ໃນວັນທີ 19 ຕຸລານີ້, ທີ່ຫ້ອງການສຶກສາທິການ ແລະ ກິລາເມືອງປາກລາຍ ແຂວງໄຊຍະບູລີ ໄດ້ຈັດກອງປະຊຸມຄົ້ນຄວ້າປຶກສາຫາລືປຸກລະດົມນັກຮຽນປະລະການຮຽນໃນສົກຮຽນ 2022-2023 ພາຍໃຕ້ການເປັນປະທານຂອງທ່ານ ບຸນພະລັງ ວິໄລສັກ ຮອງເຈົ້າເມືອງໆປາກລາຍ ຜູ້ຊີ້ນໍາຂົງເຂດວັດທະນະທໍາ-ສັງຄົມ,ຍຸຕິທໍາ ແລະ ຕຸລາການຂັ້ນເມືອງ, ພ້ອມດ້ວຍພາກສ່ວນກ່ຽວຂ້ອງເຂົ້າຮວ່ມ.

ກອງປະຊຸມໄດ້ຮັບຟັງການຜ່ານຂໍ້ຕົກລົງຂອງທ່ານເຈົ້າເມືອງ ສະບັບເລກທີ 834/ຈມປລ, ລົງວັນທີ18 ຕຸລາ 2022 ວ່າດ້ວຍການແຕ່ງຕັ້ງຄະນະຮັບຜິດຊອບປຸກລະດົມນັກຮຽນທີ່ປະລະການຮຽນຢູ່ພາຍໃນເມືອງສົກປີ 2022-2023, ຜ່ານບົດລາຍງານກ່ຽວກັບສະພາບນັກຮຽປະລະໃນສົກປີ 2022-2023 ແລະ ຜ່ານແຜນດໍາເນີນງານການລະດົມນັກຮຽນທີ່ປະລະການຮຽນໃນໂຮງຮຽນເປົ້າໝາຍຂອງຄະນະຮັບຜິດຊອບໃນແຕ່ລະເຂດ. ທົ່ວເມືອງປາກລາຍມີໂຮງຮຽນປະຖົມສຶກສາຈໍານວນ 68 ແຫ່ງ, ມັດທະຍົມສຶກສາຕອນຕົ້ນ 9ແຫ່ງ ແລະ ມັດທະຍົມສຶກສົມບູນ 9 ແຫ່ງ, ໃນສົກຮຽນ 2022-2023 ມີນັກຮຽນປະລະການຮຽນທັງໝົດ 1.039 ຄົນ, ຍິງ 487 ຄົນ, ໃນນີ້ຂັ້ນ ປ.5 ບໍ່ຕໍ່ ມ.1 ມີ 132 ຄົນ, ມ.1 ບໍ່ຕໍ່ ມ.2 ມີ 131 ຄົນ, ມ.2 ບໍ່ຕໍ່ ມ.3 ມີ 127 ຄົນ, ມ.3 ບໍ່ຕໍ່ ມ.4 ມີ 131 ຄົນ, ມ.4 ບໍ່ຕໍ່ ມ.5 ມີ 288 ຄົນ, ມ.5 ບໍ່ຕໍ່ ມ.6 ມີ 76 ຄົນ ແລະ ຂັ້ນ ມ.6 ບໍ່ຕໍ່ ມ.7 ມີ 80 ຄົນ, ໃນກອງປະຊຸມຜູ້ເຂົ້າຮ່ວມໄດ້ພ້ອມກັນປຶກສາຫາລືຄົ້ນຄວ້າປະກອບຄໍາຄິດຄໍາເຫັນ ເພື່ອຊອກຫາວິທີການແກ້ໄຂໃນການປະລະການຮຽນຂອງນັກຮຽນແຕ່ລະຊັ້ນຮຽນ ໂດຍໄດ້ສ້າງແຜນດໍາເນີນງານ ແລະ ແບ່ງຄວາມຮັບຜິດຊອບໃຫ້ບຸກຄົນຢ່າງລະອຽດ ເພື່ອລົງປຸກລະດົມແນວຄິດນັກຮຽນ ຜູ້ປົກຄອງ ແລະ ອົງການປົກຄອງບ້ານໃຫ້ເຂົ້າໃຈເຖິງຍຸດທະສາດຂອງການສຶກສາໃນໄລຍະໃໝ່, ປະຕິບັດການສຶກສາພາກບັງຄັບ ເພື່ອປຸກລະດົມນັກຮຽນໃຫ້ໄດ້ເຂົ້າຮຽນຈົບຊັ້ນມັດທະຍົມສຶກສາສາຍສາມັນໃຫ້ຄົບຕາມຫຼັກສູດ ເຮັດໃຫ້ການປະລະການຮຽນຂອງນັກຮຽນແຕ່ລະຊັ້ນຮຽນໃນທົ່ວເມືອງໃຫ້ນັບມື້ນັບລຸດລົງ.

ຂ່າວ: ກ່າ ຄຸດທະວົງສັກ