ທ່ານ ບົວວັນ ຄໍາຈັນ ຫົວໜ້າຫ້ອງການກະສິກໍາ-ປ່າໄມ້ ເມືອງພຽງ ແຂວງໄຊຍະບູລີ ໃຫ້ສໍາພາດວ່າ: ໃນປີ 2022 ເຖິງວ່າເມືອງພຽງຈະພົບກັບໄພທໍາມະຊາດ ແຕ່ດ້ວຍຄວາມເອົາໃຈໃສ່ຊີ້ນໍາຂອງອໍານາດການປົກຄອງເມືອງ ແລະ ວິຊາການກະສິກໍາເມືອງໄດ້ລົງໃກ້ຊິດຕິດແທດ ແນະນໍາ ຫຼັກວິຊາການໃຫ້ກັບຊາວກະສິກອນເປັນປົກກະຕິ ຈຶ່ງເຮັດໃຫ້ການຜະລິດເຂົ້າຂອງຊາວກະສິກອນພາຍໃນເມືອງ ມີເຂົ້າກຸ້ມກິນ,ມີສ່ວນແຮໄວ້ ແລະ ເປັນສິນຄ້າຂາຍອອກພາຍໃນເມືອງ ແລະ ຕ່າງແຂວງໄດ້ຈໍານວນໜຶ່ງ.

ອີງຕາມການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ (2020-2024) ຂອງວຽກງານກະສິກໍາ ແລະ ປ່າໄມ້ເມືອງ. ແຜນການຜະລິດໃນປີ 2022 ທັງລະດູແລ້ງ ແລະ ລະດູຝົນມີເນື້ອທີ່ທັງໝົດ 9.292 ເຮັກຕາ ໃນນີ້: ແຜນປູກເຂົ້າ 8.400 ເຮັກຕາ, ເນື້ອທີ່ປູກເຂົ້າຕົວຈິງ 8.490 ກວ່າເຮັກຕາ (ເນື້ອທີ່ເກັບກ່ຽວຕົວຈິງ 8.162 ກວ່າເຮັກຕາ). ຜົນຜະລິດເຂົ້າທັງໝົດ 39.599 ກວ່າໂຕນ ສະເລ່ຍສະມັດຖະພາບ 4,85 ໂຕນ/ເຮັກຕາ ທຽບໃສ່ປີຜ່ານມາຜະລິດເຂົ້າຫຼຸດລົງ 1.355,82 ໂຕນ (ສາເຫດທີ່ເຮັດໃຫ້ຜົນຜະລິດເຂົ້າຫຼຸດລົງຍ້ອນຜົນກະທົບຈາກໄພນໍ້າຖ້ວມ). ໃນນີ້: ໂຕເລກແຜນການຜະລິດເຂົ້ານາແຊງ ປີ 2022 ໃນເນື້ອທີ່ 900 ເຮັກຕາ, ປະຕິບັດໄດ້ 977,89 ເຮັກຕາ, ເທົ່າກັບ 108,65% ຂອງແຜນການ. ຜົນຜະລິດທັງໝົດ 4.752,74 ໂຕນ (ສະເລ່ຍສະມັດຖະພາບ 4,86 ໂຕນ/ເຮັກຕາ.) ໃນນີ້: ນາແຊງທົ່ວໄປ 949 ກວ່າເຮັກຕາ ຜົນຜະລິດ 4.626,26 ໂຕນ. ນາ 3 ຮອບວຽນ ນາຊອນ (ຮອບ 2), ເນື້ອທີ່ 27,94 ເຮັກຕາ, ເນື້ອທີ່ເກັບກ່ຽວຕົວຈິງ 26,24 ເຮັກຕາ, ຜົນຜະລິດ 126,48 ໂຕນ, ສະເລ່ຍສະມັດຖະພາບ 4,82 ໂຕ/ເຮັກຕາ.

ສໍາລັບການປູກເຂົ້າໄຮ່: ແຜນການຜະລິດເຂົ້າໄຮ່ ປີ 2022 ໃນເນື້ອທີ່ 620 ເຮັກຕາ, ສາມາດຈັດຕັ້ງປະຕິບັດໄດ້ 630 ກວ່າເຮັກຕາ, ຜົນຜະລິດ 2.207 ໂຕນ, ເທົ່າກັບ 101,7% ຂອງແຜນການ, ສະເລ່ຍສະມັດຖະພາບ 3,5 ໂຕນ/ເຮັກຕາ.

ທ່ານ ບົວວັນ ຄໍາຈັນ ກ່າວຕື່ມວ່າ: ການບໍລິໂພກເຂົ້າພາຍໃນເມືອງ ສະເລ່ຍໃສ່ຫົວຄົນໄດ້ 613 ກິໂລ/ຄົນ/ປີ (ທົ່ວເມືອງພຽງມີພົນລະເມືອງທັງໝົດ 64.586 ຄົນ). ທຽບໃສ່ແຜນການປະຕິບັດໄດ້ 91,77% ແຜນການແມ່ນ 668 ກິໂລ/ຄົນ/ປີ.

ກ່ຽວກັບການບໍລິຫານເຂົ້າເພື່ອຮັບໃຊ້ພາຍໃນເມືອງ ປີ 2022 ຜ່ານມາ, ເຂົ້າສໍາລັບບໍລິໂພກ 18.084 ໂຕນ, ເຂົ້າສໍາລັບຄັງແຮ 3 ເດືອນ 4.521 ໂຕນ, ເຂົ້າສໍາລັບປຸງແຕ່ງອື່ນໆ 1.979,98 ໂຕນ, ເຂົ້າສໍາລັບໄວ້ເຮັດແນວພັນ 595 ໂຕນ ແລະ ມີເຂົ້າເຫຼືອກິນ ແລະ ສົ່ງອອກເປັນສິນຄ້າຈໍານວນ 14.419 ກວ່າໂຕນ. (ແຜນການແມ່ນ 13.318 ໂຕນ) ທຽບໃສ່ແຜນການປະຕິບັດໄດ້ 108,27%.

(ຂ່າວ: ຕະວິນຍານ)