ກະຊວງສຶກສາທິການ ແລະ ກິລາ ໄດ້​ຈັດກອງປະຊຸມສຳມະນາຄູ່ຮ່ວມມື ກ່ຽວກັບໂຄງການທົດລອງການຝຶກເວົ້າພາສາລາວ ໄດ້​ຈັດຂຶ້ນ​ໃນ​ວັນ​ທີ 26 ພຶດ​ສະ​ພານີ້ ​ທີ່​ສະ​ຖາ​ບັນຄົ້ນຄວ້າວິທະຍາສາດການສຶກສາ​, ໂດຍ​ການ​ເປັນ​ປະ​ທານ​ຂອງ​ ທ່ານ ອານຸລົມ ວິໄລພອນ ຮອງຫົວໜ້າສະຖາບັນຄົ້ນຄວ້າວິທະຍາສາດການສຶກສາ (ສວສ) ແລະ ​ທ່ານ ນາງ ​ແອ່ນ​ ສະ​ເຕ​ຊິໂນ​ສະ​ກີ ຜູ້​ຈັດ​ການ​ຝ່າຍ​ການ​ຜະ​ລິດ ແລະ ການ​ວາງ​ແຜນ, ແຜນ​ງານ​ບີ​ຄວາ, ພ້ອມ​ດ້ວຍ​ຄູ​-ອາ​ຈານ​​ ທັງ​ເຊິ່ງ​ໜ້າ ແລະ​ ອອນ​ລາຍ ​ເຂົ້າ​ຮ່ວມ.

ກອງ​ປະ​ຊຸມ​ຄັ້ງ​ນີ້ ແມ່ນເພື່ອປຶກສາຫາລືກັນກ່ຽວກັບພາກສ່ວນທີ່ກ່ຽວຂ້ອງໃນການສະໜັບສະໜູນນັກຮຽນ ຊັ້ນ ປ.1 ຜູ້ທີ່ບໍ່ເວົ້າພາສາລາວເປັນພາສາທີໜຶ່ງໃນໂຮງຮຽນປະຖົມສຶກສາຢູ່ເຂດຊົນນະບົດ, ຫຼັກສູດການຝຶກເວົ້າ​ພາສາ​ລາວແມ່ນ​ໄດ້ເຮັດການທົດ​ລອງມາ​​ເປັນ​ເວລາ 2 ປີແລ້ວ​​ໃນ 80 ​ໂຮງຮຽນ​ທີ່ຢູ່​ຫ່າງ​ໄກ​ສອກຫຼີກ ​ແລະ ໃນປັດຈຸ​ບັນ, ຫຼັກສູດດັ່ງກ່າວ​​ໄດ້​ຮັບ​ການ​ປັບປຸງ ​ເພື່ອ​ກຽມພ້ອມຜັນຂະຫຍາຍ​​ນຳ​ໃຊ້​ໃນ​ແຂວງອື່ນໆ​ຕື່ມ​ອີກ.

​ ທ່ານ ອານຸລົມ ວິໄລພອນ ໄດ້​ກ່າວ​ວ່າ: ສວສ ຈະສືບຕໍ່ປັບປຸງໂຄງການ ແລະ ປັບປຸງຊັບພະຍາກອນຕ່າງໆ ແລະ ປັບປຸງການຝຶກອົບຮົມໂດຍອີງໃສ່ຄໍາຕິຊົມ ແລະ ຄໍາເຫັນຂອງບັນດາ​ຜູ້​ເຂົ້າ​ຮ່ວມ​, ເພາະເປັນສິ່ງສໍາຄັນທີ່ເດັກນ້ອຍທຸກຄົນຕ້ອງມີໂອກາດເທົ່າທຽມກັນໃນການຮຽນຮູ້ ແລະ ໄດ້ໃຫ້ການຊ່ວຍເຫຼືອການຮຽນຮູ້ພາສາລາວໃຫ້ພຽງພໍສໍາລັບນັກຮຽນທີ່ບໍ່ເວົ້າພາສາລາວເປັນພາສາທີໜຶ່ງ, ໃນໄລຍະປີທຳອິດຂອງການຮຽນເຂົາເຈົ້າ, ໂຄງການ​ທົດ​ລອງ​ການຝຶກເວົ້າພາ​ສາ​ລາວ​ໄດ້​ຮັບ​ການຈັດຕັ້ງ​ປະ​ຕິ​ບັດ​ຢູ່​ໃນ 10 ໂຮງ​ຮຽນ​ເປົ້າໝາຍ ແລະ 10 ໂຮງ​ຮຽນ​ສົມທຽບ​ໃນ​ແຕ່​ລະແຂວງຈາກ 4 ແຂວງ​ດັ່ງນີ້: ແຂວງ​ຜົ້ງ​ສາ​ລີ, ບໍ​ລິ​ຄໍາ​ໄຊ, ຄໍາ​ມ່ວນ ​ແລະ ​ສາລະ​ວັນ. ນັກຮຽນ ຊັ້ນ ປ.1 ທີ່ເວົ້າພາສາລາວເປັນພາສາທີສອງຈະໄດ້ຮັບການສອນເພີ່ມປະມານ 1 ຊົ່ວໂມງໃນແຕ່ລະມື້ ເພື່ອພັດທະນາທັກສະໃນການເວົ້າພາສາລາວຂອງພວກເຂົາ, ການປັບປຸງທັກສະການປາກເວົ້າເປັນການສ້າງພື້ນຖານພາສາທີ່ເຂັ້ມແຂງ ເພາະມັນຊ່ວຍພັດທະນາທັກສະການອ່ານ ແລະ ການຂຽນຂອງນັກຮຽນໄປພ້ອມກັນ. ຄູສອນທີ່ເຂົ້າຮ່ວມ ແລະ ຄູນິເທດໄດ້ຮັບປຶ້ມແບບຮຽນສະເພາະ ແລະ ຄູ່ມືຄູທີ່ພັດທະນາໂດຍ ສວສ ຊຶ່ງໄດ້ຮັບການສະໜັບສະໜູນຈາກແຜນງານບີຄວາ, ພ້ອມທັງການຝຶກອົບຮົມວິທີການສອນການຝຶກເວົ້າພາສາລາວ.

ທ່ານ ນາງ ພອນສິຣິ ອຸໄທວັນ ຫົວໜ້າຂະແໜງຄົ້ນຄວ້າການສອນພາສາລາວສຳລັບຊົນເຜົ່າ, ສະຖາບັນຄົ້ນຄວ້າວິທະຍາສາດການສຶກສາ ໄດ້​ກ່າວ​ວ່າ: ຄູ ແລະ ນັກຮຽນມີຄວາມກະຕືລືລົ້ນທີ່ຈະນໍາໃຊ້ສື່ ອຸປະກອນການຮຽນການສອນວິຊາພາສາລາວໃຫ້ຫຼາຍຂຶ້ນ ເຊັ່ນ: ບັດຄຳສັບ, ໂປສເຕີ, ເກມ ແລະ ເພງ ແລະ ພວກ​ເຮົາ​ກຳລັງ​ວາງ​ແຜນ​ພັດທະນາບັນດາສື່​ ອຸປະກອນ​ເພີ່ມ​ເຕີມ​ເຫຼົ່ານີ້ ເພື່ອ​ຮັບປະກັນວ່າເດັກ​ນ້ອຍຈະໄດ້ຮັບ​ຄວາມ​ມ່ວນ​ຊື່ນ ​ແລະ ສາມາດເຂົ້າເຖິງແຫຼ່ງຊັບພະຍາກອນ​​ການ​ຮຽນ​ວິຊາພາສາ​ລາວໃຫ້ໄດ້ຫຼາຍທີ່ສຸດ​ເທົ່າ​ທີ່​ຈະ​ເຮັດ​ໄດ້.

ຂ່າວ-ພາບ: ບຸນ​ອູ້ມ