ໂຮງຮຽນມັດທະຍົມສົມບູນ ຫຼື ມ.ສ ສີທ່ານາໄຊ ເມືອງປາກຊັນ ແຂວງບໍລິຄໍາໄຊ ເປີດການແຂ່ງຂັນກິລາ-ສິລະປະ ເພື່ອຕ້ານສິ່ງເສບຕິດ ແລະ ປະກົດການຫຍໍ້ທໍ້ຕ່າງໆ ປະຈໍາປີ ຄັ້ງທີ Ⅳ ສົກຮຽນ 2022-2023 ໄດ້ເປີດຂຶ້ນເມື່ອບໍ່ດົນມານີ້ ທີ່ໂຮງຮຽນດັ່ງກ່າວ, ໂດຍພາຍໃຕ້ການເປັນປະທານຂອງ ທ່ານ ສົມພອນ ວັນນະລາດ ຮັກສາການຜູ້ອໍານວຍການໂຮງຮຽນ ມ,ສ ສີທ່ານາໄຊ, ມີທ່ານ ຄໍາເພັດ ໄຊປັນຍາ ຮອງຫົວໜ້າພະແນກສຶກສາທິການ ແລະ ກິລາແຂວງ ພ້ອມດ້ວຍຄະນະພັດທະນາການສຶກສາຂັ້ນບ້ານ, ແຂກຖືກເຊີນ, ຜູ້ປົກຄອງນັກຮຽນ, ພະນັກງານ, ຄູ-ອາຈານ ແລະ ນັກຮຽນ ພາຍໃນໂຮງຮຽນເຂົ້າຮ່ວມຢ່າງຟົດຟື້ນ.

ໂອກາດນີ້, ທ່ານ ຊາຍພອນ ຊະນະໄຊ ຮອງຜູ້ອໍານວຍການ ໂຮງຮຽນ ມ.ສ ສິທ່ານາໄຊ ລາຍງານໃຫ້ຮູ້ວ່າ: ການຈັດກິດຈະກໍາແຂ່ງຂັນກິລາ-ສິລະປະ ພາຍໃນ ມ.ສ ສີທ່ານາໄຊ ບໍ່ພຽງແຕ່ເປັນການສ້າງຂະບວນການໃຫ້ຟົດຟື້ນມ່ວນຊື່ນເທົ່ານັ້ນ ແຕ່ຍັງເປັນການສືບຕໍ່ສ້າງຂະບວນຕ້ານສິ່ງເສບຕິດ ກໍຄືບັນຫາຫຍໍ້ທໍ້ຕ່າງໆໃນໂຮງຮຽນ. ພ້ອມກັນນັ້ນ, ກໍຍັງໄດ້ປະກອບສ່ວນຢ່າງຕັ້ງໜ້າ ແລະ ໃຫຍ່ຫຼວງ ເຂົ້າໃນຂະບວນການກິລາ-ສິລະປະ ໃຫ້ແກ່ປະເທດຊາດ ເວົ້າລວມ, ເວົ້າສະເພາະແມ່ນເມືອງປາກຊັນ ແຂວງບໍລິຄໍາໄຊ ສ້າງໂອກາດໃຫ້ນັກຮຽນຜູ້ທີ່ມີພອນສະຫວັນດ້ານກິລາ ແລະ ດ້ານສິລະປະ ກ້າສະແດງອອກທາງດ້ານຄວາມສາມາດຂອງເຂົາເຈົ້າ ກາຍເປັນນັກກິລາ ແລະ ນັກສິລະປະ ລະດັບອາຊີບ ໃນອະນາຄົດ. ຊຶ່ງການແຂ່ງຂັນລາຍການດັ່ງກ່າວ ແມ່ນຈະດຳເນີນຈົນໄປເຖິງ 31 ມີນາ 2023 ຈຶ່ງຈະສໍາເລັດ ມີການຊີງໄຊກັນທັງໝົດ 5 ປະເພດກິລາ ຄື: ເຕະບານ 7 ຄົນ ຍິງ-ຊາຍ ມ.ຕົ້ນ ແລະ ມ.ປາຍ ລວມ 21 ທີມ, ບານສົ່ງ ຍິງ-ຊາຍ ມ.ປາຍ 10 ທີມ, ກະຕໍ້ ຊາຍ ມ.ຕົ້ນ ແລະ ມ.ປາຍ ລວມ 21 ທີມ ແລະ ແລ່ນ-ລານ ມ.ຕົ້ນ 12 ທີມ ແລະ ດຶງເຊືອກ.

ໂອກາດນີ້, ທ່ານ ສົມພອນ ວັນນະລາດ ໄດ້ສະແດງຄວາມຮູ້ສຶກພາກພູມໃຈເປັນຢ່າງສູງທີ່ໄດ້ເປີດການແຂ່ງຂັນກິລາ ແລະ ສິລະປະ-ວັນນະຄະດີ ປະຈໍາປີ ແລະ ປີນີ້ ຈັດຂຶ້ນກໍຄືທຸກໆປີຜ່ານມາ ເພື່ອເປັນການສ້າງຂະບວນການພາຍໃນໃຫ້ຟົດຟື້ນມ່ວນຊື່ນ, ສ້າງຄວາມເຂັ້ມແຂງ, ສ້າງຄວາມສາມັກຄີຮັກແພງ ລວມທັງຊຸກຍູ້ຈິດໃຈຂອງຄູ-ອາຈານ ແລະ ນັກຮຽນ ພາຍໃນໂຮງຮຽນ ມ.ສ ສີທ່ານາໄຊ ໃຫ້ກາຍເປັນໂຮງຮຽນແບບຢ່າງຮອບດ້ານ ພ້ອມກັນຕ້ານປະກົດການຫຍໍ້ທໍ້ຕ່າງໆທີ່ຈະເກີດຂຶ້ນພາຍໃນໂຮງຮຽນ ແນໃສ່ສົ່ງເສີມການຈັດຕັ້ງປະຕິບັດ 3 ລັກສະນະ ແລະ 5 ຫຼັກມູນການສຶກສາ ທີ່ກະຊວງສຶກສາທິການ ແລະ ກິລາ ວາງອອກ ໃຫ້ປະກົດຜົນເປັນຈິງ, ພ້ອມນັ້ນກໍໄດ້ກ່າວເປີດພິທີຢ່າງເປັນທາງການ ແລະ ບັນດາຄະນະປະທານ ພ້ອມດ້ວຍແຂກທີ່ເຂົ້າຮ່ວມຍັງໄດ້ພ້ອມກັນ ຕັດແຖບຜ້າ ເພື່ອເປັນສັນຍາລັກໃຫ້ແກ່ການເປີດງານ.

ຂ່າວ: ສີສຸພັນ ສີສົມພອນ (ສກຂ ບໍລິຄໍາໄຊ)