ຮຽບຮຽງໂດຍ: ຕຸໄລເພັດ ພິມເມືອງ

ບໍ່ນໍ້າຮ້ອນໃຫຍ່ວຽງທອງແຫ່ງນີ້ ຕັ້ງຢູ່ ເມືອງຮ້ຽມ ທາງທິດຕາເວັນຕົກຂອງແຂວງຫົວພັນ, ຫ່າງຈາກເທດສະບານເມືອງຊຳເໜືອ ປະມານ 155 ກິໂລແມັດ ແລະ ມີເສັ້ນທາງເຂົ້າເຖິງທີ່ສະດວກສະບາຍ. ບໍ່ນ້ຳຮ້ອນແຫ່ງນີ້ເປັນບໍ່ນໍ້າຮ້ອນທີ່ມີອຸນຫະພູມສູງທີ່ສຸດໃນ ສປປ ລາວ ຊຶ່ງມີຄວາມຮ້ອນເຖິງ 100 ອົງສາ (ສາມາດຕົ້ມໄຂ່ໃຫ້ສຸກ), ເກີດມາຈາກແຮ່ທາດທີ່ຢູ່ພື້ນດິນ ຊຶ່ງມີສັບພະຄຸນພິເສດໃນການປິ່ນປົວພະຍາດຜິວໜັງ ເປັນຕົ້ນແມ່ນ ຂີ້ຫິດ ແລະ ຂີ້ກາກ. ດ້ວຍເຫດນີ້, ບໍ່ນ້ຳຮ້ອນວຽງທອງຈຶ່ງເປັນທີ່ນິຍົມຂອງປະຊາຊົນພາຍໃນແຂວງຫົວພັນ ກໍຄືນັກທ່ອງທ່ຽວທີ່ໄດ້ເດີນທາງມາແຫ່ງນີ້ ໃນການລົງແຊ່ນ້ຳ ເພື່ອຜ່ອນຄາຍຄວາມເຄັ່ງຕຶງ ແລະ ເພີ່ມຄວາມສົດຊື່ນໃຫ້ແກ່ຕົນເອງ.

- ບໍ່ນ້ຳຮ້ອນແຫ່ງນີ້ເປີດໃຫ້ບໍລິການທຸກມື້, ເວລາ 7:00-19:00 ໂມງ.

ຂໍ້ມູນຈາກກົມໂຄສະນາການທ່ອງທ່ຽວກະຊວງ ຖວທ