ໃນວັນທີ 18 ມັງກອນ ນີ້ ທີ່ອົງການໄອຍະການປະຊາຊົນສູງສຸດ ທ່ານ ໄຊຊະນະ ໂຄດພູທອນ ກຳມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ ໄດ້ໃຫ້ກຽດຕ້ອນຮັບ ທ່ານ ໂທຊິໂອະ ນາກາເຊະ (Toshio NAGASE) ຫົວໜ້າອົງການຮ່ວມມືສາກົນ ປະຈຳ ສປປ ລາວ (JICA) ພ້ອມດ້ວຍຄະນະເຂົ້າຢ້ຽມພົບປະ.

ໃນໂອກາດດັ່ງກ່າວ ທ່ານ ໄຊຊະນະ ໂຄດພູທອນ ໄດ້ສະແດງຄວາມຮັບຕ້ອນອັນອົບອຸ່ນ ແລະ ສະແດງຄວາມຊົມເຊີຍ ທີ່ ທ່ານ ໂທຊິໂອະ ນາກາເຊະ (Toshio NAGASE) ອົງການຮ່ວມມືສາກົນ ປະຈຳ ສປປ ລາວ ທີ່ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງ ເປັນຫົວໜ້າອົງການໄຈກາ ປະຈຳ ສປປ ລາວ ໃນໄລຍະເວລາ 1 ປີ ຜ່ານມາ, ເຊື່ອໝັ້ນຢ່າງຍິ່ງວ່າ ໃນວາລະທີ່ ທ່ານ ດຳລົງຕຳແໜ່ງເປັນຫົວໜ້າອົງການໄຈກາ ປະຈຳ ສປປ ລາວ ນີ້ ການພົວພັນຮ່ວມມື ລະຫວ່າງ ອົງການໄຈກາ ກັບ ສປປ ລາວ ເວົ້າລວມ, ເວົ້າສະເພາະ ລະຫວ່າງ ອົງການໄຈກາ ກັບ ອົງການໄອຍະການປະຊາຊົນສູງສຸດ ຈະໄດ້ຮັບການເສີມຂະຫຍາຍຮ່ວມມືເຂົ້າສູ່ລວງເລິກ ຢ່າງບໍ່ຢຸດຢັ້ງ. ສອງຝ່າຍຕີລາຄາສູງ ຜົນສຳເລັດຂອງການຮ່ວມມື ໃນໄລຍະຜ່ານມາລະຫວ່າງ ອົງການໄອຍະການປະຊາຊົນສູງສຸດ ແລະ ອົງການໄຈກາ ນັບແຕ່ຊຸມປີ 1998 ເປັນຕົ້ນມາ ລັດຖະບານ ຢີ່ປຸ່ນ ໄດ້ໃຫ້ການຊ່ວຍເຫຼືອ ສປປ ລາວ ໂດຍໄດ້ສະໜອງງົບປະມານຈໍານວນ10.108.611ໂດລາ, ແລະ ໄດ້ສົ່ງບັນດາສາສະດາຈານ, ຜູ້ຊ່ຽວຊານ, ພະນັກງານວິຊາການ ມາໃຫ້ການແລກປ່ຽນບົດຮຽນໃນຂົງເຂດກົດໝາຍເຂົ້າໃນການກໍ່ສ້າງພະນັກງານໃຫ້ມີທັງປະລິມານ ແລະ ຄຸນນະພາບ ຊຶ່ງໄດ້ຮັບຜົນສໍາເລັດທີ່ໜ້າເພິ່ງພໍໃຈ ເປັນຕົ້ນ. ພວກເຮົາໄດ້ສ້າງປະມວນກົດໝາຍແພ່ງ ສະບັບປະຫວັດສາດຂອງຊາດລາວເຮົາສໍາເລັດ, ໄດ້ສ້າງປຶ້ມຄູ່ມືໃນຂົງເຂດກົດໝາຍແພ່ງ, ການຄ້າ, ເສດຖະກິດ, ແຮງງານ, ກົດໝາຍອາຍາ, ການດໍາເນີນຄະດີແພ່ງ, ການດໍາເນີນຄະດີອາຍາ, ປຶ້ມຄູ່ມືວ່າດ້ວຍການສືບສວນ-ສອບສວນ, ໄດ້ຄົ້ນຄວ້າ ພັດທະນາຫຼັກສູດການສຶກສາ, ການຝຶກອົບຮົມກົດໝາຍ ຂອງ ສປປ ລາວ ພ້ອມທັງໄດ້ເອົາປຶ້ມທີ່ຂຽນສໍາເລັດລົງໄປເຜີຍແຜ່, ຝຶກອົບຮົມໃຫ້ພະນັກງານທີ່ກ່ຽວຂ້ອງໃນຂອບເຂດທົ່ວປະເທດ ເພື່ອນຳໃຊ້ເຂົ້າໃນຊີວິດຕົວຈິງຂອງລາວ ຢ່າງມີປະສິດທິຜົນ. ອັນທີ່ສຳຄັນທີ່ສຸດນັ້ນ, ບັນດາທ່ານ ນັກຄົ້ນຄວ້າໄດ້ກາຍເປັນຜູ້ຊ່ຽວຊານທີ່ມີຄວາມຮູ້ຄວາມສາມາດ, ເປັນຊັບພະຍາກອນມະນຸດ, ເປັນຊັບສົມບັດອັນລໍ້າຄ່າຂອງ ສປປ ລາວ ທີ່ຈະເປັນຜູ້ສືບຕໍ່ນຳເອົາຄວາມຮູ້, ປະສົບການທີ່ໄດ້ມາ ເພື່ອໄປນຳໃຊ້ເຂົ້າວຽກງານ ແລະ ຖ່າຍທອດບົດຮຽນ, ຄວາມຮູ້ຂອງຕົນໃຫ້ຮຸ່ນສືບທອດຕໍ່ໄປແລະປະກອບສ່ວນສໍາຄັນເຂົ້າໃນການພັດທະນາລັດທີ່ປົກຄອງດ້ວຍກົດໝາຍ ຢູ່ ສປປ ລາວ ຢ່າງສັກສິດ ເທື່ອລະກ້າວ.

ຂ່າວ-ພາບ: ສຸກພາວະດີ