ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໄດ້ຕ້ອນຮັບການເຂົ້າຢ້ຽມພົບປະຂອງທ່ານ ໂນບຸຢູກິ ໂຄບາຢາຊິ (Nobuyuki KOBAYASHI)ຫົວໜ້າທີມປະເມີນຜົນບໍລິສັດອົບແມັກ (OPMAC) ປະເທດຍີ່ປຸ່ນ ພ້ອມຄະນະທີມງານປະເມີນຜົນອົງການໄຈກາຍີ່ປຸ່ນ ໃນວັນທີ 16 ມັງກອນນີ້ທີ່ຫ້ອງວ່າການແຂວງເຊກອງ.

ໃນໂອກາດນີ້, ທ່ານ ເຫຼັກໄຫຼ ສີວິໄລ ກໍໄດ້ສະແດງຄວາມຍິນດີຕ້ອນຮັບ ແລະ ສະແດງຄວາມຮູ້ບຸນຄຸນ, ຂອບອົກຂອບໃຈມາຍັງລັດຖະບານ ກໍຄືປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍເຫຼືອດ້ານທຶນຮອນເຂົ້າໃນການພັດທະນາພື້ນຖານໂຄງລ່າງ ໂດຍສະເພາະແມ່ນຂົວມິດຕະພາບ (ລາວ-ຍີ່ປຸ່ນ) ແຂວງເຊກອງ ລວມມູນຄ່າ 121 ຕື້ກວ່າກີບ ຊຶ່ງເປັນຂົວທີ່ມີຄວາມໝາຍສໍາຄັນ ເຮັດໃຫ້ການຄົມມະນາຄົມຂົນສົ່ງສິນຄ້າ, ການໄປ-ມາຫາສູ່ລະຫວ່າງແຂວງກັບເມືອງມີຄວາມສະດວກສະບາຍ ແລະ ເປັນເສັ້ນທາງເຊື່ອມຈອດລະຫວ່າງແຂວງເຊກອງກັບ ສສ ຫວຽດນາມ ຊຶ່ງປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມ ແລະ ຍົກລະດັບຊີວິດການເປັນຢູ່ຂອງປະຊາຊົນບັນເຜົ່າພາຍໃນແຂວງໃຫ້ນັບມື້ດີຂຶ້ນເປັນກ້າວໆ.

ທ່ານ ໂນບຸຢູກິ ໂຄບາຢາຊິ (Nobuyuki KOBAYASHI) ໄດ້ກ່າວສະແດງຄວາມຂອບໃຈມາຍັງທ່ານເຈົ້າແຂວງເຊກອງ ກໍຄືການນໍາແຂວງ ແລະ ຂະແໜງການກ່ຽວຂ້ອງ ທີ່ໄດ້ໃຫ້ການຕ້ອນຮັບທີມງານຂອງພວກເຮົາ ຊຶ່ງການລົງມາເຄື່ອນໄຫວເຮັດວຽກຢູ່ແຂວງເຊກອງຄັ້ງນີ້ ແມ່ນເພື່ອເກັບກໍາຂໍ້ມູນ, ປະເມີນຜົນຫຼັງຈາກເປີດນໍາໃຊ້ຢ່າງເປັນທາງການຂົວມິດຕະພາບ (ລາວ-ຍີ່ປຸ່ນ) ແຂວງເຊກອງ ນັບແຕ່ຕົ້ນປີ 2018 ຜ່ານມາເຖິງປັດຈຸບັນ.

(ຂ່າວ-ພາບ: ສັນຍາ)