ກ່ອນເປີດງານມະຫະກຳກິລາແຫ່ງຊາດຄັ້ງທີ່ XI ທີ່ແຂວງຊຽງຂວາງເປັນເຈົ້າພາບຢ່າງເປັນທາງການ ແຂວງຫຼວງພະບາງຍາດມາໄດ້ແລ້ວ 5 ຫຼຽນຄຳ ຈາກແຂ່ງຂັນກິລາ 2 ປະເພດ

ມີບາງປະເພດໄດ້ເລີ່ມການແຂ່ງຂັນ ກ່ອນມື້ເປີດຢ່າງເປັນທາງການ ໂດຍສະເພາະກິລາລອຍນ້ຳ ແລະກິລາຍິງປືນ ຊຶ່ງທີມນັກກິລາແຂວງຫຼວງພະບາງ ສາມາດຍາດມາໄດ້ແລ້ວ 5 ຫຼຽນຄຳ, 5 ຫຼຽນເງີນ ແລະ 11 ຫຼຽນທອງແດງ. ທ່ານ ວົງເພັດ ອຸດົມລິດ ຫົວໜ້າພະແນກສຶກສາທິການ ແລະ ກິລາແຂວງຫຼວງພະບາງ ໄດ້ໃຫ້ສຳພາດວ່າ: ໂດຍລວມແລ້ວນັກກິລາຂອງແຂວງຫຼວງພະບາງແຕ່ລະປະເພດ ແມ່ນມີຄວາມພ້ອມທີ່ຈະເຂົ້າຮ່ວມແຂ່ງຂັນ ຕາມຕາຕະລາງ ແລະລາຍການທີ່ແຂວງເຈົ້າພາບກຳນົດ, ສ່ວນກິລາລອຍນ້ຳ ແລະກິລາຍີງປືນ ທີ່ໄດ້ເລີ້ມການແຂ່ງຂັນ ກ່ອນມື້ເປີດຢ່າງເປັນທາງການ ນັກກິລາແຂວງຫຼວງພະບາງ ສາມາດຍາດໄດ້ຫຼຽນລາງວັນເກີນຄາດໝາຍທີ່ວາງໄວ້, ສຳລັບກິລາປະເພດອື່ນ ແມ່ນໄດ້ເລີ່ມເດີນທາງໄປເຂົ້າຮ່ວມແຂ່ງຂັນຕາມການກຳນົດຕາຕະລາງຂອງແຂວງເຈົ້າພາບ.

ຫົວໜ້າພະແນກສຶກສາທິການ ແລະ ກິລາແຂວງຫຼວງພະບາງ ໄດ້ໃຫ້ຮູ້ຕື່ມວ່າ: ການເຂົ້າຮ່ວມແຂ່ງຂັນໃນງານມະຫະກຳກິລາແຫ່ງຊາດ ຄັ້ງທີ່ XI ທີ່ແຂວງຊຽງຂວາງເຈົ້າພາບ ເຫັນວ່າແຕ່ລະສະຫະພັນ ໄດ້ມີການກະກຽມຄວາມພ້ອມຂອງຕົນ ຕາມສະພາບ ແລະເງື່ອນໄຂຕົວຈີງ ເຖິງຈະພົບຄວາມຫຍຸ້ງຍາກບາງດ້ານ ແຕ່ຄະນະຮັບຜິດຊອບກິລາແຕ່ລະສະຫະພັນ ໄດ້ພ້ອມກັນປັບປຸງແກ້ໄຂໃຫ້ດີຂຶ້ນ ພ້ອມນັ້ນ ທ່ານໄດ້ສະແດງຄວາມຂອບໃຈຕໍ່ທຸກພາກສ່ວນພາຍໃນແຂວງຫຼວງພະບາງ ທີ່ພ້ອມກັນປະກອບສ່ວນທາງດ້ານວັດຖຸ-ປັດໄຈໃຫ້ສະຫະພັນກິລາແຕ່ລະປະເພດ ແລະຮຽກຮ້ອງໃຫ້ມວນຊົນຊາວຫຼວງພະບາງ ພ້ອມກັນສົ່ງແຮງໃຈແຮງເຊຍໃຫ້ກັບທີມນັກກິລາແຂວງຫຼວງພະບາງ ໃຫ້ສາມາດຍາດໄດ້ຫຼຽນລາງວັນ ຕາມຄາດໝາຍທີ່ວາງໄວ້.