ຮຽບຮຽງໂດຍ:ຕຸໄລເພັດ ພິມເມືອງ

“ທິວວະທັດຊໍາເໜືອຊ່າງງາມເຫຼືອແດນແຫ່ງພູດອຍ” ເປັນສຽງເພງທີ່ບັນລະຍາຍເຖິງຄວາມອຸດົມສົມບູນຂອງເມືອງທີ່ເຕັມໄປດ້ວຍພູຜາປ່າໄມ້ອັນຂຽວສົດງົດງາມແຫ່ງນີ້ ຊຶ່ງຕັ້ງຢູ່ກາງຮ່ອມພູ ແລະ ມີຄວາມສູງຊັນເໜືອລະດັບນ້ຳທະເລເຖິງ 1.200 ແມັດຂຶ້ນໄປ. ເມືອງຊໍາເໜືອເປັນເມືອງເອກຂອງແຂວງຫົວພັນມີຄວາມໂດດເດັ່ນດ້ານເສດຖະກິດ ແລະ ສັງຄົມ ໂດຍສະເພາະໃນຂະແໜງການທ່ອງທ່ຽວ, ເມືອງຊໍາເໜືອ ເປັນທີ່ຕັ້ງຂອງສວນແກ້ວຫຼັກເມືອງ ທີ່ຂຶ້ນຊື່ລືນາມໄປທົ່ວທຸກສາລະທິດ ແລະ ເປັນທີ່ຕັ້ງຂອງບ້ານພັນໄຊ ຕົ້ນຕໍາລັບເພງດັງ “ສາວພັນໄຊ”. ຕອນເຊົ້າໆໄປເລາະຕະຫຼາດໃຫຍ່ແຄມນ້ຳຊໍາ, ຊື້ເຄື່ອງສົດ ແລະ ເຄື່ອງແຫ້ງ ພ້ອມທັງຜ້າແພທີ່ຕ່ຳດ້ວຍມື ຊຶ່ງມີລວດລາຍງົດງາມ ແລະ ເປັນສິນຄາສ້າງຊື່ສຽງຂອງທ້ອງຖິ່ນນີ້. ອີກສິ່ງໜຶ່ງທີ່ຂາດບໍ່ໄດ້ກໍແມ່ນແຈ່ວປາບ້ຳ ຊຶ່ງເມືອງຊໍາເໜືອເອງແມ່ນມີແຫຼ່ງຜະລິດແຈ່ວປາບໍ້າລົດຊາດແຊບຂອງແທ້ດັ່ງເດີມຫຼາຍໆເຈົ້າ.

ຂໍ້ມູນຈາກ: ກົມໂຄສະນາການທ່ອງທ່ຽວກະຊວງ ຖວທ