ໂດຍ: ວັນເພັງ

ການສັກວັກຊິນປ້ອງກັນໂຄວິດ-19 ເປັນບັນຫາສຳຄັນຫຼາຍ ທີ່ທຸກຄົນຕ້ອງສືບຕໍ່ຮ່ວມກັນໄປຮັບການສັກຢາວັກຊິນເພື່ອປ້ອງກັນພະຍາດດັ່ງກ່າວໂດຍສະເພາະ ຜູ້ສູງອາຍຸ, ຜູ້ມີພະຍາດປະຈຳຕົວ, ເດັກທີ່ມີເກນອາຍຸ ກໍສາມາດໄດ້ຮັບການສັກວັກຊິນໄດ້ ໃນສະຖານທີ່ໃຫ້ບໍລິການຕ່າງໆເຊັ່ນ: ໂຮງໝໍເມືອງ,ໂຮງໝໍແຂວງ ແລະໂຮງໝໍສູນກາງ ແລະອື່ນໆໃກ້ບ້ານທ່ານ ໃນໂມງເວລາລັດຖະການ(8:00ໂມງ- 16:00ໂມງ)ເພື່ອສ້າງພູມຕ້ານທານ ແລະ ຄຸ້ມກັນໃຫ້ແກ່ຮ່າງກາຍ, ບໍ່ໃຫ້ເຈັບເປັນຮຸນແຮງ ແລະ ເສຍຊີວິດ, ການສັກວັກຊິນກັນພະຍາດໂຄວິ-19ຍັງສາມາດປ້ອງກັນການເຈັບເປັນຮຸນແຮງ ແລະ ເສຍຊີວິດຈາກໂຄວິດສາຍພັນໂອມິຄຣອນ ແລະ ເດວຕ້າໄດ້ຕື່ມອີກ.

ປັດຈຸບັນບາງທ່ານກໍຍັງບໍ່ໄດ້ໄປຮັບການສັກວັກຊິນຈັກເຂັມກໍມີ, ບາງທ່ານກໍໄປສັກໄດ້ຄົບໂດສ ຫຼື 2 ເຂັມແລ້ວ, ໃນນັ້ນຍັງຈຳເປັນຕ້ອງໄປສັກເຂັມກະຕຸ້ນຕື່ມອີກ (ເຂັມ 3, ເຂັມ 4)ພາຍຫຼັງສັກເຂັມ 2 ຮອດໄລຍະ4-6 ເດືອນເພື່ອເສີມສ້າງພູມຕ້ານທານໃຫ້ແກ່ຮ່າງກາຍຂຶ້ນຕື່ມ, ເຖິງວ່າທ່ານຈະສັກວັກຊິນຄົບຕາມກຳນົດແລ້ວກໍຕາມ ທ່ານຍັງຕ້ອງສືບຕໍ່ປ້ອງກັນຕົນເອງ, ຄອບຄົວ, ໝູ່ຄູ່, ເພື່ອຮ່ວມງານ ແລະ ຊຸມຊົນຈາກພະຍາດໂຄວິດ-19 ແລະ ປະຕິບັດມາດຕະການປ້ອງກັນໂຄວິດ-19 ຂອງ ກະຊວງສາທາລະນະສຸກວາງອອກຢ່າງເຂັ້ມງວດ.ຖ້າອອກໄປສະຖານທີຊຸມຊົນຕ້ອງຮັກສາໄລຍະຫ່າງ, ໃສ່ຜ້າປິດປາກ-ປິດດັງ, ໃຊ້ສະບູ່, ເຈວລ້າງມື, ນ້ຳສະອາດ ທຸກຄັ້ງເມື່ອຈັບບາຍສິ່ງຂອງຕ່າງໆ, ຖ້າຮູ້ສຶກບໍ່ສະບາຍ ບໍ່ຄວນຊື້ຢາມາກິນເອງຄວນໄປພົບແພດເພື່ອປິ່ນປົວ.

ກະຊວງສາທາລະນະສຸກ ລາຍງານການຕິດເຊື້ອພະຍາດໂຄວິດ-19ປະຈຳວັນທີ 22 ກັນຍາ 2022ວ່າ: ທົ່ວປະເທດມີຜູ້ຕິດເຊື້ອໂຄວິດສະສົມ215.615 ຄົນ, ຕິດເຊື້ອໃໝ່ 60 ຄົນ, ນະຄອນຫຼວງວຽງຈັນຕິດຫຼາຍກວ່າໝູ່ 24 ຄົນ.

(ຂໍ້ມູນຈາກ: ກະຊວງສາທາລະນະສຸກ)