ່າວົງປິດລ້ອມຂອງສັດຕູອອກໄປສູ່ເຂດທີ່ໝັ້ນປະຕິວັດຢ່າງມີໄຊ ແລະ ໄດ້ຍົກໃຫ້ເຫັນວິລະກໍາໂຕນຄຸກຢ່າງມະຫັດສະຈັນຂອງບັນດາຜູ້ນໍາພັກ ແລະແນວລາວຮັກຊາດ ກັບຄືນສູ່ເຂດປົດປ່ອຍດ້ວຍຄວາມປອດໄພ ຊຶ່ງເປັນເຫດການທີ່ສະເທືອນ ຕໍ່ຫາງສຽງໂລກ ເຮັດໃຫ້ຈັກກະພັດອາເມຣິກາ ແລະ ລູກມືຕົກສະທ້ານຢ້ານກົວ ແຕ່ເປັນການປຸກລະດົມກໍາລັງໃຈ ແລະ ປິຕິຊົມຊື່ນຂອງກໍາລັງປະຕິວັດ ທົ່ວປວງຊົນ ແລະ ເຫດການໂຕນຄຸກຢ່າງມະຫັດສະຈັນຄັ້ງນັ້ນ ມັນໄດ້ສະແດງເຖິງແຜນນະໂຍບາຍອັນຖືກຕ້ອງຂອງສູນກາງພັກ, ຄວາມສາມາດຈັດຕັ້ງນໍາພາຂອງຄະນະພັກວຽງຈັນ ແລະ ບັນດາຜູ້ນໍາທີ່ຢູ່ໃນຄຸກ; ສະແດງເຖິງການປົກປ້ອງຂອງມະຫາຊົນທີ່ຮັກຊາດ ແລະ ການຊ່ວຍເຫຼືອຂອງບັນດາສາລະວັດທະຫານຝ່າຍວຽງຈັນທີ່ມີຄວາມຕື່ນຕົວ, ພ້ອມດຽວກັນນັ້ນຜູ້ເຂົ້າຮ່ວມຍັງໄດ້ຮັບຟັງການປາຖະກະຖາເລົ່າຄືນມູນເຊື້ອວັນຄ້າຍວັນເກີດຂອງ ປະທານ ໂຮ່ຈິມິນ ໂດຍການບັນຍາຍຂອງທ່ານ ສີສຸພັນ ມະຫາວົງ ຄະນະປະຈໍາພັກເມືອງຕື່ມອີກ.

ໂດຍແນໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານສະມາຊິກພັກ, ພະນັກງານລັດຖະກອນ, ອາສາສະໝັກ ແລະ ກໍາລັງປະກອບອາວຸດ ໄດ້ເຊື່ອມຊຶມມູນເຊື້ອປະຫວັດສາດ ແລະ ຮູ້ເສີມຂະຫຍາຍເຂົ້າໃນການຈັດຕັ້ງປະຕິບັດວຽກງານ ແລະ ການຝຶກຝົນຫຼໍ່ຫຼອມຕົນເອງໃຫ້ກາຍເປັນພະນັກ ງານທີ່ດີເດັ່ນ ເປັນແບບຢ່າງທີ່ດີຂອງມະຫາຊົນ ແລະ ອົງການຈັດຕັ້ງຕ່າງໆ.

ຂ່າວ-ພາບ: ສາລະວັນ