ໜັງສືພິມ ປະຊາຊົນ

ເຜີຍແຜ່ຄວາມຮູ້ກ່ຽວກັບໂພຊະນາການ

ເຜີຍແຜ່ໂດຍ: ວິໄລສັກ ເວລາ: 28/09/2022 13:51:04 ຈຳນວນຢ້ຽມຊົມ 15170 ຄັ້ງ

ສູນໂພຊະນາການ ກະຊວງສທາລະນະສຸກ ຮ່ວມກັບຫ້ອງການສາທາລະນະສຸກ ເມືອງເຊໂປນ ແຂວງສະຫວັນນະເຂດ ຈັດກິດຈະກຳໃຫ້ຄວາມຮູ້ກ່ຽວກັບວຽກງານໂພຊະນາການ ແລະ ສຸຂະສຶກສາ ໃຫ້ແມ່ຍິງ ແລະ ເດັກນ້ອຍ ບ້ານອາລາງໃຫຍ່ ເມືອງເຊໂປນ ແຂວງສະຫວັນນະເຂດ ເມື່ອບໍ່ດົນມານີ້ ທີ່ຫ້ອງການປົກຄອງບ້ານດັ່ງກ່າວ ຊຶ່ງທ່ານ ນາງ ລຳມະນີ ວົງວິຍານ ວິຊາການ ແມ່ ແລະ ເດັກ ຫ້ອງການສາທາລະນະສຸກເມືອງເຊໂປນ ໄດ້ອະທິບາຍໂດຍໄດ້ເນັ້ນໜັກດ້ານການຮັກສາສຸພາບ, ການກິນຢູ່ທີ່ສະອາດຖືກຫຼັກສຸຂະອະນາໄມ ເປັນຕົ້ນການກິນອາຫານໃຫ້ຄົບ 6 ໝວດ, ພ້ອມນັ້ນຍັງໄດ້ແນະນໍາໃຫ້ເອື້ອຍນ້ອງແມ່ຍິງທີ່ຮູ້ວ່າໂຕເອງຖືພາຕ້ອງໄປຝາກທ້ອງຢູ່ໂຮງໝໍ ຫຼື ສຸກສາລາໃກ້ບ້ານ ແລະ ກິນຢາບຳລຸງຄັນ ພ້ອມທັງໄປຫາໝໍຕາມການນັດໝາຍທຸກຄັ້ງ, ຫຼັງເກີດລູກແລ້ວກໍ່ຄວນເອົາລູກໄປສັກວັກຊິນ ແລະກວດແມ່ຄືນພາຍໃນ 45 ວັນ.

ທ່ານ ສົມຍົດ ສີສົມບັດ ຮອງຫົວໜ້າຫ້ອງການສາທາລະນະສຸກເມືອງເຊໂປນ ໃຫ້ສໍາພາດວ່າ ໂພຊະນາການມີຄວາມສໍາຄັນຕໍ່ແມ່ຍິງຖືພາ ໄລຍະຜ່ານມາລັດຖະບານລາວຮ່ວມກັບອົງການອຸຍນີເຊັບ ແລະ ອົງການຈັດຕັ້ງສາກົນອື່ນໆໄດ້ໃຫ້ການຊ່ວຍເຫຼືອດ້ານທຶນຮອນເຂົ້າໃສ່ວຽກງານໂພຊະນາການ ສໍາລັບແມ່ຍິງຖືພາ ແລະ ເດັກນ້ອຍຢູ່ເຂດຊົນນະບົດຫຼາຍແຂວງໃນທົ່ວປະເທດກໍຕາມ ແຕ່ສັງເກດເຫັນວ່າຍັງມີປະຊາຊົນ ບັນດາເຜົ່າຈໍານວນບໍ່ໜ້ອຍຍັງບໍ່ທັນຮັບຮູ້ ແລະ ເຂົ້າໃຈຕໍ່ວຽກງານໂພຊະການ ອາດຈະຍ້ອນຄວາມທຸກຍາກຂາດເຂີນ ຫຼື ການບໍ່ຮູ້ໜັງສື ແລະ ຮີດຄອງປະເພນີ ການກິນ ກໍເປັນສິ່ງໜຶ່ງທີ່ເຮັດໃຫ້ແມ່ຍິງຊົນເຜົ່າໃນເຂດຊົນນະບົດຂອງລາວ ຂາດສານອາຫານໃນເວລາຖືພາ ນອກນີ້ການມີລູກຫຼາຍຄົນ ແລະ ຂາດສຸຂະສຶກສາທີ່ດີກໍພາໃຫ້ສ່ຽງຕໍ່ການເສຍຊີວິດຂອງແມ່ ແລະ ລູກໄດ້.

ທ່ານ ນາງ ຫອມມະນີ ໄຄຈັນ ຮອງປະທານສະຫະພັນແມ່ຍິງເມືອງເຊໂປນ ໃຫ້ສຳພາດຕື່ມວ່າ: ສະຫະພັນແມ່ຍິງເມືອງເຊໂປນ ໄດ້ເປັນຄູ່ຮ່ວມງານກັບຫ້ອງການສາທະສຸກເມືອງເຊໂປນ ໂດຍທຸກໆ ກິດຈະກຳກ່ຽວກັບວຽກງານສາທາລະນະສຸກ ສະຫະພັນແມ່ຍິງໄດ້ເຂົ້າຮ່ວມທຸກຄັ້ງ ຕົວຢ່າງ ວຽກໂພຊະ ນາການ ແລະ ວຽກລ້ຽງລູກດ້ວຍນົມແມ່ ຊຶ່ງຜ່ານມາໄດ້ປຸກລະດົມເອື້ອຍນ້ອງແມ່ຍິງໃຫ້ມີສ່ວນຮ່ວມ ໃນການຮັກສາສຸຂະພາບ ເວລາຖືພາ ແນະນໍາເຂົາເຈົ້າໃຫ້ໄປຝາກທ້ອງ ແລະ ເກີດລູກຢູ່ໂຮງໝໍ ຫຼື ສຸກ ສາລາ ຜ່ານການຈັດຕັ້ງປະຕິບັດເຫັນວ່າປະຊາຊົນມີການປ່ຽນແປງພຶດຕິກຳທີ່ດີຂຶ້ນ ປັດຈຸບັນສະຫະພັນ ແມ່ຍິງເມືອງເຊໂປນໄດ້ຮັບທຶນຈາກອົງການອຸຍນີເຊັບໂດຍກົງ ກ່ຽວກັບໂຄງການຮັກລູກໃຫ້ໃສ່ໃຈ ປະກອບມີ 3 ວຽກຄື ວຽກປົກປ້ອງແມ່ຍິງ ແລະ ເດັກນ້ອຍ ວຽກສື່ສານ ແລະ ວຽກງານດູແລ ເປັນຕົ້ນ ການກິນການຢູ່ສະອາດ ໂດຍໃຊ້ຮູບພາບແຜ່ນພິກ ຊຶ່ງມີອາສາສະໝັກບ້ານ ນາຍບ້ານ ແລະ ເຖົ້າແກ່ແນວໂຮມເປັນຜູ້ໂຄສະນາຊ່ວຍ.

ນາງ ແນະ ອາຍຸ 17 ປີ ໄດ້ໃຫ້ສຳພາດວ່າ: ປັດຈຸບັນຕົນເອງໄດ້ຖືພາ 3 ເດືອນ ພາຍຫຼັງທີ່ຮູ້ວ່າ ຕົນເອງຖືພາລູກຄົນທຳອິດໄດ້ໄປຝາກທ້ອງຢູ່ໂຮງໝໍເຊໂປນ ປັດຈຸບັນໄດ້ໄປຝາກທ້ອງ 2 ຄັ້ງ, ທ່ານໝໍໄດ້ເອົາຢາບຳລຸງຄັນໃຫ້ກິນ ແນະນຳໃຫ້ກິນອາຫານຄົບ 6 ໝວດເຊັ່ນ ທາດແປ້ງ, ຜັກ, ໝາກໄມ້, ຊີ້ນ, ປາ, ນົມ, ນໍ້າມັນພືດ ແລະ ອື່ນໆ, ຫຼຸດຜ່ອນການເຮັດວຽກໜັກ ແລະ ເອົາໃຈໃສ່ຮັກສາສຸຂະພາບ ແລະ ກິນສະອາດ, ຢູ່ສະອາດ ໃນຂະນະດຽວກັນ ນາງ ກື່ນ ອາຍຸ 42 ປີ ໃຫ້ສຳພາດຕື່ມອີກວ່າ: ປັດຈຸບັນຕົນເອງມີລູກ 5 ຄົນ ໃນນີ້ຜູ້ທີ 5 ເປັນຜູ້ຊາຍ ອາຍຸ 4 ເດືອນ ຜ່ານມາບໍ່ເຄີຍໄປຝາກທ້ອງຢູ່ໂຮງໝໍ ເວລາເກີດລູກໄດ້ເກີດເອງຢູ່ເຮືອນ ປັດຈຸບັນລູກຄົນທີ 5 ຍັງບໍ່ໄດ້ຮັບການສັກວັກຊິນ ພາຍຫຼັງທີ່ຕົນໄດ້ເຂົ້າຮ່ວມກິດຈະກຳໃຫ້ຄວາມຮູ້ກ່ຽວກັບວຽກງານໂພຊະນາການ ແລະ ສຸຂະສຶກສາໃຫ້ແມ່ຍິງ ແລະ ເດັກນ້ອຍຄັ້ງນີ້ ຈຶ່ງຮູ້ວ່າມີຄວາມຈຳເປັນ ແລະ ສຳຄັນຫຼາຍຕໍ່ສຸຂະພາບຂອງແມ່ ແລະ ລູກ ຕໍ່ຈາກນີ້ໄປຈະນຳລູກໄປຮັບວັກຊິນ ໃຫ້ລູກສືບຕໍ່ກິນນົມແມ່ຈົນຮອດ 6 ເດືອນ ຫຼັງຈາກນັ້ນຈະຕົ້ມເຂົ້າປຽກໃຫ້ລູກກິນຕາມຄຳແນະນຳຂອງທ່ານໝໍ.

ສຳລັບການລົງເຄື່ອນໄຫວກິດຈະກຳຄັ້ງນີ້ແມ່ນໄດ້ຮັບການສະໜັບສະໜູນຈາກສະຫະພາບເອີຣົບ ແລະ ຄູ່ຮ່ວມພັດທະນາອື່ນໆ ໂດຍຜ່ານອົງການອຸຍນີເຊັບ ປະຈໍາລາວ.

ຂ່າວທີ່ໄດ້ຮັບຄວາມນິຍົມ