ພິທີເປີດບັ້ນສອບເສັງນັກຮຽນເກັ່ງ ມ.4 ແລະ ມ.7 ຄັ້ງທີ I ປະຈໍາສົກຮຽນ 2022-2023 ຂອງໂຮງຮຽນທີ່ຂຶ້ນກັບພະແນກສຶກສາທິການ ແລະ ກິລາແຂວງ (ສກຂ) ບໍລິຄໍາໄຊ ໄດ້ຈັດຂຶ້ນເມື່ອບໍ່ດົນມານີ້ຢູ່ຫ້ອງປະຊຸມສູນພັດທະນາຄູແຂວງ, ເປັນປະທານໂດຍ ທ່ານ ລົມ ແພງສຸກ ຫົວໜ້າພະແນກສຶກສາທິການ ແລະ ກິລາແຂວງ, ມີຂະແໜງກ່ຽວຂ້ອງ, ຄະນະຮັບຜິດຊອບການສອບເສັງແລະ ນັກສອບເສັງທີ່ເປັນຕົວແທນແຕ່ລະໂຮງຮຽນເຂົ້າຮ່ວມ.

ທ່ານ ບຸນທ່ຽວ ນັນທະເສນ ຮອງຫົວໜ້າຂະແໜງສາມັນສຶກສາ ພະແນກ ສກຂ ໄດ້ໃຫ້ຮູ້ວ່າ: ການສອບເສັງນັກຮຽນເກັ່ງ ຂອງໂຮງຮຽນທີ່ຂຶ້ນກັບພະແນກໃນຄັ້ງນີ້, ແມ່ນເປັນຄັ້ງທໍາອິດຊຶ່ງມີໂຮງຮຽນເຂົ້າຮ່ວມສອບເສັງ ຊັ້ນ ມ.4ມີ2ແຫ່ງຄື: ມ.ສ ສີທ່ານາໄຊ ແລະ ມ.ສ ປາກງຽບ ມີນັກສອບ 8 ຄົນຍິງ 7 ຄົນ ແລະ ຊັ້ນ ມ.7ມີ4 ແຫ່ງຄື: ມ.ສ ສີທ່ານາໄຊ, ມ.ສ ປາກງຽບ, ມ.ປາຍປາກຊັນ ແລະ ຫ້ອງຮຽນພອນສະຫວັນຂອງແຂວງ, ມີນັກສອບເສັງ16 ຄົນ,ຍິງ 12 ຄົນ, ແບ່ງອອກເປັນ 1 ຫ້ອງສອບເສັງ, ມີ 4 ວິຊາຫຼັກທີ່ນໍາມາສອບເສັງຄື: ວິຊາພາສາລາວ-ວັນນະຄະດີ, ວິຊາຄະນິດສາດ, ວິຊາເຄມີສາດ ແລະ ວິຊາຟີຊິກສາດ, ໃຊ້ເວລາໃນການສອບເສັງ ແມ່ນ 2 ຊົ່ວໂມງ.

ຜ່ານການສອບເສັງສາມາດຄັດເລືອກໄດ້ນັກຮຽນເກັ່ງດັ່ງນີ້: ຊັ້ນ ມ.4ວິຊາພາສາລາວ-ວັນນະຄະດີແມ່ນ ນາງ ສາຍນໍ້າ ແສນສູ່ງານ ມາຈາກໂຮງຮຽນມ.ສ ສິທ່ານາໄຊ, ວິຊາຄະນິດສາດນາງ ສາຍນໍ້າເຜິ້ງ ພົມມະຈັນ ມ.ສ ສີທ່ານາໄຊ,ວິຊາຟີຊິກສາດນາງ ມະນີສອນ ໄຊຍະຈັກ ມ.ສ ສີທ່ານາໄຊ ແລະ ວິຊາເຄມີສາດນາງ ມີມີ່ ລັດຕະນະວັນມາຈາກ ມ.ສ ສີທ່ານາໄຊ.ສ່ວນຊັ້ນ ມ.7 ວິຊາພາສາລາວ-ວັນນະຄະດີແມ່ນນາງ ອາລຸນພອນ ຈັນດາມະນີ ມາຈາກຫ້ອງຮຽນພອນສະຫວັນແຂວງ, ວິຊາຄະນິດສາດ ທ້າວ ສີສົມພອນ ທໍາມະວົງແສງ ຈາກຫ້ອງຮຽນພອນສະຫວັນແຂວງ, ວິຊາເຄມີສາດນາງ ໄຫຼເຈ້ຍ ຊົ່ວ ຈາກຫ້ອງຮຽນພອນສະຫວັນແຂວງ ແລະ ວິຊາຟີຊິກສາດ ທ້າວ ເຢັ້ງມົວ ຈາກຫ້ອງຮຽນພອນສະຫວັນແຂວງ.

ການຈັດສອບເສັງຄັດເລືອກນັກຮຽນເກັ່ງໃນຄັ້ງນີ້, ກໍເພື່ອເປັນການຈັດຕັ້ງປະຕິບັດແຜນພັດທະນາການສຶກສາຂອງພະແນກສຶກສາທິການ ແລະ ກິລາແຂວງວາງອອກແນໃສ່ຍົກສູງຄຸນນະພາບຂອງການສຶກສາໃຫ້ເທົ່າທຽມກັບສາກົນເທື່ອລະກ້າວ, ນອກຈາກນັ້ນກໍເປັນການເປີດໂອກາດໃຫ້ນັກຮຽນໄດ້ເຂົ້າຮ່ວມແຂ່ງຂັນລະຫວ່າງຊັ້ນຕໍ່ຊັ້ນ, ເປັນການສົ່ງເສີມວຽກງານວິຊາສະເພາະສາຍສາມັນສຶກສາໂດຍສະເພາະແມ່ນຊັ້ນ ມ.4 ແລະ ມ.7 ຂອງໂຮງຮຽນທີ່ຂຶ້ນກັບ ພະແນກສຶກສາທິການ ແລະ ກິລາແຂວງ ໃຫ້ມີບັນຍາກາດຟົດຟື້ນ, ມີລັກສະນະແຂ່ງຂັນເຮັດໃຫ້ຂະບວນການສອນດີ-ຮຽນເກັ່ງ ຊຶ່ງນອນຢູ່ໃນ 3 ຂໍ້ແຂ່ງຂັນທີ່ກະຊວງສຶກສາທິການ ແລະ ກິລາວາງອອກໃຫ້ປະກົດຜົນເປັນຈິງ.

(ຂ່າວ-ພາບ: ສີສຸພັນ ສີສົມພອນ)